တဘျီပှၤသးပှၢ်အိၣ်တဂၤ အိၣ်ဒီးအဖိခွါခံဂၤ. ဖိခွါအဆံးတဂၤတဲဘၣ်အပၢ်, “ပၢ်ဧၢ, ဟ့ၣ်ယၤ န စုလီၢ်ခီၣ်ခိၣ် လၢ အဘၣ်ထွဲဒီးယၤတဖၣ်.” ဒီးဖဲန့ၣ် ပၢ်တဂၤန့ၣ် နီၤဖးလီၤ အတၢ်စုလီၢ်ခီၣ်ခိၣ် လၢအဖိခွါ ခံဂၤ အဂီၢ်လီၤ. စှၤသီဝံၤ အလီၢ်ခံ, ဖိခွါအဆံးတဂၤ ဟံးထီၣ်အတၢ်ဖိတၢ်လံၤ ဒီးလဲၤဆူ တၢ်လီၢ်လၢ အ ယံၤ လီၤ. ဖဲန့ၣ် အဝဲသူကွံာ် အစ့ ခဲလၢာ်, ဒီးတၢ်တအိၣ်ဒီးအီၤနီတမံၤလၢၤဘၣ်.
ဖဲအဝဲသူကွံအစ့ခဲလၢာ်ဝံၤ, အကပှ့ၤအီၣ်တၢ်အဂီၢ် တၢ်တအိၣ်ဒီးအီၤ နီတမံၤလၢၤဘၣ်. ဖိခွါ အဆံး တဂၤအံၤ တၢ်သၣ်ဝံၤ အသးဒိၣ်မး, အဃိ ဃ့မၤတၢ်လၢ ပှၤမၤစံာ်ဖိတဂၤ အအိၣ်, ဒီး တၢ်မၢ အကွၢ်ထွဲ ထိးတဖၣ်လီၤ. ပှၤတ ဟ့ၣ်အီၤ တၢ်အီၣ်နီတဂၤဘၣ် အဃိ မ့ၢ်ဘၣ်အီၣ်ထိးဆၣ် ဒၣ်လဲာ် ကအီၣ် ဝဲလီၤ.
လီၢ်ခံကတၢၢ် အဝဲသ့ၣ်နီၣ်ထီၣ် ဒီးစံးဝဲ, “ယသ့ၣ်ညါလၢ ယပၢ်အပှၤမၤတၢ်ဖိ တဖၣ် အိၣ်ဒီး တၢ်အီၣ်လၢ အကအီၣ် ဝဲလၢအီၣ်လၢအီ လီၤ. ဖဲအံၤ တၢ်သၣ်ဝံၤယသးဒိၣ်မး, ယကက့ၤဆူ ယပၢ်အအိၣ် ဒီးတဲအီၤ, ပၢ်ဧၢ, ယမၤကမၣ် ဘၣ်ယွၤ ဒီးနၤလံ, ယတကြၢးလၢ တၢ်ကိးယၤလၢနဖိခွါလၢၤဘၣ်. ပျဲယမၤ တၢ်ဒ်နပှၤမၤတၢ်ဖိ တဂၤတက့ၢ်.”
အဃိ, အဝဲဒၣ်က့ၤက့ၤဆူ အပၢ်အအိၣ်လီၤ. ဖဲအဝဲက့ၤဘူးကတုၤလၢဟံၣ်န့ၣ် အပၢ်ထံၣ်အီၤ, ဒီး လဲၤသဂၢၢ်အီၤ, ဖိးဟုအီၤ, ဒီးနၢမူအီၤလီၤ. ဖဲန့ၣ်အဖိခွါဆံးန့ၣ်တဲအီၤ, “ပါဧၢ, ယမၤကမၣ်ဘၣ်ယွၤ ဒီးနၤ လံ, ယတကြၢးမ့ၢ်လၢၤ နဖိခွါလၢၤဘၣ်.” ဘၣ်ဆၣ်, တချုးအဝဲဃ့ဒံးလၢ ကမၤတၢ်မၤအခါ, အပၢ်ဃၣ်ဃီၤ ဆူ အကုၢ်တဂၤအအိၣ် ဒီးစံးဝဲ, “မၤချ့ချ့. ဟဲစိာ်တၢ်ကူတၢ်သိးလၢအဂ့ၤ ဒီး ဒုးကၤထီၣ်အီၤတက့ၢ်. ဖျီၣ် ထီၣ်န့ၢ်အစုလၢပသံး, ဒီးဒုးသိးထီၣ်အီၤ ခီၣ်ဖံးတက့ၢ်. ဟံးန့ၢ်ကျီၢ်ဖိလၢအဂ့ၤကတၢၢ်တဒု, ကတဲာ်ကတီၤ အီၤဝံၤ ပကအီၣ်ဒီး သူၣ်ဖှံသးညီလီၤ. ယဖိခွါလၢ အသံတ့ၢ်တဂၤ, အခဲအံၤ မူထီၣ်က့ၤလံ. လၢအပူၤကွံာ် လီၤမၢ်တ့ၢ်, ခဲအံၤဘၣ်တၢ်ထံၣ်န့ၢ်က့ၤအီၤလံ.” ဒီး တၢ်သူၣ်ဖှံ သးညီအမူးန့ၣ်စးထီၣ်ဝဲလီၤ.
ဖိခွါဒိၣ်တဂၤ မၤတၢ်လၢစံာ်ပူၤလီၤ. ဖဲအဝဲဟဲက့ၤဟံၣ်အခါ နၢ်ဟူတၢ်သးဝံၣ် ဒီး တၢ်ဂဲၤကလံၣ် အသီၣ်လီၤ. အဝဲသံ ကွၢ်ကုၢ်တဂၤ လၢတၢ်မနုၤမၤအသးလဲၣ်. ကုၢ်တဂၤန့ၣ်တဲအီၤ, “နပုၢ်ဟဲက့ၤ, ဒီးမ့ၢ်လၢ အဟဲက့ၤအဃိ နပၢ်မၤသံ ကျီၢ်ဖိအဂ့ၤကတၢၢ်တဒု ဒီး မၤတၢ်သူၣ်ဖှံသးညီ အမူးလီၤ.”
ဖိခွါဒိၣ်တဂၤန့ၣ် သးဒိၣ်ထီၣ်ဒိၣ်မး တုၤဒၣ်လဲာ်လၢ တအဲၣ်ဒိးက့ၤနုာ်လီၤဆူဟံၣ်ပူၤဘၣ်. အပၢ်ဟဲ ထီၣ်ဆူဟံၣ်ချၢ, ဃ့ကညးအီၤလၢ ကနုာ်လီၤဆူဟံၣ်ပူၤ, ဘၣ်ဆၣ်ဖိခွါဒိၣ်န့ၣ်စံးဝဲ, “ယမၤတ့ၢ်တၢ်မၤလၢ နဂီၢ် ဖးယံာ်လံ, ဒီးယဒိ ကနၣ်နကလုၢ်ထီဘိလီၤ. ဘၣ်ဆၣ်, နတဟ့ၣ်ယၤ မဲာ်တဲးလဲးဖိတဒု လၢယကမၤ တၢ်သူၣ်ဖှံသးညီဒီး ယသကိး တဖၣ်ဘၣ်. ဘၣ်ဆၣ် အခဲအံၤနဖိခွါလၢအသူလၢာ်နစ့တဂၤဟဲက့ၤ, ဒီးန မၤသံ ကျီၢ်ဖိ အဂ့ၤကတၢၢ်တဒု လၢအဂီၢ်လီၤ.”
ဘၣ်ဆၣ်အပၢ်စံးဆၢအီၤ, “ဖိခွါဧၢ, နအိၣ်ဒီးယၤထီဘိလီၤ. တၢ်လၢအိၣ်ဒီးယၤ တဖၣ်မ့ၢ် နတၢ် ခဲလၢာ် လီၤ. ဘၣ်ဆၣ် ပကြၢးမၤတၢ်သူၣ်ဖှံသးညီ ဒီးသူၣ်ခုသးခု, မ့ၢ်လၢ နပုၢ်လၢအသံတ့ၢ်န့ၣ် အခဲအံၤ မူထီၣ်က့ၤလံ. နပုၢ် လၢ အလီၤမၢ်တ့ၢ်န့ၣ် အခဲအံၤ တၢ်ထံၣ်န့ၢ်က့ၤအီၤလံ.”
(လူၤကၣ် ၁၅)
