တဘျီ, ပှၤခိးတၢ်ဖိလၢ ပီၣ်လဲၣ်နံၤ အိၣ်ဝဲခံဂၤ. အဝဲသ့ၣ် ခံဂၤဘၣ် အမူအဒါလီၤဘၣ် လၢဘၣ်ခိးကွၢ် တၢ်လၢ ပီၣ်လဲၣ်နံၤ လၢကကွၢ်ထွဲ ပှၤဟဲလိာ်ကွဲထံ တဖၣ်အဂီၢ်လီၤ. ပှၤခိးတၢ်ဖိ အကျါတဂၤ ဟးဆှၣ်ကွၢ်တၢ် အခါ, အဂၤတဂၤ အိၣ်လၢ တၢ်ထီၣ်ထီအလိၤ, အစုတခီ ဖီၣ်ဃာ် တၢၣ်တတၢၣ်, ဒီးကွၢ်တၢ်လၢ တအိၣ်ဒီး တၢ်ပာ် သူၣ်ပာ် သး နီတမံၤဘၣ် န့ၣ်လီၤ. ဖဲန့ၣ်သတူၢ်ကလာ်, လပီဖးဒိၣ် ဟဲထီၣ်, ဒီး ပှၤခိးတၢ်ဖိလၢ ဟးဆှၣ်ကွၢ် တၢ် တဂၤ လီၤထွံ ထွဲ လပီဖးဒိၣ်အခံ န့ၣ်လီၤ. မ့မ့ၢ်, ပှၤခိးတၢ်ဖိလၢ ဖီၣ်ဃာ်တၢၣ် တဂၤ, သ့ၣ်ညါလၢ လပီဖးဒိၣ် ဟဲထီၣ် တဘျီဃီ, ဖီၣ်တံၢ်ဃာ် အတၢၣ်န့ၣ် ဃံးဃံး, အဃိ လပီမ့ၢ်တီၢ်အီၤဘၣ်ဆၣ် တလီၤထွံဝဲဘၣ်.
စီၤယိၤဟၣ် ကွဲးန့ၢ် တၢ်အိၣ်ဖှိၣ်လၢ ဖံၤလဒ့း လဖံ ဘၣ်ဃး ကစၢ်ခရံာ်အတၢ်ကတိၤ ဆူတၢ်အိၣ်ဖှိၣ် န့ၣ် အအိၣ် လၢအစံးဝဲ, “ယဟဲချ့ချ့လီၤ. ဒ်သိး ပှၤသု တ ဟံးန့ၢ် နခိၣ် သလုးတဂ့ၤဒီး, ဟံးဃာ်တၢ်အိၣ်ဒီးနၤ တက့ၢ်. လီၣ်ဖျါ ၃း၁၁.” ကစၢ်ခရံာ်စံးဘၣ် တၢ်အိၣ် ဖှိၣ် န့ၣ်လၢ အကဟဲချ့ချ့လီၤ အဃိ, ဒ်သိး အခိၣ်သ လုး ကအိၣ်ဂၢၢ် ဆိးကျၢၤ တုၤကစၢ်ခရံာ်ကဟဲ ကဒါ က့ၤ တစု အဂီၢ်န့ၣ်, ကစၢ်ခရံာ်မၢအဝဲသ့ၣ် လၢ ကဟံး ဃာ် တၢ်လၢ အိၣ်ဒီးအီၤ န့ၣ်လီၤ. တၢ်လၢအိၣ်ဒီး ဖံၤလဒ့းလဖံ အတၢ်အိၣ်ဖှိၣ်န့ၣ် မ့ၢ်တၢ်မနုၤလဲၣ်. ပကထံၣ် ဘၣ် အီၤလၢ လီၣ်ဖျါ ၃း၈ လၢအစံးဝဲ, “အဂ့ၢ်ဒ်အံၤ, နအိၣ်ဒီး နဂံၢ်နဘါတဆံးတက့ၢ်, ဒီး နတိၢ်န့ၢ်ယကလုၢ်ကထါ, ဒီး နတသမၢဘၣ် ယမံၤဘၣ်.” တၢ်တဖၣ်အံၤ, ကစၢ်ခရံာ်အဲၣ်ဒိးလၢ ဖံၤလဒ့းလဖံ အတၢ်အိၣ်ဖှိၣ် ကဟံးဃာ် ဂၢၢ်ကျၢၤ အီၤတုၤ အဟဲ ကဒါက့ၤ တစုန့ၣ်လီၤ.
တၢ်လၢအိၣ်ဒီးပှၤ လၢပကဟံးဃာ်အီၤ တုၤခရံာ်ဟဲခံစုတစု မ့ၢ်တၢ်မနုၤလဲၣ်. မ့ၢ် ကစၢ်ယွၤ အကလုၢ် ကထါ လံာ်စီဆှံ, ဒီး တၢ်စူၢ်တၢ်နာ်လၢ မိၢ်ပၢ်ဖံဖု ဟ့ၣ်သါပှၤ န့ၣ်လီၤ. ပမ့ၢ်တဟံးဃာ် ဂၢၢ်ကျၢၤအီၤ ဘၣ်န့ၣ်, မုၣ်ကီၤလံၢ် ကထုးကွံာ်အီၤ လၢပအိၣ်, ဒီးဖဲ ကစၢ်ခရံာ်ဟဲကဒါက့ၤကဒီးတစုန့ၣ် ကစၢ်ခရံာ်ကစံးဘၣ်ပှၤ, “ယစံး ဘၣ် တဲဘၣ်သုတီတီအံၤ, ယတသ့ၣ်ညါဘၣ် သုဘၣ်. မးသဲ ၂၅း၁၂.”
လၢ – ယိၤရှံယၤလ့
