ဒီးကလူးန့ၣ်စံးဘၣ်အီၤ, ပျံၤတၢ်တဂ့ၤ. အဂ့ၢ်ဒ်အံၤ, ကွၢ်ကွၢ်, ယစံးဘၣ်သုလၢ တၢ်သးခုဖးဒိၣ် အကစီၣ်, လၢအကကဲထီၣ်လၢ ပှၤဂီၢ်မုၢ်ခဲလၢာ်အဂီၢ်လီၤ. အဂ့ၢ်ဒ်အံၤ, အအံၤတနံၤအံၤ, ပှၤလၢအအုၣ်က့ၤခီၣ်က့ၤတၢ် တဂၤန့ၣ်, အိၣ်ဖျဲၣ်ဝဲလၢသုဂီၢ် လၢစီၤဒၤဝံး အဝ့ၢ်ပူၤလံ. အဝဲဒၣ်မ့ၢ် ခရံာ်ကစၢ်န့ၣ်လီၤ. (လူၤကၣ် ၂း၁၀-၁၁)တၢ်အဃံအလၤကတၢၢ်အကျါတမံၤလၢ ကစၢ်ယွၤစံးကတိၤဝဲဖဲ ယ့ၣ်ရှူးအိၣ်ဖျဲၣ်ထီၣ်အဆၢကတီၢ်န့ၣ် မ့ၢ်ဝဲ ပျံၤတၢ်တဂ့ၤ လီၤ. ဖဲကလူးကၤဘြံၤအ့လး ဟဲဆူစီၤစဃၤရံ အအိၣ်လၢကတဲဘၣ် အမါနီၢ်အ့းလံၤစါဘ့း ကအိၣ် ထီၣ်ဒီးအဖိခွါတဂၤ, လၢကကတဲာ်ကတီၤ ကျဲလၢမ့ၤရှံအၤ အဂီၢ်အခါန့ၣ်, ကလူးန့ၣ်စံးဘၣ်အီၤ, “ပျံၤတၢ်တဂ့ၤ” (လူၤကၣ် ၁း၁၃). ဖဲကလူး ကၤဘြံၤအ့လး ဟဲဆူနီၢ်မၤရံအအိၣ် ဒီးစံးဘၣ်အီၤလၢ အဝဲဒၣ်ဘၣ်တၢ်ဃုထၢထီၣ် အီၤလၢ ကကဲထီၣ် မိၢ်လၢ ယွၤအဖိခွါ အဂီၢ်အခါန့ၣ်, ကလူးန့ၣ်စံးဘၣ်အီၤ, “ပျံၤတၢ်တဂ့ၤ” (လူၤကၣ် ၁း၃၀). ဒီးဖဲ ယွၤအကလူး တဲဘၣ်ယ့ၣ်ရှူးအတၢ်အိၣ်ဖျဲၣ်ထီၣ် ဆူ ပှၤကွၢ်သိတဖၣ်အအိၣ်အခါန့ၣ်, ကလူးန့ၣ်စးထီၣ် အတၢ်ကတိၤလၢ, “ပျံၤတၢ်တဂ့ၤ” (လူၤကၣ် ၂း၁၀). မ့ၢ်အိၣ်ဘၣ်လၢ တၢ်လီၢ်လၢ အလီၤပျံၤလီၤဖုး အလီၢ် ဘၣ်ဆၣ်, ကစၢ်ယွၤစံးဝဲ, “ပျံၤတၢ်တဂ့ၤ.” ဘၣ်မနုၤအဃိလဲၣ်. မ့ၢ်လၢ တၢ်အိၣ်သးကိးမံၤဒဲးအပူၤ ကစၢ်ယွၤမ့ၢ် ပှၤလၢ အပၢဆှၢတၢ်ခဲလၢာ်လီၤ. အတၢ်သုးတၢ်ကျဲၤတဖၣ် အိၣ်ဝဲဘၣ်ဂ့ၢ်ဘၣ်ဝီဒိၣ်မးလီၤ. ဒီးအဝဲဒၣ်ဟဲစိာ်, “တၢ်သးခုဖးဒိၣ်အကစီၣ် လၢပှၤကိးဂၤဒဲးအဂီၢ်” လီၤ. တၢ်အဂ့ၤတမံၤ ကဟဲဝဲလီၤ.
တမ့ၢ်ထဲလၢ အဝဲသ့ၣ် တဘၣ်ပျံၤတၢ်လၢအဆၢကတီၢ်အဝဲန့ၣ်ဘၣ်, ကစၢ်ယွၤ အတၢ်တိာ်ကျဲၤအံၤ ဒိၣ်ထီၣ်လၢ အဝဲသ့ၣ် အတၢ်အိၣ်မူအပူၤအဃိ, ခါဆူညါအဂီၢ်စ့ၢ်ကီး တလိၣ်လၢအဝဲသ့ၣ်ကဘၣ်ပျံၤတၢ်ဘၣ်. စီၤစဃၤရံ ဒီး နီၢ်အ့းလံၤစါဘ့း ခံဂၤ တလိၣ်ပျံၤ တၢ်လၢ အိၣ်ထီၣ်ဒီးအဟုးအသးလၢ အသးပှၢ်ထီၣ် အခါဘၣ်, အမဲာ်ညါ တလိၣ်လၢ အဝဲသ့ၣ်ကိၢ်ဂီၤလၢ ပှၤကနံၤဘၣ်ဖၣ်လဲအီၤဘၣ်. နီၢ်မၤရံတလိၣ်ပျံၤလၢ အအိၣ်ထီၣ်ဒီး အဟုး အသး လၢ အမုၣ်ကနီၤ အဆၢကတီၢ်အဃိ, တလိၣ်ဘၣ်ယိၣ်လၢ အတၢ်အဲၣ်တီ ဒီး အဟံၣ်ဖိဃီဖိတဖၣ် စံးအၢစံးသီ အီၤဘၣ်. ပှၤကွၢ်သိတဖၣ် တလိၣ်ပျံၤလၢ ကလဲၤလၢစီၤပၤအမဲာ်ညါ, အဝဲသ့ၣ်မ့မ့ၢ်ဒၣ်လဲာ်ပှၤပတီၢ်ဖုၣ်ကတၢၢ် လၢအပှၤတဝၢအပူၤ အခါဒၣ်လဲၣ်ဘၣ်.
အဝဲအံၤမ့ၢ်စ့ၢ်ကီး တၢ်အုၣ်ကီၤလၢပဂီၢ်လီၤ.
တၢ်ဂ့ၢ်တမံၤလၢ ပတလိၣ်ပျံၤတၢ်ဘၣ်န့ၣ်မ့ၢ်ဝဲ ယ့ၣ်ရှူး အတၢ်အိၣ်ဖျဲၣ်ထီၣ်အံၤ တမ့ၢ်တၢ်တမံၤလၢ ကစၢ်ယွၤဒုးအိၣ် ထီၣ်အီၤ လၢတအိၣ်ဒီးတၢ်အဂ့ၢ်အခၢးနီတမံၤဘၣ်လီၤ. အနီၢ်ကီၢ်န့ၣ်, တၢ်အုၣ်က့ၤခီၣ်က့ၤလၢ ယ့ၣ်ရှူးဟဲစိာ်ဝဲအံၤ က့ၤကဒါက့ၤအခီၣ်ထံးခီၣ်ဘိလၢ ၁မိၤရှ့ အပူၤလံၤလံၤလံ.
ဖဲ ၁မိၤရှ့ ၃း၁၅ အပူၤ, ဖဲစီၤအၤဒၣ်ဒီးနီၢ်အံၣ်အု တဒိကနၣ်ယွၤ အကလုၢ်လၢ ဧ့ၤဒ့ၣ်တၢ်သၣ်လီၢ်အပူၤန့ၣ်, ကစၢ်ယွၤ ဟ့ၣ်လီၤအဝဲသ့ၣ်ကျဲလၢ တၢ်အုၣ်က့ၤခီၣ်က့ၤအဂီၢ်လီၤ.
ကစၢ်ယွၤတဲဘၣ်ဂုၢ်န့ၣ်ဒ်အံၤ, ဒီးယကဒုးထီဒုၣ်ထီဒါလိာ်နသးဒီး ပိာ်မုၣ်, ဒီးနချံနသၣ်ဒီး ပိာ်မုၣ်အချံအသၣ်န့ၣ်လီၤ. အဝဲဒၣ် ကမၤသဘှံ နခိၣ်, ဒီးနကမၤသဘှံး အခီၣ်နၢၣ်ခံလီၤ. (၁မိၤရှ့ ၃း၁၅).ဖဲအံၤ ကစၢ်ယွၤစံးဝဲလၢ ပိာ်မုၣ်အချံအသၣ် ကမၤသဘှံး ဂုၢ်အခိၣ်လီၤ. ပှၤသ့လံာ်ယွၤဂ့ၢ်ပီညါ တဖၣ် ကိးဝဲ တၢ်ဂ့ၢ် အံၤလၢ “တၢ်သးခုကစီၣ်အဆိကတၢၢ်” မ့ၢ်လၢ အဝဲအံၤမ့ၢ် တၢ်အဆိကတၢၢ်တဘျီလၢ တၢ်စံၣ်စိၤတဲစိၤအပူၤလၢ ကစၢ်ယွၤ လီၣ်ဖျါထီၣ် အတၢ်သုးတၢ်ကျဲၤ လၢကဆှၢလီၤပှၤအုၣ်က့ၤခီၣ်က့ၤတၢ်တဂၤ လၢကဟဲလီၤဒီးမၤပူၤဖျဲး ပှၤဟီၣ်ခိၣ်ဖိခဲလၢာ်လၢ တၢ်ဒဲးဘးအတၢ်ဆိၣ်အၢအပူၤလီၤ.
လံာ်စီဆှံလီၢ်လံၤဒီတဘ့ၣ်ညါအပူၤ ဝံတဖၣ် တဲဆိတ့ၢ် ပှၤအုၣ်ခီၣ်က့ၤတၢ်တဂၤ အတၢ်ဟဲအဂ့ၢ်, ဒီး လံာ်စီဆှံ အသီအပူၤ ကစၢ်ယွၤမၤလၢပှဲၤ အတၢ်အၢၣ်လီၤအီလီၤ ခီဖျိ ယ့ၣ်ရှူး အတၢ်ဟဲလီၤအိၣ်ဖျဲၣ်ထီၣ်လီၤ. လၢတၢ်န့ၣ်အဃိ, ပမၤလၤကပီၤ ယ့ၣ်ရှူးအတၢ်အိၣ်ဖျဲၣ်ထီၣ် ကိးနံၣ်ဒဲးလီၤ. မ့ၢ် “တၢ်သးခုဖးဒိၣ်အကစီၣ်” (လူၤကၣ် ၂း၁၀) လၢဟ့ၣ်ပှၤ တၢ်အုၣ်ကီၤ လၢအဝဲဒၣ်မ့ၢ်သပှၢ်ကတၢၢ် ကစၢ်ယွၤအပှၤဃုထၢမ့ၤရှံအၤ ဒီး စီၤပၤတဂၤ လီၤ. မ့ၢ်သပှၢ်ကတၢၢ် အဝဲဒၣ်က “အုၣ်က့ၤခီၣ်က့ၤအပှၤဂီၢ်မုၢ်လၢ တၢ်ဒဲးဘးအပူၤလီၤ” (မးသဲ ၁း၂၁).
အဃိ, တလိၣ်လၢပကဘၣ်ပျံၤတၢ်ဘၣ်.
