စီၤယိၤဘးအဂ့ၢ်


စီၤယိၤဘးအိၣ်ဝဲလၢ ကီၢ်ဧူးစး အပူၤလီၤ. အဝဲအိၣ်ဒီး အဆၣ်ဖိကီၢ်ဖိ လၢအကထိတဖၣ်လီၤ. အိၣ်စ့ၢ် ကီးဒီး အဖိ မုၣ်သၢဂၤ, အဖိခွါနွံဂၤ, ဒီး တၢ်ခ့တၢ်ပှၤအါမးလီၤ. စီၤယိၤဘးမ့ၢ်ပှၤထူးပှၤတီၤတဂၤလီၤ. စီၤယိၤဘး မ့ၢ်စ့ၢ်ကီး ပှၤအဲၣ်ထူ အဲၣ်ယွၤ တဂၤလီၤ. စီၤယိၤဘးမၤတၢ်လၢ အဘၣ်ယွၤအသးလီၤ. ထီဘိန့ၣ် အဝဲ ဃ့ဘါထု ကဖၣ် ဒီး ဃ့ကစၢ်ယွၤလၢ က ဆိၣ်ဂ့ၤအီၤ ဒီး ပျၢ်အတၢ်ဒဲး ဘးတဖၣ်လီၤ. အဝဲတ့တၢ်လုၢ်လီၢ် ဒီးလုၢ်ထီၣ် တၢ်ဆူ ကစၢ်ယွၤအအိၣ်လီၤ. ဖဲစီၤယိၤဘး အဖိခွါ တဖၣ်ဒိၣ်ထီၣ်အခါ, အဝဲသ့ၣ် မၤတၢ် အီၣ်တၢ်အီအမူးဖးဒိၣ် တဖၣ် လီၤ. တၢ်အီၣ်တၢ်အီအမူး ဝံၤလၢခံတနံၤ, စီၤယိၤဘး လုၢ်ထီၣ်တၢ်လၢ တၢ်လုၢ်လီၢ်လၢ အဖိတဖၣ် အဂီၢ် လီၤ.
 
မုၣ်ကီၤလံၢ် သ့ၣ်ညါလၢ ကစၢ်ယွၤအဲၣ်ဘၣ်စီၤယိၤဘး, ဒီး စီၤယိၤဘးအဲၣ်ကစၢ်ယွၤလီၤ. ကစၢ်ယွၤ ဆိၣ် ဂ့ၤ စီၤယိၤ ဘး လၢက အိၣ်ဒီးတံၤသကိးအါမး, အိၣ်ဒီးတၢ်ထူးတၢ်တီၤ, ဒီး တၢ်သူၣ်ခုသးခုလီၤ. မုၣ်ကီၤလံၢ် တအဲၣ်ဒိး တၢ်အံၤဘၣ်. တနံၤ အဝဲကဒူးကဒ့ၣ် တၢ်ဆူ ကစၢ်ယွၤအအိၣ် ဘၣ်ဃးစီၤယိၤဘးအဂ့ၢ်လီၤ. မုၣ်ကီၤ လံၢ် တဲဝဲလၢ စီၤယိၤဘး မၤကစၢ်ယွၤ အတၢ်မၤ မ့ၢ်လၢ ကစၢ်ယွၤ ဆိၣ်ဂ့ၤ အီၤအဃိလီၤ. မုၣ်ကီၤလံၢ် တဲစ့ၢ်ကီး ဝဲလၢ စီၤယိၤဘးမ့ၢ်အိၣ်ဒီး တၢ်ကီတၢ်ခဲအါအါန့ၣ်, အဝဲဒၣ် ကဃၣ်ဒူၣ်ချၢ ကွံာ်အသးလၢ ကစၢ် ယွၤအအိၣ်လီၤ. ကစၢ်ယွၤမ့သ့ၣ်ညါလၢ မုၣ်ကီၤလံၢ် အတၢ်ထံၣ် ကမၣ် ဘၣ်ဆၣ်, အဝဲပျဲ မုၣ်ကီၤလံၢ် လၢကဆှၢ တၢ်ကီတၢ်ခဲ တဖၣ် ဆူ စီၤယိၤဘးအအိၣ်လီၤ. ဒီးတၢ်ကဲထီၣ်အသးဒ်န့ၣ်လီၤ. တၢ်ကီ တၢ်ခဲ တဖၣ်စးထီၣ် အသးလၢ စီၤယိၤ ဘး အဂီၢ်လီၤ.
 
ဖဲစီၤယိၤဘး အဖိတဖၣ် မၤတၢ်အီၣ်တၢ်အီအမူးအခါ, ပှၤပၢဆှၢတၢ် ဟဲစိာ်တၢ်ကစီၣ်ဆူ စီၤယိၤဘး အ အိၣ်လီၤ. ပှၤ ပၢဆှၢတၢ် တဲဘၣ် စီၤယိၤဘးလၢ ပှၤဟဲဟုၣ်န့ၢ် အကသ့ၣ်ယီၤတဖၣ်, အကျီၢ်တဖၣ် ဒီး မၤသံအခ့ အပှၤ ခဲလၢာ် လီၤ. ထဲဒၣ် အီၤတဂၤဧိၤ ပူၤဖျဲး ဝဲလီၤ.
 
ဝံၤအလီၢ်ခံ, တၢ်ခ့တၢ်ပှၤအဂၤတဂၤ ဟဲဒီးတဲဘၣ်စီၤယိၤဘးလၢ တၢ်ကစီၣ်အအၢဒိၣ်ထီၣ်လီၤ. အဝဲတဲ ဘၣ် စီၤယိၤဘးလၢ လီဖျးတၢ်ဘၣ်ဒိသံ အသိခဲလၢာ် ဒီး အခ့အပှၤတဖၣ်လီၤ. ထဲဒၣ်အီၤတဂၤဧိၤပူၤဖျဲးဝဲလီၤ. တၢ်ခ့တၢ်ပှၤ အဂၤ တဂၤ ဟဲကဒီး, ဒီးတဲ စီၤယိၤဘး တၢ်ကစီၣ်လၢ အအၢဒိၣ်ထီၣ်လီၤ. တဲဘၣ်စီၤယိၤဘးလၢ ပှၤဟဲ ဟုၣ်အကိၤလၤအူးတဖၣ် ဒီး မၤသံအခ့အပှၤတဖၣ်လီၤ. ဝံၤ အလီၢ်ခံ, တၢ်ခ့တၢ်ပှၤအဂၤတဂၤ ဟဲဒီးတဲ ဘၣ် စီၤယိၤဘးလၢ ကလံၤဖးဒိၣ် ဟဲအူဘၣ် ဟံၣ်လၢ အဖိတဖၣ် အိၣ်ဝဲ ဒီး အဖိတဖၣ် သံကွံာ်ဝဲ ခဲလၢာ်လီၤ.
 
ဆိကမိၣ်ကွၢ်, စီၤယိၤဘး အသးအုးဝဲဒိၣ်မး လၢတၢ်သးအုးကစီၣ်တဖၣ်အံၤအဃိလီၤ. အဝဲဖှီကွံာ် အဆ့ ကၤ, ဒီး ထိၣ်လီၤပှီၤ အသးလၢဟီၣ်ခိၣ်လီၤ. အဝဲမ့ၢ်သးအုးဒိၣ်ဒိၣ်ကလဲာ်ဘၣ်ဆၣ်, အဝဲတဃၣ်ဒူၣ်ချၢ အသးလၢ ကစၢ်ယွၤ ဒ် မုၣ်ကီၤ လံၢ် ဆိကမိၣ်ဝဲ အသိး ဘၣ်. မ့ၢ်လၢ တၢ်တဂ့ၤတဘၣ်တဖၣ်အံၤ မၤစီၤယိၤဘးလၢ ကဃၣ် ဒူၣ်ချၢအသးဒီး ကစၢ်ယွၤ တန့ၢ် ဘၣ်အဃိ, မုၣ်ကီၤလံၢ် မၤသအုး သပှီၤကွံာ် စီၤယိၤဘးအတၢ်အိၣ်မူလီၤ. မုၣ်ကီၤလံၢ် ဆိကမိၣ်ဝဲလၢ အဝဲမ့ၢ်မၤကီမၤခဲ စီၤယိၤဘး အတၢ်အိၣ်မူအါထီၣ်န့ၣ်, စီၤယိၤဘး ကဃၣ်ဒူၣ်ချၢကွံာ် အသးလၢကစၢ်ယွၤအအိၣ် သပှၢ်ကတၢၢ်လီၤ.
 
ဖဲစီၤယိၤဘးအစိၤ, ပှၤနာ်ဝဲလၢ တၢ်တဂ့ၤတဘၣ် ဟဲဘၣ်ပှၤန့ၣ် မ့ၢ်လၢ ကစၢ်ယွၤစံၣ်ညီၣ်အဝဲသ့ၣ် ခီဖျိ အတၢ်ဒဲးဘး အဃိ လီၤ. မုၣ်ကီၤလံၢ် ဆိကမိၣ်ဝဲလၢ စီၤယိၤဘး နာ်တၢ်အံၤစ့ၢ်ကီး, အဃိ ဒုးအိၣ်ထီၣ် တၢ်ဝ့တၢ် ကျုာ် လၢ အမိၢ်ပှၢ် လိၤဒီတဂၤညါလီၤ. ပှၤကိးဂၤဒဲး သူၣ်ပျံၤသးဖုးဝဲ, ဃုာ်ဒီး အမါဒၣ်ဝဲစ့ၢ်ကီးလီၤ. အမါတဲ စီၤယိၤဘး လၢ ကဆိၣ်အၢယွၤ ဒီး သံ ဒၣ်လဲာ်လီၤ.
 
စီၤယိၤဘး အိၣ်ဒီး အတံၤသကိးသၢဂၤ လၢဟဲဆူအအိၣ်ဒ်သိး ကမၤမုာ်ထီၣ်အီၤအဂီၢ်လီၤ. အသကိး သၢဂၤ ဒၣ်လဲာ် ဆိက မိၣ် ဝဲလၢ စီၤယိၤဘး ကမၤဘၣ်တၢ်ကမၣ်တမံၤမံၤလီၤ. အဝဲသ့ၣ်ဆိကမိၣ်ဝဲလၢ ကစၢ်ယွၤ စံၣ်ညီၣ် စီၤယိၤဘး လီၤ. ဒီးတနံၤန့ၣ်, ကစၢ် ယွၤကတိၤတၢ်ဆူစီၤယိၤဘးအအိၣ်လီၤ. ကစၢ်ယွၤတဲဘၣ် စီၤယိၤ ဘးလၢ အဝဲဒၣ် အသးအုးလၢ စီၤ ယိၤဘးအတံၤ သကိးသၢဂၤ အံၤ အဃိ မ့ၢ်လၢ အတၢ်ဆိကမိၣ် န့ၣ်ကမၣ် ဝဲ အဃိလီၤ. စီၤယိၤဘး တမၤကမၣ် တၢ်နီတမံၤ ဘၣ်. ကစၢ်ယွၤတစံၣ်ညီၣ်စီၤယိၤဘးဘၣ်.
 
ကစၢ်ယွၤစးထီၣ်ဆိၣ်ဂ့ၤကဒါက့ၤစီၤယိၤဘးလီၤ. အတၢ်ဝ့တၢ်ကျုာ်တဖၣ် ဟါမၢ်ကွံာ်ဝဲလီၤ. အဝဲဒၣ် ထူး တီၤ ဒိၣ်ထီၣ်ဒိၣ်န့ၢ် အပူၤကွံာ်လီၤ. အနီၢ်ကီၢ်န့ၣ်, အဝဲဒၣ် အတၢ်အိၣ်တၢ်ယၢၤန့ၣ် အါန့ၣ်အပူၤကွံာ်ခံစးလီၤ. ကစၢ် ယွၤ ဟ့ၣ်လီၤ အါထီၣ် စီၤယိၤဘးလၢ အဖိ တဖၣ်, အကုၢ်အပှၤတဖၣ်, ဒီး ဆၣ်ဖိကီၢ်ဖိတဖၣ်လီၤ.
 
ဖဲတၢ်ဆၢကတီၢ်ကီခဲအပူၤဒၣ်လဲာ်, စီၤယိၤဘး နာ်န့ၢ်ကစၢ်ယွၤလီၤ.