တၢ်ကွဲးလၢ “Today in the Word, 1990” တခါအပူၤ စံးလၢ ပှၤဃိထံ သ့ၣ်ညါတၢ်ဖိတဖၣ် အဲၣ်ဒိးဃိထံ သ့ၣ်ညါ ဘၣ်ဃး တၢ်မုၢ်လၢ် အသဟီၣ် ဒိၣ်ဝဲထဲလဲၣ် န့ၣ်လီၤ. အဝဲသ့ၣ် မၤကွၢ်ဆိ ဝဲလၢ ယုၢ်လွံၢ်ဒု, ထၢနုာ် လီၤ ယုၢ်ခံဒုစုာ်စုာ် လၢ ထံဒၢဖးထီ လၢအအိၣ်ပှဲၤဒီး ထံ ခံဖျၢၣ် အပူၤန့ၣ်လီၤ. တနၣ်ရံၣ်ဝံၤ အလီၢ်ခံ ပှၤဃိထံ သ့ၣ်ညါတၢ်ဖိတဖၣ် ထံၣ်ဝဲ လၢ ထံဒၢတဖျၢၣ် အပူၤ ယုၢ်ခံဒုန့ၣ် လီၤအုးသံဝဲဒၣ်လံ. မ့မ့ၢ်ထံဒၢ အဂၤတဖျၢၣ် အပူၤ ယုၢ်ခံဒုန့ၣ် ပှီၢ်ဒံးထံဒံး. ဘၣ်မနုၤအဃိ အဝဲသ့ၣ် ဘၣ်မူဒံးလဲၣ်. မ့ၢ်လၢအဝဲသ့ၣ်ခံဒု အိၣ်ဒီး တၢ်မုၢ်လၢ်အဃိလီၤ. ယုၢ်ခံဒုန့ၣ် အိၣ်ဒီး တၢ်မုၢ်လၢ်လၢ အဝဲသ့ၣ် မ့ၢ်အိၣ်မူဒံး ဆူမဲာ်ညါတစဲးဖိန့ၣ် ပှၤကထုးထီၣ်အီၤလၢ ထံကျါ, အဃိ ဂုာ်ကျဲးစၢးဝဲလၢ ကအိၣ်မူဒံး အဂီၢ်န့ၣ်လီၤ.
ပဝဲလၢပမ့ၢ်ပှၤခရံာ်ဖိ တဖၣ်ပအိၣ်ဒီး တၢ်မုၢ်လၢ် ဖးဒိၣ်လီၤ. ပတၢ်မုၢ်လၢ်မ့ၢ် တၢ်မူလီၤထူလီၤယိာ် လၢမူခိၣ် ဘီမုၢ် အပူၤန့ၣ်လီၤ. ခီဖျိလၢပအိၣ်ဒီး တၢ်မုၢ်လၢ် ဒ်န့ၣ်အဃိ ပသူၣ်ခုသးခုကဲဝဲလီၤ. ဘၣ်ဆၣ်, တချုးပလဲၤတုၤလၢ တၢ်မုၢ်လၢ်အဖီတၢၣ်ဘၣ်န့ၣ် တၢ်ကီတၢ်ခဲ, တၢ်ကိၢ်တၢ်ဂီၤ, တၢ်နးတၢ်ဖှီၣ် ကဟဲဘၣ်ပှၤလၢ ကျဲတဘျုးတီၤလီၤ. တၢ်နးတၢ်ဖှီၣ် တနီၤနီၤ ဘၣ်ပှၤတုၤဒၣ်လဲာ်လၢ ပတၢ်မုၢ်လၢ် ဟါမၢ်ကွံာ် ဝဲလီၤ. အဃိ, ပှၤတနီၤနီၤ ဟံးကွံာ် အနီၢ်ကစၢ် အသးသမူ လၢတၢ်ဘၢၣ်စၢၤ အိၣ်ဝဲလီၤ. ဘၣ်ဆၣ်, ဆိကမိၣ်ဟံးန့ၢ်က့ၤ တၢ်မုၢ်လၢ်လၢ အိၣ်တ့ၢ်ဒီး ပှၤ, ဒီး အိၣ်ဒီး တၢ်ဝံသးစူၤ လၢတၢ်နးတၢ်ဖှီၣ်အပူၤ လၢပတၢ်မုၢ်လၢ်အဃိ န့ၣ်တက့ၢ်. တကးဒံးဘၣ်, ဒ်သိး ပတၢ်မုၢ်လၢ် ကလၢထီၣ်ပှဲၤထီၣ်အဂီၢ် ပကအိၣ်ဒီး တၢ်ထုကဖၣ်သပှၢ်ပှၢ်, ဒ်သိး ကစၢ်ယွၤကဟ့ၣ်ပှၤ တၢ်ဂံၢ်တၢ်ဘါ လၢ ပကလဲၤခီဖျိ တၢ်နးတၢ်ဖှီၣ်, တၢ်ကီတၢ်ခဲ အဂီၢ်တက့ၢ်. ယုၢ်ခံဒု အိၣ်ဒီးတၢ်မုၢ်လၢ်လၢ ကအိၣ်မူဘၣ်အဃိ ဂုာ်ကျဲးစၢးဝဲ သပှၢ်ပှၢ် အသိးန့ၣ်, ပဝဲလၢအမ့ၢ်ပှၤခရံာ်ဖိတဖၣ် ပအိၣ်ဒီး ပတၢ်မုၢ်လၢ် ဖးဒိၣ် လၢအမ့ၢ် တၢ်မူအထူ အယိာ် အံၤ, မ်ပကဂုာ်ကျဲးစၢး သပှၢ်ပှၢ် လၢပကမၤန့ၢ်အီၤ အဂီၢ်တက့ၢ်.
လၢ - ယိၤရှံယၤလ့
