ပိာ်ခွါတဂၤ လဲၤတၢ်လၢ ဝ့ၢ်ယရူၤရှလ့ၣ်ဆူ ဝ့ၢ်ယရံးဃိ ဒီးဘၣ်တၢ်မၤဒၢၣ်အီၤလၢ တမျာ်တဖၣ် လီၤ. အဝဲသ့ၣ် တီၢ်အီၤ, ဟံးန့ၢ်အတၢ်ဖိတၢ်လံၤခဲလၢာ်, ဒီးပာ်တ့ၢ်အီၤလၢကျဲမုၢ်ခိၣ် ဘူးအကသံ တ့ၢ်လီၤ. ပှၤလုၢ်တၢ်အဒိၣ်လၢ ဝ့ၢ်ယရူၤရှလ့ၣ်တၢ်လုၢ်ဟံၣ်တဂၤ လဲၤတၢ်လၢ ကျဲတဘိန့ၣ် အလိၤလီၤ. အဝဲထံၣ် ဘၣ် ပှၤလၢတၢ် တီၢ်အီၤတဂၤ, ဘၣ်ဆၣ်တမၤစၢၤဝဲ နီတမံၤဘၣ်, ဒီး လဲၤကပာ် ကွံာ်ဝဲ လီၤ. လီၢ်ခံ, တၢ်လုၢ်ဟံၣ်အပှၤမၤတၢ်ဖိတဂၤ လဲၤတၢ်လၢကျဲတဘိန့ၣ် စ့ၢ်ကီးလီၤ. အဝဲထံၣ်ဘၣ်စ့ၢ်ကီး ပှၤလၢ တၢ်တီၢ်အီၤ တဂၤန့ၣ်, ဘၣ်ဆၣ် လဲၤကပာ်ကွံာ်ဝဲလီၤ.
ဝံၤအလီၢ်ခံ, ပိာ်ခွါလၢရှၤမရံတဂၤ ဟဲတုၤဝဲလီၤ. ပှၤအိၣ်လၢဝ့ၢ်ယရူၤရှလ့ၣ်တဖၣ် တဘၣ်သူၣ်ဘၣ်သး ပှၤရှၤမရံဖိ တဖၣ်ဘၣ်. အနီၢ်ကီၢ်န့ၣ်, အဝဲသ့ၣ် သးဟ့ပှၤရှၤမရံဖိ ဒီး ကွၢ်တလီၤ ဝဲလီၤ.
ဘၣ်ဆၣ်, ဖဲပှၤရှၤမရံဖိတဂၤအံၤ ထံၣ်ဘၣ်ပှၤလၢ တၢ်တီၢ်အီၤတဂၤန့ၣ်, အဝဲဒၣ် သးကညီၤအီၤ လီၤ. အဝဲလဲၤဆူ ပှၤတဂၤန့ၣ်အအိၣ်, သ့စီကွံာ် အတၢ်ပူၤလီၢ်တဖၣ်, ဒီးဘိၣ်ဘံက့ၤ တၢ်ပူၤလီၢ်တဖၣ် ဂ့ၤဂ့ၤလီၤ. ဝံၤအလီၢ်ခံ, အဝဲဒၣ် ပာ်ထီၣ်ပှၤတဂၤန့ၣ်လၢ အကသ့ၣ်ယီၤ ဒၣ်ဝဲ အလိၤ ဒီးဆှၢအီၤဆူ တမှံၤအဟံၣ်လၢ အဘူး ကတၢၢ်တဖျၢၣ်လီၤ. အဝဲဒၣ် ဟ့ၣ်လီၤ ဒၢးအပှ့ၤဝံၤ, ပာ်လီၤဝဲပှၤဆါတဂၤန့ၣ်လၢလီၢ်မံခိၣ်အလိၤ, ဒီးကွၢ်ထွဲ အီၤ လီၤ.
လၢခံတနံၤ ပှၤရှၤမရံဖိတဂၤန့ၣ် ဘၣ်လဲၤကဒီးဆူညါလီၤ. အဃိ, အဝဲဒၣ်ဟ့ၣ်လီၤ စ့ခံဘ့ၣ် ဆူ ပှၤကွၢ် ထွဲတမှံၤ အဟံၣ် တဂၤအအိၣ်ဒီး စံးဝဲ, “ကွၢ်ထွဲန့ၢ်ယၤပှၤတဂၤအံၤဂ့ၤဂ့ၤ တက့ၢ်. ဒီးနမ့ၢ် သူစ့အါန့ၢ်ဒံးအဝဲအံၤန့ၣ် ဖဲယဟဲက့ၤ ကဒါက့ၤယကဟ့ၣ်က့ၤနၤလီၤ.”
ဖဲယ့ၣ်ရှူးတဲပူဝံၤန့ၣ်, အဝဲဒၣ်စံးဝဲ, “ပျဲရှၤမရံဖိတဂၤအံၤ ကဲထီၣ် တၢ်အဒိအတဲာ် လၢသုဂီၢ် တက့ၢ်. သု ကြၢးမၤ ဒ်သိးအံၤလီၤ.”
(လူၤကၣ် ၁၀)
