အဂ့ၢ်ဒ်အံၤ, ယမဲာ်ထံၣ်ဘၣ်နတၢ်အုၣ်က့ၤခီၣ်က့ၤ, လၢနကတဲာ်ကတီၤလၢ ပှၤဂီၢ်မုၢ်တဖၣ်ခဲလၢာ် အမဲာ်ညါ, တၢ်ကပီၤလၢ တၢ်မၤကပီၤထီၣ် ပှၤကလုာ်တဖၣ်အဂီၢ်, ဒီးနပှၤဂီၢ်မုၢ် အံၣ်စရ့လး အလၤအကပီၤလီၤ. (လူၤကၣ် ၂း၃၀-၃၂)
ပှၤလၢနသ့ၣ်ညါအကျါ လၢအတလီၤဂာ်ဒီးနၤမ့ၢ်ဂ့ၤ, လၢအတတဲနကျိာ်ဘၣ်မ့ၢ်ဂ့ၤ, လၢအတမ့ၢ်တၢ်ဘူၣ်တၢ်ဘါ တမံၤဃီဒီးနၤမ့ၢ်ဂ့ၤ, လၢအထံရူၢ်ကီၢ်သဲးအတၢ်ထံၣ်လီၤဆီဒီးနၤ မ့ၢ်ဂ့ၤ မ့ၢ်အအိၣ်တဂၤဂၤဧါ. ဖဲယ့ၣ်ရှူးအစိၤ, အဝဲဒၣ် မၤကမၢကမၣ် ဒီး မၤသးဒိၣ်ဘၣ် ပှၤယူဒၤဖိတဖၣ်အါဂၤ, မ့ၢ်လၢ ဖဲအဝဲဟးတဲတၢ်သးခုကစီၣ် အဆၢ ကတီၢ် စံးဝဲလီၤတံၢ်လီၤဆဲးလၢ အဝဲဒၣ်တဟဲဝဲထဲလၢ ပှၤယူဒၤဖိ အဂီၢ် ဧိၤဘၣ်. အဝဲဒၣ်ဟဲလၢ ပှၤကိးဂၤဒဲးအဂီၢ်လီၤ.
ယ့ၣ်ရှူးအိၣ်ဖျဲၣ်ဝံၤအလီၢ်ခံ, နီၢ်မၤရံ ဒီးစီၤယိၤသး လဲၤစိာ်အီၤဆူ ယရူၤရှလ့ၣ်တၢ်လုၢ်ဟံၣ်ပူၤ ဒ်ယူဒၤအတၢ်သိၣ် တၢ်သီအိၣ်ဝဲအသိးလီၤ. “ပှၤအတီအလိၤဒီးယူးယီၣ်ယွၤ” (လူၤကၣ် ၂း၂၅) လၢအမံၤမ့ၢ် စီၤစူၤမ့းအိၣ်, လၢသးစီဆှံဒုးနဲၣ်အီၤလၢ အတချုးထံၣ်ဒံးဘၣ် တၢ်သံဒီး, ကထံၣ်ဘၣ်ကစၢ်ခရံာ် တဂၤန့ၣ် (လူၤကၣ် ၂း၂၆), စိာ်ထီၣ်ယ့ၣ်ရှူးလၢ အစုဒုၣ်လိၤ ဒီး စံးကတိၤတၢ်ကတိၤလၢ အမၤကမၢကမၣ် ပှၤယူဒၤဖိလၢ စိၤဆၢကတီၢ် အခါဖဲန့ၣ်လီၤ. စီၤစူၤမ့းအိၣ် ကိးယ့ၣ်ရှူးလၢ “တၢ်ကပီၤလၢ တၢ်မၤကပီၤထီၣ် ပှၤကလုာ်တဖၣ်အဂီၢ်” လီၤ (လူၤကၣ် ၂း၃၂).
လၢပဂီၢ်ဒု တဖျါလီၤသးအုးနီတမံၤဘၣ်. မ့ၢ်လၢပဝဲဒၣ်တဖၣ် ပမ့ၢ်ပှၤကလုာ်တဖၣ် (ပှၤလၢအတဟဲလီၤစၢၤလၢ ပှၤယူဒၤဖိတဖၣ်ဘၣ်) အဃိလီၤ. ဘၣ်ဆၣ်, ဖဲယ့ၣ်ရှူးအိၣ်ဖျဲၣ်အဆၢကတီၢ် ပှၤယူဒၤဖိအါတက့ၢ် တအဲၣ်ဒိး မၤဘၣ်ထွဲအသးဒီး ပှၤကလုာ်ဂၤတဖၣ်ဘၣ်. အနီၢ်ကီၢ်န့ၣ်, ပှၤယူဒၤဖိလၢအလူၤပိာ်ထွဲ ယူဒၤတၢ်ဘါတဖၣ် အါတက့ၢ် တကွၢ်ဝဲဒၣ် ပှၤကလုာ်ဂၤတဖၣ် ဒၣ်လဲာ်ဘၣ်. တအီၣ်သကိးတၢ်ဒီးအဝဲသ့ၣ်တဖၣ်ဘၣ် အမဲာ်ညါ, တအဲၣ်ဒိးဟ့ၣ်အဝဲသ့ၣ်လၢ တၢ်အုၣ်က့ၤခီၣ်က့ၤဘၣ်. မ့ၢ်လၢ, ပှၤကလုာ်ဂၤတဖၣ် ဘၣ်တၢ်သ့ၣ်ညါအီၤလၢ အမ့ၢ် ပှၤဘါတၢ်ဂီၤတၢ်ဖီၣ်, လၢတအိၣ်ဒီး တၢ်သ့ၣ်ညါ, တၢ်ရ့လိာ်ဘၣ်ထွဲ ဒီး တၢ်ဆိကမိၣ်လၢအဂ့ၤတဖၣ်ဘၣ်. အဃိ, လၢပှၤယူဒၤဖိတဖၣ်အဂီၢ် မ့တမ့ၢ်လၢတၢ်ဟ့ၣ်မၤစၢၤ တဆံးတက့ၢ် ဘၣ်န့ၣ်, တၢ်မၤသကိးတၢ်ဒီး ပှၤကလုာ်ဂၤ တဖၣ်တအိၣ်ဘၣ်.
စီၤပ့းတရူး လၢအပိာ်ကစၢ်ခရံာ်အခံသၢနံၣ်အတီၢ်ပူၤတဂၤ ဒၣ်လဲာ် အသးဒ့ဒီခီဖျိ ပှၤယူဒၤဖိလၢအသ့လံာ် တၢ်သိၣ် တၢ်သီတဖၣ် အဃိ ဒ်သိးအသုတမၤဃုာ်တၢ်ဒီး ပှၤကလုာ်ဂၤတဖၣ်အဂီၢ်လီၤ. ဘၣ်ဆၣ်, စီၤပီလူး တခီ တမ့ၢ်ဒ်န့ၣ်အသိးဘၣ်. စီၤပီလူးကွဲးဝဲဒ်အံၤ,
ဘၣ်ဆၣ်ဒီး တုၤစီၤပ့းတရူး ဟဲဆူအၣ်တံၤအီာ်ဒီး, ယဂ့ၢ်လိာ်ဘှီလိာ်အီၤလၢ အမဲာ်သၣ်ပူၤလီၤ. အဂ့ၢ်ဒ်အံၤ, ပာ် တၢ်ကမၣ်လၢ အလိၤအလီၢ်အိၣ်လီၤ. အဂ့ၢ်ဒ်အံၤ, တချုးပှၤတနီၤနီၤ ဟဲလၢ စီၤယၤကိာ်အအိၣ်ဒီး, အဝဲဒၣ် အီၣ်ဃုာ်တၢ်ဒီး ပှၤကလုာ်တဖၣ်လီၤ. မ့မ့ၢ် တုၤအဝဲသ့ၣ် ဟဲတုၤဒီး, ပျံၤပှၤဒိးတၢ်ကူးတရံး ဒီးဂုၤက့ၤအသး, ဒီး မၤလီၤဖးအသးလီၤ. ဒီပှၤယူဒၤဖိ အဂၤတဖၣ် လီဃုာ်တၢ်စ့ၢ်ကီးဒီးအီၤ တုၤ စီၤဘၢ်နါဘၤဒၣ်လဲာ် လဲၤဃုာ်ဒီးအီၤ လၢအလီတၢ်အပူၤလီၤ. (ကလၤတံ ၂း၁၁-၁၃).
ခီဖိလၢတံၤသကိးတဖၣ်အတၢ်ဆီၣ်သနံးအဃိ, စီၤပ့းတရူးဒီး စီၤဘၢ်နါဘၤဒၣ်လဲာ် သမၢတၢ်မ့ၢ်တၢ်တီလၢ ယ့ၣ်ရှူး ဟဲလၢပှၤကိးကလုာ်ဒဲးအဂီၢ်လီၤ. ဘၣ်ဆၣ်, အဝဲသ့ၣ်ကြၢးသ့ၣ်ညါ ဒိၣ်န့ၢ်အန့ၣ်တက့ၢ်လီၤ. ကစၢ်ယွၤ အတၢ်အုၣ်က့ၤခီၣ်က့ၤ လၢပှၤခဲလၢာ်အဂီၢ်န့ၣ် တမ့ၢ်တၢ်အသီတခါဘၣ်.
တချုးခရံာ်အိၣ်ဖျဲၣ်ဒံးဘၣ်အနံၣ်ခံကထိဃၣ်ဃၣ်န့ၣ်, ကစၢ်ယွၤတဲဘၣ်စီၤအၤဘြၤဟၣ်, “မ့ၢ်လၢနဒိကနၣ် ယကလုၢ် အဃိဒီး, ကယဲၢ်ပှၤကညီလၢ ဟီၣ်ခိၣ်ချၢကဘၣ် တၢ်ဆိၣ်ဂ့ၤလၢ နချံနသၣ် အပူၤလီၤ.” (၁မိၤရှ့ ၂၂း၁၈). “ပှၤကိးကလုာ်ဒဲး” ပၣ်ဃုာ်ဒီး ပှၤကလုာ်ဂၤတဖၣ်လီၤ.
ဒီးဖဲ မူခိၣ်ကလူးဘိးဘၣ်ရၤလီၤ ဘၣ်ဃး ယ့ၣ်ရှူးအတၢ်အိၣ်ဖျဲၣ်ထီၣ် ဆူပှၤကွၢ်သိတဖၣ်အအိၣ် လၢလံာ်လူၤကၣ် အဆၢဒိၣ် ၂ အပူၤန့ၣ်, မူခိၣ်ကလူးစံးဝဲ, “တၢ်သးခုဖးဒိၣ်အကစီၣ်" လၢ "ပှၤဂီၢ်မုၢ်ခဲလၢာ်အဂီၢ်” လီၤ. တမ့ၢ်ထဲဒၣ် လၢ ပှၤလၢအလီၤဂာ်ဒီး အဝဲသ့ၣ်, ကတိၤတၢ်ကတိၤတခါဃီဒီးအဝဲသ့ၣ်, ဒီးကူကၤ တၢ်ကူတၢ်ကၤတမံၤဃီဒီး အဝဲသ့ၣ် အဂီၢ်ဘၣ်. တမ့ၢ်ထဲဒၣ် ပှၤကဲဒိၣ် ပှၤလၢအအိၣ်ဒီး တၢ်စိတၢ်ကမီၤအဂီၢ်, ဒီး ပှၤအဂ့ၤအဂီၢ်ဧိၤဘၣ်.
အဃိ, ဘၣ်မနုၤတၢ်အံၤဘၣ်ကဲထီၣ်အသးလဲၣ်. မ့ၢ်လၢ, ယ့ၣ်ရှူးအကစၢ်ဒၣ်ဝဲစံးဝဲ,
တမ့ၢ်ဘၣ် ယဟဲကိးက့ၤ ပှၤအတီအလိၤဘၣ်, မ့ၢ်ပှၤတၢ်ဒဲးဘးဖိ, လၢတၢ်ပီၢ်ယၢ်လီၤက့ၤ အသး အဂ့ၢ်လီၤ. (လူၤကၣ် ၅း၃၂).
ပမ့ၢ်ပှၤတၢ်ဒဲးဘးဖိကိးဂၤဒဲးလီၤ. ယမ့ၢ်ပှၤတၢ်ဒဲးဘးဖိ, နမ့ၢ်ပှၤတၢ်ဒဲးဘးဖိလီၤ. ဒ်စီၤပီလူးကွဲးဝဲအသိး,
ဒ်တၢ်ကွဲးအသးအသိးန့ၣ်, ပှၤအတီအလိၤ တအိၣ်ဘၣ် နီတဂၤဘၣ်. ပှၤလၢအသးဖးတအိၣ်, ပှၤလၢ အဃုယွၤ တအိၣ်, ပှၤဟးဖျိးကျဲခဲလၢာ်, ကဲထီၣ်ပှၤတဂိာ်တသီၣ်ဘၣ်တၢ်, ပှၤမၤတၢ်ဂ့ၤတအိၣ်, ထဲတဂၤဧိၤတအိၣ်ဘၣ်. (ရိမ့ၤ ၃း၁၀-၁၂).
စီၤပီလူးဆဲးကွဲးဝဲ, “ဂုၢ်အၢအစုၣ်အိၣ်လၢအပျုၤဖီလာ်” ဃုာ်ဒီးတၢ်ကိးအါကလုာ် ဘၣ်ဃးဒီး ပတၢ်တဂ့ၤတဘၣ် တဖၣ်, ဘၣ်ဆၣ် တၢ်လၢအအဲၣ်ဒိးစံးဝဲန့ၣ် ပအိၣ်ထဲတၢ်ဘၣ်အၢဘၣ်သီ, အဃိ ပအုၣ်က့ၤခီၣ်က့ၤလီၤပသး တသ့ဘၣ်. တၢ်လၢပဒိးန့ၢ်အီၤဒ်တၢ်ဟ့ၣ်သါအသိး လၢ အပတီၢ်ကထီန့ၢ် ပှၤအဂၤတဖၣ်န့ၣ် တအိၣ်နီတမံၤဘၣ်. အနီၢ်ကီၢ်န့ၣ်, ပဝဲဒၣ်တဖၣ် ပအိၣ်ဒီး တၢ်နာ်လၢ တၢ်အိၣ်လၢပပူၤစှၤမံၤ မၤအါထီၣ်ပလုၢ်ပပှ့ၤဒိၣ်န့ၢ် ပှၤအဂၤ တဖၣ် အဃိ, တၢ်ဒ်န့ၣ်အသိးတဖၣ် စီၤပီလူးစံးဝဲလၢ အမၤတံာ်တာ် တၢ်သးခုကစီၣ်လီၤ. လၢတၢ်ကတိၤအဂၤ တဖျၢၣ် န့ၣ်, ပမ့ၢ်ဆိကမိၣ်လၢပလိၣ်ဘၣ် ယွၤအတၢ်အုၣ်က့ၤခီၣ်က့ၤဒ်အါ, ပဒ်ယံၤဒီး တၢ်မၤပူၤဖျဲးပှၤလီၤ.
ယ့ၣ်ရှူးဟဲလၢ ပှၤလၢအသ့ၣ်ညါလီၤအသးလၢ အမ့ၢ်ပှၤတၢ်ဒဲးဘးဖိတဖၣ် အဂီၢ်, ပှၤလၢအသ့ၣ်ညါလၢ အလိၣ် ဘၣ်အီၤအဂီၢ်လီၤ. ဒီးယ့ၣ်ရှူးအတၢ်မိၣ်န့ၢ်သးလီ အဒိၣ်ကတၢၢ်န့ၣ် မ့ၢ် ကအုၣ်က့ၤခီၣ်က့ၤပဝဲကိးဂၤဒဲးလီၤ.
အဂ့ၢ်ဒ်အံၤ, တၢ်န့ၣ်မ့ၢ်တၢ်အဂ့ၤ, ဒီးတၢ်ဘၣ်ယွၤအသး လၢအအုၣ်က့ၤခီၣ်က့ၤ ပှၤလီၤ. အဝဲဒၣ်န့ၣ် ဆၢဝဲလၢ ပှၤကညီခဲလၢာ် ကတုၤလၢ တၢ်အုၣ်က့ၤခီၣ်က့ၤအီၤ, ဒီးကသ့ၣ်ညါထီၣ် တၢ်မ့ၢ်တၢ်တီ န့ၣ်လီၤ. အဂ့ၢ်ဒ်အံၤ, ယွၤအိၣ်ဝဲတဂၤ, ဒီးလၢ ယွၤဒီးပှၤကညီ အဘၢၣ်စၢၤန့ၣ် ပှၤအိၣ်ဝဲတဂၤလီၤ. (၁ တံၤမသ့း ၂း၃-၅).
ယ့ၣ်ရှူးအီၣ်သကိးတၢ်ဒီး ပှၤဃ့သွဲ ဒီး ပှၤတၢ်ဒဲးဘးဖိတဖၣ်လီၤ (လူၤကၣ် ၅း၂၉-၃၂). အဝဲဒၣ်ပျၢ်ကွံာ် ပိာ်မုၣ် လၢအဟးဂီၤတဖၣ် အတၢ်မၣ်လီၤ (လူၤကၣ် ၇း၄၇-၄၈, ယိၤဟၣ် ၈း၃-၁၁). အဝဲဒၣ်တူၢ်လိာ်ဖိသၣ်ဆံး တဖၣ်လီၤ (မးသဲ ၁၉း၁၄). အဝဲဒၣ်ကတိၤတၢ်ဒီး ပှၤရှၤမရံဖိ - ပှၤလၢပှၤယူဒၤဖိတဖၣ်သးဟ့အီၤလီၤ (ယိၤဟၣ် ၄း၇-၂၉). အဝဲဒၣ်မၤဘျါ ပှၤသူၣ်ကၢ်သးလီၤ ဒီး ပှၤဂံၢ်စၢ်ဘါစၢ်, ပှၤလၢအတလၢတပှဲၤဘၣ်တဖၣ် ဒီး ပှၤဖှီၣ်ဖိ ယာ်ဖိတဖၣ်လီၤ. ဒီး အဝဲဒၣ်တူၢ်လိာ် ပှၤတဂၤလၢ်လၢ်လၢ အဟဲဆူအအိၣ်လၢ တၢ်ဆီၣ်လီၤသးအပူၤလီၤ.
ဖဲကစၢ်ယွၤအဘီအမုၢ်အပူၤ, လံာ်တၢ်လီၣ်ဖျါစံးဘၣ်ပှၤလၢ “ယထံၣ်တၢ်, ဒီးကွၢ်ကွၢ်, ပှၤဂီၢ်မုၢ်ဖးဒိၣ် လၢ ပှၤဂံၢ်ထီၣ်တသ့ဘၣ် နီတဂၤဘၣ်န့ၣ်, ဟဲလၢကယဲၢ်ပှၤကလုာ်, ဒီးကယဲၢ် ပှၤအဒူၣ်, ဒီးကယဲၢ်ပှၤဂီၢ်မုၢ်, ဒီး ကယဲၢ် ပှၤကတိၤတၢ်အကျိာ် အကလုာ်ကလုာ် အကျါသ့ၣ်တဖၣ် န့ၣ် ဆၢထၢၣ်လၢ လီၢ်ပစိာ်အမဲာ်ညါ ဒီးသိဖိအမဲာ်ညါ, ကူသိးထီၣ် အဆ့ဝါ, ဒီးအိၣ်ဒီးစူၣ်ပလိၣ် အလၣ်လၢ အစုပူၤ” (တၢ်လီၣ်ဖျါ ၇း၉). ကစၢ်ယွၤ တကွၢ်ဒိၣ်ဆံးအါစှၤ ပှၤလၢ အဟဲဆူအအိၣ်နီတဂၤဘၣ်.
ဒ်မူခိၣ်ကလူးစံးဝဲ အပူၤကွံာ်အနံၣ်ခံကထိ အသိး, တၢ်သးခုအကစီၣ်လၢအဘၣ်ဃးဒီးယ့ၣ်ရှူးခရံာ် န့ၣ်မ့ၢ် ပှၤကိးဂၤဒဲးအဂီၢ်လီၤ.
