ယွၤအသးအိၣ်လၢယလိၤလီၤ. အဂ့ၢ်ဒ်အံၤ, ဖှူယၤဒ်သိး ယကစံၣ်တဲၤတဲလီၤ တၢ်သးခုအကစီၣ်လၢ ပှၤဖှီၣ်ဖိယာ် ဖိလီၤ. မၢလီၤယၤ, (ဒ်သိးယကမၤဘျါက့ၤပှၤ အသူၣ်ကၢ်အသးလီၤ), ဒ်သိး ယကကိးထီၣ် တၢ်ထူၣ်ဖျဲးလၢ ပှၤဘၣ် တၢ်မၢကဲကုၢ်အဂီၢ်, ဒီး တၢ်ထံၣ်ထီၣ်က့ၤလၢပှၤမဲာ်ဘျီၣ် အဂီၢ်, ဒ်သိး ယကပျၢ်ပှၤလၢ အဘၣ်တၢ်မၤအၢ မၤနးအီၤ, ဒ်သိးယကကိးထီၣ် နံၣ်တၢ်ဘၣ်ယွၤအသး န့ၣ်လီၤ... ဒီးစံးဘၣ်အီၤ, တၢ်ကွဲးအသးအံၤ လၢထီၣ်ပှဲၤထီၣ် လၢသုနၢ်ပူၤ လၢမုၢ်မဆါတနံၤအံၤလီၤ. (လူၤကၣ် ၄း၁၈-၂၁).
ဖဲယ့ၣ်ရှူးအိၣ်ဖျဲၣ်ထီၣ်အဆၢကတီၢ်, မူခိၣ်ကလူးဘိးဘၣ်ရၤလီၤ “တၢ်သးခုဖးဒိၣ်အကစီၣ်” န့ၣ်မ့ၢ် တၢ်လၢ အအါ န့ၢ်ဒံး တၢ်မၤသးခု ပှၤကွၢ်သိတဖၣ် လီၤ. မ့ၢ်တၢ်ဘိးဘၣ်ရၤလီၤလၢ ကစၢ်ယွၤ ဟဲလီၤဒ်သိးကမၤဘျါ ဒီး မၤသဘျ့ ထီၣ် အပှၤဂီၢ်မုၢ်အဂီၢ်, မ့ၤရှံအၤအိၣ်ဖျဲၣ်ထီၣ်ဝဲလံ. လၢခံ, ယ့ၣ်ရှူးအကစၢ်ဒၣ်ဝဲ တဲပှဲၤက့ၤ တၢ်သးခုအကစီၣ်အံၤ လီၤ.
ဖဲယ့ၣ်ရှူးအတၢ်ဖံးတၢ်မၤစးထီၣ်အသးသီသီအခါ, အဝဲဒၣ်လဲၤဆူ ဘူၣ်ဘျီၣ် လၢနစၤရံးအပူၤ လၢအအိၣ်လၢ ကၤလံၤလါန့ၣ်, ဒီးဖးဝဲဒၣ် ယရှါယၤ ၆၁း၁-၂, လၢအမ့ၢ်လံာ်စီဆှံတတီၤလၢ ဘၣ်တၢ်သ့ၣ်ညါအီၤလၢ အတဲဆိပာ် မ့ၤရှံအၤ အတၢ်ဟဲလီၤ. ယ့ၣ်ရှူးဖးထီၣ်ဝဲ -
ယွၤအသးအိၣ်လၢယလိၤလီၤ. အဂ့ၢ်ဒ်အံၤ, ဖှူယၤဒ်သိး ယကစံၣ်တဲၤတဲလီၤ တၢ်သးခုအကစီၣ်လၢ ပှၤဖှီၣ်ဖိယာ် ဖိလီၤ. မၢလီၤယၤ, (ဒ်သိးယကမၤဘျါက့ၤပှၤ အသူၣ်ကၢ်အသးလီၤ), ဒ်သိး ယကကိးထီၣ် တၢ်ထူၣ်ဖျဲးလၢ ပှၤဘၣ် တၢ်မၢကဲကုၢ်အဂီၢ်, ဒီး တၢ်ထံၣ်ထီၣ်က့ၤလၢပှၤမဲာ်ဘျီၣ် အဂီၢ်, ဒ်သိး ယကပျၢ်ပှၤလၢ အဘၣ်တၢ်မၤအၢ မၤနးအီၤ, ဒ်သိးယကကိးထီၣ် နံၣ်တၢ်ဘၣ်ယွၤအသး န့ၣ်လီၤ. (လူၤကၣ် ၄း၁၈-၁၉).
ဆိကမိၣ်ကွၢ်, ဖဲယ့ၣ်ရှူးဖးထီၣ်လံာ်အံၤအခါ ယူၤဒၤအသရၣ်သမါ ပှၤသ့ပှၤဘၣ် လၢအဆ့ၣ်နီၤကနၣ် တၢ်တဖၣ်, ကကျၢၢ်ကျာ် အခိၣ်ဖဲ အဒိကနၣ် ယ့ၣ်ရှူးဖးလံာ်အခါလီၤ. ဘၣ်ဆၣ် ဖဲယ့ၣ်ရှူးစံးကတိၤတၢ်ကတိၤ တဘီအံၤ, “တၢ်ကွဲးအသးအံၤ လၢထီၣ်ပှဲၤထီၣ်လၢ သုနၢ်ပူၤ လၢမုၢ်မဆါတနံၤအံၤလီၤ” (လူၤကၣ် ၄း၂၁).
အိၣ်ခိးတစိၢ်. တၢ်မနုၤလဲၣ်.
လံာ်လူၤကၣ်တဲဘၣ်ပှၤလၢ, ဖဲန့ၣ်အခါ, “ပှၤခဲလၢာ်အုၣ်အသးလၢအီၤ, ဒီးမ့ၢ်တၢ်ကတိၤအဂ့ၤအဘၣ် လၢအဟဲထီၣ် လၢအထးခိၣ် အဃိဒီး, ကမၢကမၣ်ဝဲတကူၢ်သ့ၣ်လီၤ” (လူၤကၣ် ၄း၂၂). အဃိ, ပသ့ၣ်ညါဘၣ်လၢ ပှၤဒိကနၣ် တၢ်တဖၣ်န့ၣ် ဘၣ်သူၣ်ဘၣ်သးအတၢ်ကတိၤ တဖၣ်လီၤ. ဘၣ်ဆၣ် လၢ အဆၢဖိ ၂၄ အပူၤ, ယ့ၣ်ရှူးစံးဘၣ် ပှၤတဖၣ်န့ၣ်လၢ တၢ်လၢဝံဧိၤမီၣ်ဧိၤန့ၣ်, တဘၣ်ဘၣ် တၢ်တူၢ်လိာ်အီၤလၢ အထံအကီၢ်ဒၣ်ဝဲ, နီတဂၤဘၣ်. ယ့ၣ်ရှူး သ့ၣ်ညါအပှၤဒိကနၣ်တၢ်ဖိ တဖၣ်ဂ့ၤဂ့ၤလီၤ. ဖဲအဆၢဖိ ၂၉ အပူၤ, လံာ်လူၤကၣ်စံးဘၣ်ပှၤလၢ, “ဒီးဂဲၤဆၢထၢၣ် ဟီထီၣ်ကွံာ်အီၤလၢ ကစၢၢ်ကလိလၢ ဝ့ၢ်ပူၤဆူခိ, ဒီးဒ်သိး အကတ့ၢ်လီၤဆှိခိၣ်အီၤလၢ ကစၢၢ်လၢ အဝ့ၢ်သူၣ်ထီၣ် အသးလၢ အဖီခိၣ်အတလူၢ်ထိး ဒီး, လဲၤဆှၢအီၤလီၤ.” လၢတၢ်န့ၣ်အဃိ, ပသ့ၣ်ညါသ့လၢ ပှၤတဖၣ်န့ၣ် တတူၢ်လိာ် ယ့ၣ်ရှူးအတၢ်ကိးလီၤအသးလၢ မ့ၤရှံအၤန့ၣ်ဘၣ်.
ဘၣ်ဆၣ်, ဖဲယ့ၣ်ရှူးအတၢ်ဖံးတၢ်မၤအပူၤ, တၢ်မၤလၢအမၤဝဲလီၤဆီဒၣ်တၢ် တၢ်လီၤလး တဖၣ်န့ၣ်, အုၣ်ကီၤ အသးလၢ အမ့ၢ်သပှၢ်ကတၢၢ် တၢ်လၢအစံးတ့ၢ်ဝဲဖဲ လူၤကၣ် ၄ န့ၣ်လီၤ. တၢ်လီၤလးလၢ ယ့ၣ်ရှူးမၤအီၤတဖၣ် အိၣ်ဒီးအတၢ်တိာ်တဘျုးခါလီၤ. တခါန့ၣ်မ့ၢ်ဝဲ, မ့ၢ်တၢ်အိၣ်ဒီးကစၢ်ယွၤအသကဲာ်ပဝး, လၢအမ့ၢ် အဝဲဒၣ်အိၣ်ဒီး တၢ်သးကညီၤဖးဒိၣ်လၢ အပှၤဂီၢ်မုၢ်အဂီၢ်လီၤ. မးသဲ ၉း၃၆ စံးဝဲ, “ဒီးတုၤအထံၣ်ပှၤဂီၢ်မုၢ်တဖၣ်န့ၣ်ဒီး, အသးအိၣ် အီၤလီၤ. အဂ့ၢ်ဒ်အံၤ တၢ်ဘှံးအဝဲသ့ၣ်အသး, ဒီးလီၤပြံလီၤပြါ ဝဲဒ် သိတဖၣ်လၢ တၢ်တအိၣ်ကွၢ်ဘၣ်အီၤ အသိးန့ၣ်လီၤ.” တၢ်ဟဲစိာ်တၢ်သးခုကစီၣ်ဆူပှၤဖှီၣ်ဖိယာ်ဖိအအိၣ်, တၢ်သဘျ့လၢ ပှၤဘၣ်တၢ်စၢဃာ်အဂီၢ်, တၢ်မၤ ဘျါပှၤဆါ, ခဲလၢာ်ခဲဆ့ မ့ၢ်ဒၣ် တၢ်အုၣ်အသး ဘၣ်ဃး ပကစၢ်ယွၤ အတၢ်သူၣ်ကညီၤသးကညီၤ ဒီး အတၢ် သးအိၣ် တဖၣ်လီၤ. ဒီး တၢ်သူၣ်ကညီၤသးကညီၤအံၤ ဆဲးလဲၤဒံးအသးတုၤလၢပစိၤပဆၢကတီၢ်ခဲအံၤလီၤ.
ဘၣ်ဆၣ်, တၢ်တိာ်အဂၤတခါလၢ ယ့ၣ်ရှူးမၤ တၢ်လီၤလးန့ၣ်မ့ၢ်ဝဲ -
လၢလံာ်ယိၤဟၣ် ၂၀း၃၀-၃၁အပူၤ, စီၤယိၤဟၣ်တဲဘၣ်ပှၤလၢ, “မၤသးဒ်န့ၣ်ဒီး တၢ်လီၤလးလၢ အဂုၤအဂၤ လၢအတကွဲးဘၣ်အသးလၢ လံာ်အံၤအပူၤဘၣ်န့ၣ်, ယ့ၣ်ရှူးမၤစ့ၢ်ကီးဝဲအါမံၤ, လၢအပျဲၢ်အဘီၣ်အမဲာ်ညါ လီၤ. ဘၣ်ဆၣ် ဒီး ဒ်သိးသုကနာ်လၢ ယ့ၣ်ရှူးမ့ၢ်ခရံာ်, ယွၤအဖိခွါ, ဒီးသုနာ်တၢ်သတးဒီး, ဒ်သိး သုကန့ၢ်ဘၣ် တၢ်မူလၢ အမံၤဒီး, တၢ်အံၤတဖၣ် ဘၣ်ကွဲးအသးလီၤ.”
ယ့ၣ်ရှူးတဟဲလီၤလၢဟီၣ်ခိၣ်ချၢဒ် ဖိသၣ်လၢ တအိၣ်ဒီးတၢ်မၤစၢၤနီတမံၤဘၣ် အသိး, ဒ်သိး ကမၤဘျါ ပှၤစှၤဂၤ ဧိၤ, ဒီး လုၢ်အီၣ် ပှၤစှၤဂၤ လၢဟါလီၤခီ အဂီၢ်ဧိၤဘၣ်. အဝဲဒၣ်ဟဲလီၤဆူဟီၣ်ခိၣ်ချၢ ဒ်သိး ကဟ့ၣ်ပှၤတၢ်မူလၢ အမံၤ အပူၤလီၤ. ဒီးအဝဲဒၣ်အတၢ်မၤလီၤလးတဖၣ် မ့ၢ်တၢ်ဒုးထိးဘၣ်ပှၤထဲတစဲးဖိ ဘၣ်ဃး တၢ်အိၣ်မူလီၤစိၤ လီၤထီ န့ၣ်မ့ၢ်တၢ်လၢအလီၤဂာ်ဒ်လဲၣ် - တၢ်သူၣ်ဝံၤသးစ့ၤတအိၣ်, တၢ်မၢကဲကုၢ်တအိၣ်, တၢ်ဆူးတၢ်ဆါတအိၣ်, တၢ်မၤဆူးမၤဆါတအိၣ်, ဒီး တၢ်ဖှီၣ်တၢ်ယာ်တအိၣ်ဘၣ်. ကစၢ်ယွၤအသးစီဆှံ အိၣ်ဝဲဒၣ်လၢအလိၤ နီၢ်ကီၢ်လီၤ. အဝဲဒၣ် တဲဘၣ် တၢ်သးခုကစီၣ်ဆူ ပှၤဖှီၣ်ဖိယာ်ဖိအအိၣ်, ဒီး တၢ်သဘျ့ဆူ ပှၤဘၣ်တၢ်စၢဃာ်အဂီၢ်လီၤ. အဝဲ ဒုးထံၣ်ထီၣ်က့ၤပှၤမဲာ်တထံၣ်တၢ်, ဒီးမၤသဘျ့ထီၣ်က့ၤ ပှၤဘၣ်တၢ်ကွၢ်တလီၤအီၤ တဖၣ်လီၤ. တၢ်ဆူးတၢ်ဆါ ဆူ တၢ်အိၣ်ဆူၣ်အိၣ်ချ့, တၢ်စၢဃာ်ဆူ တၢ်သဘျ့, တၢ်ဖှီၣ်တၢ်ယာ်ဆူ တၢ်လၢတၢ်ပှဲၤ, တၢ်ပနီၣ်ခဲလၢာ်အံၤ ဒုးနဲၣ်ပှၤလၢ ယ့ၣ်ရှူးန့ၣ်မ့ၢ်သပှၢ်ကတၢၢ် မ့ၤရှံအၤလီၤ.
တၢ်လၢပကဘၣ်သ့ၣ်ညါလၢလံာ်စီဆှံအပူၤန့ၣ်, “တၢ်ဖှီၣ်တၢ်ယာ်” န့ၣ်တမ့ၢ်ထဲ “နီၢ်ခိတၢ်အိၣ်ယၢၤ” တမံၤဧိၤဘၣ်. လၢဟီၣ်ခိၣ်အတၢ်ထံၣ်န့ၣ် ယ့ၣ်ရှူးအကစၢ်ဒၣ်ဝဲ မ့ၢ်ပှၤဖှီၣ်ဖိယာ်ဖိ လၢတအိၣ်ဒီး အဟံၣ်အဃီ, တၢ်အိၣ်တၢ်ယၢၤ, ဒီးအကစၢ်ဒၣ်ဝဲ အိၣ်ဖျဲၣ်ထီၣ်လၢ တဲကူအပူၤလီၤ. ဘၣ်ဆၣ် ဖဲယ့ၣ်ရှူးစံးလၢ အဟဲဒ်သိး ကဟဲစိာ်တၢ်သးခု ကစီၣ်ဆူ ပှၤဖှီၣ်ဖိယာ်ဖိအအိၣ်န့ၣ်, အဝဲတဲတၢ်အါန့ၢ် နီၢ်ခိ အတၢ်ဖှီၣ်တၢ်ယာ်ဒံးလီၤ.
ဖဲယ့ၣ်ရှူး အတၢ်စံၣ်တဲၤတဲလီၤလၢ ကစၢၢ်ဒီခိၣ်အလိၤန့ၣ်, စံးဝဲ ဖဲ မးသဲ ၅း၃ န့ၣ်ဒ်အံၤ,
“ပှၤလၢအသးဖှီၣ်တဖၣ်န့ၣ် ဘၣ်ဆိၣ်ဂ့ၤဝဲလီၤ. အဂ့ၢ်ဒ်အံၤ, မူခိၣ်အဘီအမုၢ်န့ၣ် မ့ၢ်ပှၤတဖၣ်န့ၣ် အတၢ်လီၤ.”ပှၤဒၢးခၠ်ဖိ အယွၤဂ့ၢ်ပီညါပှၤသ့ပှၤဘၣ် လၢအမ့ၢ် Herman Ridderbos, လၢအလံာ် “ဘီမုၢ်အတၢ်ဟဲ” အပူၤန့ၣ် စံးဝဲဒ်အံၤ,
“ပှၤဖှီၣ်ဖိယာ်ဖိ” န့ၣ်မ့ၢ်ဝဲဒၣ် နီၢ်ခိ ဒီး တၢ်ဘူၣ်တၢ်ဘါ ခံမံၤလၢာ် အဂီၢ်လီၤ. ဘၣ်ဆၣ်, တၢ်ခဲလၢာ်အဖီခိၣ်န့ၣ်, “ပှၤဖှီၣ်ဖိယာ်ဖိ” အခီပညီ မ့ၢ် “ယွၤအပှၤဂီၢ်မုၢ်တံၢ်နီၣ်”, လၢအလီၤဆီန့ၢ် ပှၤလၢအပာ်အတၢ်မုၢ်လၢ်လၢ ဟီၣ်ခိၣ် အံၤအဖီခိၣ်လီၤ.
ယ့ၣ်ရှူးသးအိၣ်ဘၣ် ပှၤ ဖှီၣ်ဖိယာ်ဖိ, ဒီး အဝဲဒၣ်ဟဲလီၤဒ်သိး ကတဲတၢ်သးခုကစီၣ်ဆူ အဝဲသ့ၣ်အအိၣ်, ဘၣ်ဆၣ် အါန့ၢ်ဒံးအဝဲအံၤ, အဝဲဒၣ်ဟဲစိာ် တၢ်သးခုကစီၣ်ဆူ ပှၤလၢအသးဖှီၣ်တဖၣ်အအိၣ်, ပှၤလၢအသ့ၣ်ညါလၢ အလိၣ်ဘၣ်အီၤတဖၣ်, ဆူပှၤအပတီၢ်ခဲလၢာ်အအိၣ်လီၤ. ဆူပှၤလၢအသးဖှီၣ်တဖၣ်အအိၣ်, ယ့ၣ်ရှူး ဟဲစိာ်န့ၢ်အီၤ တၢ်သးခုကစီၣ်လၢအမ့ၢ် တၢ်န့ၢ်သါမူခိၣ်အဘီအမုၢ်န့ၣ်လီၤ.
ပတၢ်အိၣ်မူမ့ၢ်ကီခဲဝဲဘၣ်ဆၣ်, ပမ့ၢ်နာ်ယ့ၣ်ရှူးခရံာ်န့ၣ်, အဝဲဒၣ်ကဟ့ၣ်ပှၤ တၢ်လၢတၢ်ပှဲၤ လၢအမံၤအပူၤလီၤ (ယိၤဟၣ် ၁၀း၁၀). ပတၢ်ခံးတၢ်နၤ ကကဲထီၣ် တၢ်ကပီၤ (ယိၤဟၣ် ၈း၁၂), ပတၢ်သူၣ်အုးသးအုး ကကဲထီၣ် တၢ်သူၣ်ခုသးခု (ယိၤဟၣ် ၁၆း၂၀), ဒီး ပကန့ၢ်သါ မူခိၣ်အဘီအမုၢ်လီၤ. စံးထီၣ်ပတြၢၤယွၤတက့ၢ်. အဝဲဒၣ်မ့ၢ် ပတၢ်မုၢ်လၢ်ဒီး ပတၢ်အုၣ်က့ၤခီၣ်က့ၤလီၤ.
အဝဲအံၤမ့ၢ်သပှၢ်ကတၢၢ် တၢ်သးခုဖးဒိၣ်အကစီၣ်လီၤ.
