အဝဲအံၤ ဘၣ်တၢ်စံးကတိၤအီၤ ဒ် ‘ကစၢ်ယွၤဟံးန့ၢ်နလီၢ်’ အသိးန့ၣ်လီၤ. ကစၢ်ယွၤဟံးန့ၢ် နလီၢ် လၢနဂီၢ် လီၤ. အခီပညီဒ်လဲၣ်?
ဖဲ လါယနူၤအါရံး ၁၉၄၁ နံၣ်န့ၣ်, ပှၤဃိၣ်ဖိတဂၤ ဃ့ၢ်ဖျိးကွံာ်လၢ Auschwitz အဃိၣ်ပူၤ အဃိ, ဒ်သိး ကမၤကၣ်က့ၤတၢ်အဂီၢ် ကၠၢမနံၣ်ပၢၤကီၢ်တဖၣ် ဃုထၢထီၣ် ပှၤဃိၣ်ဖိ အဂၤ တဆံ လၢကပာ်လီၤဒိသံဝဲ အဂီၢ်လီၤ. ပှၤလၢ အဘၣ်တၢ်ဃုထၢအီၤ အကျါတဂၤ, လၢ အမံၤမ့ၢ် Francis Gajowniczek, အံၤ ဖဲအဘၣ်တၢ်ဃုထၢအီၤ အခါ ဟီၣ်ကိးပသူဝဲ, ‘အိ, ယမါဒီး ယဖိတဖၣ် တထံၣ်ဘၣ်လၢၤယၤ နီတဘျီလၢၤဘၣ်.’ ဒီးဖဲန့ၣ် အဆၢကတီၢ် ပှၤနီၣ် ဆံးဖိတဂၤ လၢအမ့ၢ် ပှၤဖိလဲၣ်ဖိတဂၤ, ဟဲပာ်ဖျါထီၣ်အသး ဒီးစံးဝဲ, “ကွၢ်လၢအံၤ, ယမ့ၢ် ခဲးသလ့း သရၣ် တဂၤ, အဃိ ယဖိယမါ တအိၣ်ဘၣ်. ယအဲၣ်ဒိးသံလၢ ပှၤတဂၤအံၤ အခၢၣ် စး.’
ပှၤအါဂၤကမၢကမၣ်, ဒီးဖဲန့ၣ် အတၢ်ကတိၤန့ၣ်တၢ်တူၢ်လိာ်အီၤ, ဒီးအဝဲဘၣ် တၢ်စိာ်အီၤဆူ တၢ်လီၢ်လၢ တၢ်ကပာ်လီၤဒိသံ ပှၤအလီၢ်န့ၣ်လီၤ. ဒီးဖဲ လါအီကၢး ၁၄ သီအနံၤန့ၣ် အဝဲမ့ၢ် ပှၤလီၢ်ခံကတၢၢ်တဂၤလၢ အသံလီၤ. ဖျါလၢ အဝဲပာ် တၢ်အိၣ်သးဖျါ လီၤလိၢ်လီၤလး လီၤ. မ့ၢ်လၢ အဝဲမၢ ပှၤအဂၤတဖၣ် သးဝံၣ်ထါသးဝံၣ် ကစၢ်ယွၤ ဒီး ဘါထုကဖၣ်လီၤ. ဘၣ် ဆၣ် ဖဲလါအီကၢး ၁၄သီ အနံၤန့ၣ် ကၠၢမနံၣ်ပၢၤကီၢ်တဖၣ် လိၣ်ဘၣ် တၢ်လီၢ်န့ၣ်လၢ ပှၤအဂၤ အဂီၢ်အဃိ, အဝဲသ့ၣ်တဖၣ် ဘၣ်တၢ်ဆဲးသံအီၤလၢ ကသံၣ် လီၤ.
လွံၢ်ဆံတနံၣ်ဝံၤ အလီၢ်ခံ, အဝဲအတၢ်သံ ဘၣ်တၢ်ပာ်ပနီၣ်အီၤ ဂ့ၤဂ့ၤဘၣ်ဘၣ်လီၤ. ဖဲန့ၣ် ပှၤကမျၢၢ်ကအိၣ် အဂၤ ၁၅၀,၀၀၀ ဃၣ်ဃၣ်, ဃုာ်ဒီး Cardinals ၂၆ ဂၤ, ဒီး Archbishops ဒီး Bishops အဂၤ ၃၀၀, လၢ St Peter’s Square လၢဝ့ၢ်ရိမ့ၤ အပူၤ, ဒီးလၢ ပှၤကမျၢၢ် အကျါ န့ၣ် ပၣ်ဃုာ်ဒီး Francis Gajowniczek. ပၤပၤ တဲတၢ် ဘၣ်ဃး အတၢ်သံဒ်အံၤ, ‘မ့ၢ် Maximilian Kolbe အတၢ်သံ’ - ပှၤဖိလဲၣ်အ Priest လၢအအိၣ်လွံၢ်ဆံနွံ နံၣ် လၢ အဟဲထီၣ် လၢတၢ် မဲာ်ညါ ဒ်သိးကဟ့ၣ်လီၤအသး သမူအဂီၢ်, - မ့ၢ်တၢ်မၤနၢၤ အခိၣ် ကွီၤ လၢ ပကစၢ် ယ့ၣ်ရှူးခရံာ် ကွီၤအီၤ, မ့ၢ်လၢအဟ့ၣ်လီၤအနီၢ်ခိ - အဟ့ၣ်လီၤအသးသမူ လၢတၢ်အဲၣ်အဃိ လီၤ.
Francis Gajowniczek သံဖဲ အသးအိၣ် ခွံဆံသၢ နံၣ်, ဒီးတချုးအသံန့ၣ် အတၢ်အိၣ်မူ လၢ အအိၣ်တ့ၢ် တဖၣ် ဟးဝဲဒီး တဲဘၣ်ပှၤအါဂၤဘၣ်ဃး ပှၤတဂၤအံၤ အတၢ်အဲၣ် လၢအသံ လၢအလီၢ်လီၤ.
လၢကျဲလၢ အလီၤလိၢ်လီၤလး အဒိၣ်ကတၢၢ်အပူၤန့ၣ်, ယ့ၣ်ရှူး သံတ့ၢ်ဝဲ လၢနဂီၢ် ဒီးလၢ ယဂီၢ်လီၤ. ယွၤ အဖိခွါ အဲၣ်တ့ၢ်ယၤ ဒီး ဟ့ၣ်လီၤအသး လၢယဂီၢ် လီၤ.
