တဘျီ ဘ့လ့ၣ်ကြ့ၤဟၣ် နီၣ်သိလ့ၣ် ဒီး လဲၤခီဖျိဝဲ ဝ့ၢ်ဖိလၢ ကလံၤထံး တဖျၢၣ်အပူၤ, ဒီးဖဲန့ၣ် ဘၣ်တၢ်ကိး အိၣ် ပတုာ်အီၤလၢ ပၢၤကီၢ်တဂၤ ဒီး တၢ်အီၣ်လီာ်အီၤလၢ အနီၣ်သိလ့ၣ် ချ့န့ၢ်ဒံး တၢ်ပာ်ပနီၣ်အဃိ လီၤ. ဘ့လ့ၣ်ကြ့ၤ ဟၣ် အၢၣ်လီၤ အတၢ်ကမၣ်, ဘၣ်ဆၣ် ပၢၤကီၢ်တဂၤန့ၣ် တဲအီၤလၢ ကဘၣ်လဲၤလၢကွီၢ် န့ၣ်လီၤ. လၢကွီၢ်အပူၤ န့ၣ်, ပှၤစံၣ်ညီၣ်ကွီၢ် သံကွၢ်အီၤ, “နတၢ်ကမၣ် အိၣ်, မ့တမ့ၢ် တအိၣ်ဘၣ်လဲၣ်.” ဖဲကြ့ၤဟၣ် စံးလၢ အတၢ်ကမၣ် အိၣ်လီၤ အခါ စံၣ်ညီၣ်ကွီၢ် တဲအီၤ, “နကဘၣ်ဟ့ၣ် ဒီလၣ်တဆံ, ခီဖျိ နလဲၤတလၢ တၢ်ပာ်ပနီၣ် ၁၀ မံၤလာ်အဃိ လီၤ.” သတူၢ်ကလာ် စံၣ်ညီၣ်ကွီၢ်တဂၤန့ၣ် ကွၢ်နီၣ်ဘၣ် က့ၤဝဲ ဘ့လ့ၣ်ကြ့ၤဟၣ် အဃိ, စံးဝဲ, “နမၤကမၣ် တၢ်သိၣ် တၢ်သီ, အဃိ နဘၣ်ဟ့ၣ်အပှ့ၤလီၤ. ဘၣ်ဆၣ် ယကဟ့ၣ်လၢ နဂီၢ်လီၤ.” စံၣ်ညီၣ်ကွီၢ်ဟံးန့ၢ် စ့ ဒီလၣ် ၁၀ တဘ့ၣ် လၢအထၢၣ်ပူၤ ဒီး မၤတံၢ်ဝဲ တပူၤဃီဒီး လံာ်ပျဲက့ န့ၣ်လီၤ. ဝံၤအလီၢ်ခံ, လဲၤအီၣ်ယုၤ ဘ့လ့ၣ်ကြ့ၤဟၣ် အတၢ်အီၣ် လၢတၢ်အီၣ်ကျး န့ၣ်လီၤ. ဘ့လ့ၣ်ကြ့ၤဟၣ်စံးဝဲ, “ပှၤတၢ်ဒဲးဘးဖိလၢ အပီၢ်ယၢ်လီၤက့ၤအသး န့ၣ် ကစၢ်ယွၤ ကမၤ အီၤဒ်န့ၣ်အသိးလီၤ.”
ပကဒိးန့ၢ် တၢ်အုၣ်က့ၤခီၣ်က့ၤ အဂီၢ် ပဂုာ်ကျဲး စၢး ထဲလဲၣ် ဘၣ်ဆၣ် ပမၤအီၤတန့ၢ်ဘၣ်. စီၤပီလူး စံးဘၣ် ပှၤအ့းဖ့း စူးဖိ တဖၣ်လၢ ထဲဒၣ်တၢ်ဘျုး တၢ်ဖှိၣ် ဒီး တၢ်နာ်အဃိ လီၤ. တၢ်ဘျုးတၢ်ဖှိၣ် လၢအမ့ၢ် တၢ်ဟ့ၣ်လုၢ်ဒိၣ်ပှ့ၤဒိၣ် ကတၢၢ်လၢ ကစၢ်ယွၤဟ့ၣ်ပှၤ လၢအမ့ၢ် ကစၢ်ယ့ၣ် ရှူး ခရံာ် န့ၣ်လီၤ. ကစၢ်ယ့ၣ်ရှူး ခရံာ်စံးဝဲ ဒၣ်, “ယဲဒၣ်အံၤ ယမ့ၢ်ကျဲ, ဒီးတၢ်မ့ၢ်တၢ် တီ, ဒီးတၢ်မူလီၤ. မ့တမ့ၢ် ဘၣ်ယၤဒီး, ပှၤတ ဟဲဘၣ်ဆူ ပၢ်အအိၣ်နီ တဂၤ ဘၣ် (ယိၤဟၣ် ၁၄း၆).” ယ့ၣ်ရှူးမ့ၢ်ကျဲ ထဲတ ဘိ လၢ ပက တုၤလၢ တၢ်အုၣ်က့ၤခီၣ် က့ၤ အဂီၢ် လီၤ. ဘၣ်ဆၣ် ပတုၤသ့ဒၣ်ထဲ ပတၢ်စူၢ် က့ၤနာ် က့ၤ ကစၢ်ယ့ၣ် ရှူးခရံာ် ဒီး ပတၢ်ပီၢ်ယၢ်လီၤက့ၤ ပသး အဃိ န့ၣ်လီၤ. ယိၤဟၣ် ၃း၁၆ စံးဘၣ်ပှၤ, “အဂ့ၢ်ဒ်အံၤ, ယွၤအဲၣ် ဟီၣ်ခိၣ်ဖိ တုၤအဟ့ၣ်လီၤကွံာ် အဖိခွါအိၣ်တဂၤဃီ, ဒ်သိး ကယဲၢ်ပှၤလၢ အစူၢ်က့ၤနာ်က့ၤအီၤ တဂၤလၢ်လၢ်န့ၣ်, အသုတဟးဂီၤတဂ့ၤဒီး, ကန့ၢ်ဘၣ် တၢ်မူအထူအယိာ်လီၤ.”
လၢ - ယိၤရှံယၤလ့
