ဒီးစံးဘၣ်အီၤ, တၢ်ကတိၤတဖၣ်လၢ ယစံးဘၣ်သုဖဲ ယအိၣ်ဒံးဒီးသု, လၢကယဲၢ် တၢ်ကွဲးအသး လၢ စီၤမိၤရှ့ အတၢ်သိၣ်တၢ်သီအပူၤ, ဒီးဝံသ့ၣ်တဖၣ် အပူၤ, ဒီးလံာ် စံးထီၣ်ပတြၢၤတၢ် အပူၤ, လၢယဂ့ၢ်ယကျိၤန့ၣ်, ဘၣ်လၢထီၣ်ပှဲၤထီၣ် ခဲလၢာ်လီၤ. (လူၤကၣ် ၂၄း၄၄).
နရဲၣ်ကျဲၤတၢ်ဘၣ်ဆၣ် တၢ်တမၤအသး ဒ်နရဲၣ်ကျဲၤတၢ် အသိးဘၣ်န့ၣ် အိၣ်တဘျီဘျီဧါ.
တဘျီတခီၣ် ပဆိမိၣ်လၢ ပကလဲၤဟးလၢ တၢ်လီၢ်အယံၤ ဒီး ပရဲၣ်ကျဲၤကတဲာ်ကတီၤ တၢ်ဒ်သိး ပတၢ်လဲၤကျဲ ကလဲၤအသးဘၣ်ဘျီးဘၣ်ဒါ အဂီၢ်လီၤ. ဘၣ်ဆၣ်, လၢကျဲန့ၣ် တၢ်လဲၤအသး ကစွံကစွဲ အိၣ်ထီၣ်အဃိ တၢ်လၢ ပရဲၣ်ကျဲၤတ့ၢ်အီၤတဖၣ် တလဲၤအသး ဘၣ်ဘျီးဘၣ်ဒါလၢၤဘၣ်န့ၣ် အိၣ်ဝဲလီၤ.
ဖဲပှၤကညီ တဖၣ် ရဲၣ်ကျဲၤတၢ်န့ၣ်, တလဲၤအသးဘၣ်ဘျီးဘၣ်ဒါ ကိးဘျီဒဲးဘၣ်. ပမ့ၢ်စိာ်လံာ်နဲၣ်ကျဲလၢ ပစုလိၤ ဒၣ်လဲာ် တလဲၤအသးဘၣ်ဘျီးဘၣ်ဒါဘၣ်. ဘၣ်ဆၣ်, ဖဲကစၢ်ယွၤ ရဲၣ်ကျဲၤတ့ၢ်တၢ်န့ၣ်, အတၢ်တိာ်တဖၣ် လၢပှဲၤဝဲ ထီဘိ, ဒီး အတၢ်ဖံးတၢ်မၤအစၢတဖၣ် လီၤကမၢကမၣ်ထီဘိလီၤ.
ကစၢ်ယွၤအတၢ်ရဲၣ်တၢ်ကျဲၤ အဒိၣ်ကတၢၢ်လၢ တၢ်စံၣ်စိၤတဲစိၤအပူၤန့ၣ် မ့ၢ်ဝဲ တၢ်ဆှၢလီၤ ပှၤအုၣ်က့ၤခီၣ်က့ၤတၢ်, မ့ၤရှံအၤ, လၢအကအုၣ်က့ၤခီၣ်က့ၤပှၤလၢ ပတၢ်ဒဲးဘး ဒီး မၤဘၣ်လိာ်က့ၤပှၤဒီး အီၤန့ၣ် ပသ့ၣ်ညါကိးဂၤဒဲးလီၤ. ဒီးအဝဲဟ့ၣ်လီၤပှၤ အလံာ်နဲၣ်ကျဲ - အကလုၢ်ကထါ - လၢကဒုးနဲၣ်ပှၤကျဲလီၤ.
ပှၤအါဂၤလၢ ယ့ၣ်ရှူးအစိၤတဖၣ် ကွၢ်လၢ် မ့ၤရှံအၤ အကျဲလီၤ. ပှၤအါတက့ၢ် ဆိကမိၣ်ဝဲလၢ မ့ၤရှံအၤန့ၣ် ကဟဲ လီၤဒီး တၢ်စိတၢ်ကမီၤဖးဒိၣ်, တြူာ်ကွံာ်ပှၤရိမ့ၤဖိတဖၣ်, ဒီးဒုးဂဲၤထၢၣ်က့ၤပှၤယူဒၤဖိတဖၣ် ခီဖျိ သုးအတၢ်မၤနၢၤ လၢအလီၤဘီလီၤမုၢ်လီၤ. ဘၣ်ဆၣ် တၢ်အံၤ တမ့ၢ်ဒ် လံာ်နဲၣ်ကျဲ အသိးဘၣ်.
လၢယူဒၤအတၢ်လီၤစၢၤလီၤသွဲၣ်အပူၤန့ၣ်, ဧ့ၤဘြံၤ လံာ်စီဆှံ (လၢပကိးအီၤလၢ လံာ်စီဆှံအလီၢ်လံၤတကတြူၢ်) အံၤ ဘၣ်တၢ်နီၤဖးလီၤအီၤ သၢခါ, လၢအမ့ၢ် တၢ်သိၣ်တၢ်သီ (လံာ်စီဆှံအခီၣ်ထံးကတၢၢ်ယဲၢ်ဘ့ၣ်, ဘၣ်တၢ်သ့ၣ်ညါ အီၤလၢ ထိရၤ မ့တမ့ၢ် ဖဲထထၠူး), ဝံတဖၣ် (လံာ်ဝံတဖၣ်), ဒီး တၢ်ကွဲးတဖၣ် (လၢအပၣ်ဃုာ်ဒီး လံာ်ထါစံးထီၣ် ပတြၢၤ) လီၤ. စးထီၣ်လၢအခီၣ်ထံး တုၤလၢအကတၢၢ် လံာ်တဖၣ်အံၤ တဲဝဲလီၤတံၢ်လီၤဆဲးဘၣ်ဃး ကစၢ်ယွၤ အတၢ်သုးတၢ်ကျဲၤလၢ တၢ်အုၣ်က့ၤခီၣ်က့ၤအဂီၢ်, ဒီးသိၣ်လိဝဲလၢ ကစၢ်ယွၤအတၢ်သုးတၢ်ကျဲၤခဲလၢာ် ကဘၣ်လၢ ထီၣ်ပှဲၤထီၣ်ဝဲ ခဲလၢာ်လီၤ.
လၢတၢ်န့ၣ်အဃိ, ဖဲယ့ၣ်ရှူး လီၣ်ဖျါထီၣ်အသးဆူ အပျဲၢ်အဘီၣ်အမဲာ်ညါ ဖဲအဂဲၤထၢၣ်သမူထီၣ်က့ၤဝံၤန့ၣ်, စံးဘၣ် အဝဲသ့ၣ် -
ဒီးစံးဘၣ်အီၤ, တၢ်ကတိၤတဖၣ်လၢ ယစံးဘၣ်သုဖဲ ယအိၣ်ဒံးဒီးသု, လၢကယဲၢ် တၢ်ကွဲးအသး လၢ စီၤမိၤရှ့ အတၢ်သိၣ်တၢ်သီအပူၤ, ဒီးဝံသ့ၣ်တဖၣ် အပူၤ, ဒီးလံာ် စံးထီၣ်ပတြၢၤတၢ် အပူၤ, လၢယဂ့ၢ်ယကျိၤန့ၣ်, ဘၣ်လၢထီၣ်ပှဲၤထီၣ် ခဲလၢာ်လီၤ. (လူၤကၣ် ၂၄း၄၄).
တၢ်ခဲလၢာ်ကဘၣ်လၢထီၣ်ပှဲၤထီၣ်ဝဲလီၤ. တၢ်လၢပတဆၢမုၢ်လၢ်ဒၣ်လဲာ် ကဘၣ်လၢထီၣ်ပှဲၤထီၣ်ဝဲလီၤ.
ပှၤယူဒၤဖိလၢ ယ့ၣ်ရှူးအစိၤတဖၣ် တဆၢမုၢ်လၢ်လၢ မ့ၤရှံအၤန့ၣ် ကဟဲအိၣ်ဖျဲၣ်ထီၣ်ဝဲလၢ ပှၤဖှီၣ်ဖိ, ပိာ်မုၣ်လၢ အတဖျီဘၣ်သးတဂၤ ဒီး ကဘၣ်တၢ်ပာ်လီၤအီၤလၢ ကျီၢ်အီၣ်ဆၣ်လီၢ် အခွးပူၤ န့ၣ်ဘၣ်. အဝဲသ့ၣ်တမုၢ်လၢ်လၢ မ့ၤရှံအၤန့ၣ် ကဘၣ်တၢ်ပျၤထီအီၤလၢ ထူၣ်စုညါအလိၤ ဒ်တမျာ်တဂၤအသိး, ဒီး ဘၣ်တၢ်ခူၣ်လီၤအီၤလၢ တၢ်သွၣ် ခိၣ်အပူၤဘၣ်. အဝဲသ့ၣ်တမုၢ်လၢ်လၢ မ့ၤရှံအၤကဂဲၤဆၢထၢၣ်က့ၤလၢတၢ်သံဘၣ်. ဘၣ်ဆၣ်, ယ့ၣ်ရှူးအတၢ်အိၣ်မူ, အတၢ်သံ ဒီး အတၢ်ဂဲၤထၢၣ်သမူထီၣ်က့ၤတဖၣ် ဝံတဖၣ်တဲဆိတ့ၢ်လၢ အဂ့ၢ် ဖးယံာ်တချုးလၢအဟဲဒံးဒၣ်လဲာ် လီၤ.
အနီၢ်ကီၢ်န့ၣ်, ဖဲမူခိၣ်ကလူး ဘိးဘၣ်ရၤလီၤဝဲ ဆူပှၤကွၢ်သိတဖၣ် အအိၣ်, “အဂ့ၢ်ဒ်အံၤ, အအံၤတနံၤအံၤ, ပှၤလၢ အအုၣ်က့ၤခီၣ်က့ၤတၢ်တဂၤန့ၣ်, အိၣ်ဖျဲၣ်ဝဲလၢ သုဂီၢ် လၢစီၤဒၤဝံး အဝ့ၢ်ပူၤလံ.” န့ၣ်အဲၣ်ဒိးတဲဝဲလၢ အမ့ၢ် ကစၢ် ယွၤအတၢ်သုးတၢ်ကျဲၤ လၢ မ့ၤရှံအၤ ကဟဲ ခီဖျိ စီၤပၤဒၤဝံး အစၢၤအသွဲၣ်, ဒီး ကဘၣ်အိၣ်ဖျဲၣ်ထီၣ်လၢ ဝ့ၢ်ဘ့ၤသလ့ဃ့ၣ် လီၤ.
ဒ်ဝံမံကၤ ကွဲးတ့ၢ်ဝဲအသိး -
ဒီးနဲဒၣ် ဘ့ၤသလ့ဃ့ၣ် အ့ဖရးသးဧၢ, နဆံးလၢယူဒၤ အကထိ တဖၣ် အကျါဘၣ်ဆၣ်ဒီး, ပှၤကဟဲထီၣ်လၢ နပူၤဆူ ယအိၣ်လၢ အကကဲထီၣ်ပှၤပၢတၢ်လၢ အံၣ်စရ့လး အဖီခိၣ်လီၤ. ပှၤတဂၤန့ၣ် ဟဲဝဲလၢပျၢၤလံၤလံၤ, လၢမုၢ်နံၤလၢ တၢ်လီၤထူ လီၤယိာ်န့ၣ်လီၤ. (မံကၤ ၅း၂).
အဃိ, တၢ်လီၢ်လၢယ့ၣ်ရှူးကဘၣ်ဟဲအိၣ်ဖျဲၣ်ထီၣ်န့ၣ် တကြၢးမၤကမၢကမၣ် အဝဲသ့ၣ်နီတမံၤဘၣ်. ဘၣ်ဆၣ် အဝဲသ့ၣ်ကမၢကမၣ်ဝဲလီၤ. ဒီး ပှၤဂီၢ်မုၢ်လၢ ယ့ၣ်ရှူးအစိၤတဖၣ် ကိးယ့ၣ်ရှူးလၢ “စီၤဒၤဝံးအဖိခွါ” န့ၣ် တကြၢး မၤကမၢကမၣ်အဝဲသ့ၣ် စ့ၢ်ကီးဘၣ်. ဘၣ်ဆၣ်, တၢ်ခံမံၤလၢာ်အံၤ မၤကမၢကမၣ်အဝဲသ့ၣ် ဒီး မၤသးဒိၣ်အဝဲ သ့ၣ်လီၤ.
တကးဒံးဘၣ်, တၢ်ကွၢ်တလီၤ ဒီး တၢ်တူၢ်ဘၣ်ခီၣ်ဘၣ် လၢယ့ၣ်ရှူး ဘၣ်တူၢ်ဝဲတဖၣ်, တကြၢၤမၤကမၢကမၣ် အဝဲသ့ၣ်စ့ၢ်ကီးဘၣ်. တၢ်ခဲလၢာ်န့ၣ် အိၣ်ကွဲးလီၤအသးလၢ လံာ်စီဆှံအပူၤလီၤ.
လၢလံာ်ဝံယရှါယၤအပူၤ, ပကဖးဘၣ်တၢ်ကွဲးဘၣ်ဃး မ့ၤရှံအၤဒ်အံၤ -
ပှၤကညီမၤတရီတပါ, ဒီးလဲၤသဒၣ်အီၤလီၤ. မ့ၢ်ဝဲလၢ ပှၤတၢ်သူၣ်အုးသးအုး, ဒီးသ့ၣ်ညါ တၢ်နးတၢ်ဖှီၣ်, ဒ် ပှၤတဂၤလၢ ပှၤမၤဘၢအမဲာ် လၢအီၤအသိး, ပှၤမၤအီၤ တရီတပါ, ဒီး ပတပာ်ဘၣ် အလီၢ်ဘၣ်. (ယရှါယၤ ၅၃း၃).
ဖဲပမၤလၤကပီၤ နွံတချုးခရံာ်အိၣ်ဖျဲၣ်န့ၣ်, ပမၤလၤကပီၤ စိၤအသီတစိၤအတၢ်စးထီၣ် လၢအမ့ၢ် တၢ်မၤလၢပှဲၤ ကစၢ်ယွၤအတၢ်သုးတၢ်ကျဲၤတဖၣ်န့ၣ်လီၤ. စးထီၣ်အသးလၢ ယ့ၣ်ရှူးအတၢ်ဟဲလီၤ ဒီး အတၢ်အိၣ်မူ, အတၢ်သံ, အတၢ်ဂဲၤထၢၣ်သမူထီၣ်က့ၤ, ဒီးကကတၢၢ် ဝဲဖဲ အတၢ်ဟဲက့ၤလီၤခံဘျီတဘျီ ဃုာ်ဒီး တၢ်စိတၢ်ကမီၤ တၢ်လၤတၢ် ကပီၤ လၢကတြူာ်ကွံာ် မဲာ်ထံတဖၣ်လၢ ပမဲာ်ချံအပူၤလီၤ.
ဒ်ဝံယရှါယၤကွဲးဝဲအသိး -
အဂ့ၢ်ဒ်အံၤ, ဖိသၣ်တဂၤ အိၣ်ဖျဲၣ်လၢပဂီၢ်, တၢ်ဟ့ၣ်လီၤပှၤလၢ ဖိခွါတဂၤလီၤ. ဒီး တၢ်စံၣ်ညီၣ်ကအိၣ်လၢ အဖံဘၣ်ခိၣ်, ဒီးတၢ်ကကိးအမံၤလၢ တၢ်လီၤလး, ပှၤကူၣ်လိာ်တဂၤ, တၢ်ဆူၣ်ကစၢ်, အစိၤစိၤအဃၣ်ဃၣ် အပၢ်, တၢ်ဃူတၢ်ဖိး အပဒိၣ်ဖးဒိၣ်တဂၤလီၤ. ဒီးအဘီအမုၢ်န့ၣ် အကတၢၢ်တအိၣ်ဘၣ်. လၢစီၤဒၤဝံး အလီၢ်ပစိာ် အဖီခိၣ်, ဒီးလၢ အဘီအမုၢ်အဖီခိၣ် ဒ်သိး အကမၤအီၤလၢ အဂၢၢ်အကျၢၤ, ဒီးမၤအီၤ ခၢၣ်သနၢၢ် လၢတၢ်စံၣ်ညီၣ်, ဒီး တၢ်တီတၢ်လိၤ, တုၤအံၤဆူညါ လီၤစိၤလီၤထီလီၤ. တၢ်သုးမုၢ်ဂီၢ်မုၢ် အယွၤ အသးဆူၣ်ကမၤ တၢ်န့ၣ်လီၤ. (ယရှါယၤ ၉း၆-၇).
ကစၢ်ယွၤအတၢ်သုးတၢ်ကျဲၤတဖၣ် မ့ၢ်တၢ်လၢအဂ့ၤကတၢၢ်, ဒီး တဟးဂီၤနီတဘျီဘၣ်. တနံၤအံၤ, ဖဲပအိၣ်ခိး မၤလၤကပီၤ ယ့ၣ်ရှူးအတၢ်ဟဲအိၣ်ဖျဲၣ်န့ၣ်, ပသ့ၣ်ညါသ့သပှၢ်ကတၢၢ်လၢ ပမၤလၤကပီၤ ပှၤအုၣ်က့ၤခီၣ်က့ၤ ဟီၣ်ခိၣ်, လၢအမ့ၢ်မ့ၤရှံအၤ, စီၤဒၤဝံးအဖိခွါလၢ အလီၤလိၢ်လီၤလးတဂၤ အတၢ်ဟဲအိၣ်ဖျဲၣ် လီၤ.
တနံၤအံၤ, လၢစီၤဒၤဝံးအဝ့ၢ်ပူၤ ပှၤအုၣ်က့ၤခီၣ်က့ၤတၢ်တဂၤ အိၣ်ဖျဲၣ်ဝဲလၢ နဂီၢ်လံ.
