ပှၤအုၣ်က့ၤခီၣ်က့ၤတၢ်တဂၤအိၣ်ဖျဲၣ်ဝဲလံ

ဒီးပထံၣ်လံ, ဒီးပအုၣ်ပသးလၢ ပၢ်မၢလီၤ အဖိခွါ လၢ တၢ်အုၣ်က့ၤခီၣ်က့ၤ ဟီၣ်ခိၣ် အဂီၢ်လံ. (၁ ယိၤဟၣ် ၄း၁၄).

ယ့ၣ်ရှူးဟဲလီၤဆူဟီၣ်ခိၣ်လၢ အတူၢ်ဘၣ် တၢ်တတၢာ်တနါလၢ အနံၣ်လၢအကထိတဖၣ်လံ. ဘၣ်ဆၣ် ဖဲမူခိၣ်ကလူး တဲဘၣ် ပှၤကွၢ်သိတဖၣ်လၢ ပှၤအုၣ်က့ၤခီၣ်က့ၤတၢ်တဂၤ အိၣ်ဖျဲၣ်ဝဲလံန့ၣ်, ကစၢ်ယွၤဟ့ၣ်လီၤ တၢ်တမံၤ လၢအဂ့ၤဒိၣ်န့ၢ် တၢ်တတၢာ်တနါ တဖၣ်ဒံးလီၤ. ယ့ၣ်ရှူးမ့ၢ် တၢ်မုၢ်လၢ် အတၢ်ပနီၣ်တမံၤလီၤ. အဝဲမ့ၢ် ပှၤအုၣ်က့ၤခီၣ်က့ၤဟီၣ်ခိၣ်တဂၤလီၤ.

 
မ့ၤရှံအၤ အတၢ်ဟဲလီၤ အံၤ ဘၣ်တၢ်စံးပာ်ဆိအီၤ လၢလံာ်စီဆှံအလီၢ်လံၤအပူၤ စးထီၣ်လၢ စီၤအၤဒၣ်နီၢ်အံၣ်အု အစိၤလၢ ဧ့ၤဒ့ၣ်တၢ်သၣ်လီၢ်အပူၤလံ. ဖဲန့ၣ်အခါ, ကစၢ်ယွၤမ့ၢ်မၤလၢာ်ကွံာ်ပှၤကညီန့ၣ် မၤဝဲသ့, ဘၣ်ဆၣ် အဝဲဒၣ် တအဲၣ်ဒိးလၢ ပအိၣ်ဒၣ်လၢ တၢ်ဒဲးဘးအပူၤဘၣ်. အဝဲဒၣ်အဲၣ်ပှၤဒိၣ်မး. အဃိ, အဝဲဒၣ်ဟ့ၣ်ပှၤ အဖိခွါ ယ့ၣ်ရှူးခရံာ် ဒ်သိးကကဲထီၣ် ပှၤအုၣ်က့ၤခီၣ်က့ၤပှၤ အဂီၢ်လီၤ.

 
တၢ်အုၣ်က့ၤခီၣ်က့ၤအခီပညီမ့ၢ်ဝဲ တၢ်ထုးထီၣ်ကွံာ်ပှၤလၢ တၢ်အၢတၢ်သီအတၢ်သအုးသပှီၤ အပူၤ ဒီး ကစၢ်ယွၤ အတၢ်စံၣ်ညီၣ်တၢ်ဒဲးဘး အပူၤလီၤ.

 
ဒ်ခရံာ်ဖိအသိး, ပအဲၣ်ဒိးစံးလၢ ပဘၣ်တၢ်အုၣ်က့ၤခီၣ်က့ၤပှၤလံ, ဘၣ်ဆၣ် တဘျီတခီၣ် ပတသ့ၣ်ညါ တၢ်မ့ၢ်တၢ်တီ လၢ ပဘၣ်တၢ်အုၣ်က့ၤခီၣ်က့ၤပှၤလၢ ပနုၤအဃိလဲၣ်. ယ့ၣ်ရှူးတသံလၢ ထူၣ်စုညါ အလိၤ လၢ အကဒုး မၤဂ့ၤပှၤ ဒီး မၤမုာ်လၤသးခုပှၤဘၣ်. အဝဲသံလၢ ကထုးထီၣ်ကွံာ်ပှၤလၢ တၢ်အၢတၢ်သီ အတၢ်သအုးသပှီၤ အပူၤဒီး ကစၢ်ယွၤ အတၢ်စံၣ်ညီၣ်အပူၤအဂီၢ်လီၤ.

 
ရိမ့ၤ ၃း၂၃ စံးဘၣ်ပှၤလၢ, “အဂ့ၢ်ဒ်အံၤ, ပှၤခဲလၢာ်မၤတၢ်ဒဲးဘးဒီး တချုးန့ၢ်ဘၣ် ယွၤအလၤအကပီၤဘၣ်.” ဒီး ယရှါယၤ ၅၉း၂ တဲပှၤ, “မ့မ့ၢ် သုတၢ်အၢတဖၣ် မၤလီၤဖး သုလၢ သုကစၢ်, ဒီး သုတၢ်ဒဲးဘး ဒုးအိၣ်တဒၢ အမဲာ်လၢ သုလၢ အတနၢ်ဟူဘၣ် တၢ်ဘၣ်လီၤ.”

 
ဖဲပအိၣ်ဒီးတၢ်ဒဲးဘးအခါ, ပကဲထီၣ် တၢ်အၢတၢ်သီ အတၢ်သအုးသပှီၤအကုၢ်, တၢ်စိတၢ်ကမီၤလၢအအၢအသီ လၢ ပမၤနၢၤအီၤတသ့ဘၣ်လီၤ. အဝဲဒၣ်ကဲထီၣ်ပကစၢ်လီၤ. ပကြၢးဒိးန့ၢ် ကစၢ်ယွၤအတၢ်စံၣ်ညီၣ်လၢ အတီအလိၤလီၤ. လၢပကစၢ်ဒၣ်ပဝဲပဂံၢ်ပဘါန့ၣ် ပဟးဆှဲးအီၤတသ့ဘၣ်. လၢပကစၢ်ဒၣ်ပဝဲန့ၣ် ပမၤစၢၤလီၤ ပသး တသ့ဘၣ်.

 
ဘၣ်ဆၣ် ကစၢ်ယွၤမၤဝဲသ့လီၤ.

 
စီၤယိၤဟၣ်တဲဝဲဒၣ်ဒ်အံၤ,

ဒီးပထံၣ်လံ, ဒီးပအုၣ်ပသးလၢ ပၢ်မၢလီၤ အဖိခွါ လၢ တၢ်အုၣ်က့ၤခီၣ်က့ၤ ဟီၣ်ခိၣ် အဂီၢ်လံ. (၁ယိၤဟၣ် ၄း၁၄).

ကစၢ်ယွၤအတၢ်အဲၣ်လၢ ပဂံၢ်ဒွးအီၤတသ့ဘၣ်အံၤ ဆီၣ်ထွဲအီၤလၢ ကဆှၢလီၤအဖိခွါထဲတဂၤဧိၤ လၢကအိၣ်ဖျဲၣ် ထီၣ်လၢ ဟီၣ်ခိၣ်လၢ အလၢပှဲၤဒီး တၢ်ဒဲးဘးသအုၣ်သပှီၤ အပူၤလီၤ. အဖိခွါ အိၣ်မူတၢ်အိၣ်မူလၢ အလၢအပှဲၤ - ထီဒါ တၢ်လ့ပစီ, မၤဘျါက့ၤပှၤသူၣ်ကၢ်သးလီၤ, ဘိးဘၣ်ရၤလီၤတၢ်သဘျ့, တူၢ်ဘၣ် ပှၤလၢအအဲၣ်ဝဲတဖၣ် အတၢ်သမၢကွံာ်အီၤ, ဒီးသံလၢပဂီၢ်ဒ်သိး ပတၢ်ရ့လိာ်ဘၣ်ထွဲဒီးယွၤ ကအိၣ်ထီၣ်က့ၤအဂီၢ်လီၤ. အဝဲမၤနၢၤကွံာ် တၢ်အၢတၢ်သီ အတၢ်သအုးသပှီၤ ဒီးဟံးန့ၢ် ကစၢ်ယွၤအတၢ်စံၣ်ညီၣ် လၢအဖီခိၣ်လီၤ. အဝဲအံၤမ့ၢ် တၢ်အုၣ်က့ၤ ခီၣ်က့ၤလၢ ပဒိးန့ၢ်အီၤလီၤ.

 
အဃိ, တနံၤအံၤ ပကသ့ၣ်နီၣ်ထီၣ် မူခိၣ်ကလူး စံးဘၣ် ပှၤကွၢ်သိတဖၣ်လၢ, “ပျံၤတၢ်တဂ့ၤ” တက့ၢ်. တၢ်သးခုဖးဒိၣ် အကစီၣ်အံၤ လၢပဝဲကိးဂၤဒဲးအဂီၢ်လီၤ. ဒ်ကစၢ်ယွၤရဲၣ်ကျဲၤတ့ၢ်လံအသိး, ပှၤအုၣ်က့ၤခီၣ်က့ၤ တၢ်တဂၤ အိၣ်ဖျဲၣ်လၢသုဂီၢ်လံ. အဝဲဒၣ်မ့ၢ် ခရံာ်ကစၢ်န့ၣ်လီၤ.