ယမၤလိာ်လံနၤလံ, တမ့ၢ်ဘၣ်ဧါ. ပာ်ဆူၣ်နသးဒီး တံးတဟီၣ်တက့ၢ်. ပျံၤတၢ်တဂ့ၤ, ဘၣ်ယိၣ်တၢ်တဂ့ၤ. အဂ့ၢ်ဒ်အံၤ, ယွၤနကစၢ်အိၣ်ဒီးနၤ ဖဲနလဲၤတၢ် တပူၤလၢ်လၢ်လီၤ. (ယိၤရှူ ၁း၉).
ဆိကမိၣ်ကွၢ်စီၤယိၤရှူအဂ့ၢ်, ဖဲအဝဲကတဲာ်ကတီၤအသး လၢကဆှၢပှၤအံၣ်စရ့လးဖိတဖၣ် ဆူကီၢ်ကနၤဟၣ်, ကီၢ်လၢအပှဲၤဒီး အဝဲသ့ၣ်တဖၣ်အဒုၣ်အဒါ အဆၢကတီၢ်. ကစၢ်ယွၤမ့ၢ်အၢၣ်လီၤအဝဲသ့ၣ်လၢကဟ့ၣ်အီၤ ကီၢ်အံၤဒၣ်လဲာ်, ကျဲလၢအဝဲသ့ၣ်ကဘၣ်လဲၤဆူ ကီၢ်တၢ်စံးပာ်အံၤ မ့ၢ်ကျဲလၢအယံၤ, အကီ, ဒီးပှဲၤဒီး တၢ်တလီၤ တံၢ်တလီၤဆဲးဘၣ်တဖၣ်လီၤ.
လၢတၢ်န့ၣ်အဃိ ဘၣ်သ့ၣ်သ့ၣ် ကစၢ်ယွၤကဒုးသ့ၣ်နီၣ်ထီၣ်က့ၤ စီၤယိၤရှူ, “ဒ်ယအိၣ်ဒီးစီၤမိၤရှ့အသိးန့ၣ် ယကအိၣ်ဒီးနၤလီၤ. ယတလီၤစၢ်ဘၣ် လၢနဂီၢ်ဘၣ်, ယတလဲၤသဒၣ်ဘၣ်နၤဘၣ်. ပာ်ဆူၣ်နသး, ဒီးတံးတဟီၣ် တက့ၢ်.” ကစၢ်ယွၤသ့ၣ်ညါ စီၤယိၤရှူ အတၢ်ဘၣ်ကိၢ်ဘၣ်ဂီၤခူသူၣ်, အဃိ ကစၢ်ယွၤကတိၤတၢ်လိၤလိၤဆူ စီၤယိၤ ရှူအအိၣ်လီၤ.
ကစၢ်ယွၤတဂၤဃီလၢ အဟ့ၣ်ဂံၢ်ဟ့ၣ်ဘါ စီၤယိၤရှူတဂၤန့ၣ်, အဲၣ်ဒိးဟ့ၣ်ဂံၢ်ဟ့ၣ်ဘါနၤ စ့ၢ်ကီးလီၤ. ကစၢ်ယွၤ နၢ်ပၢၢ် တၢ်ပျံၤတၢ်ဖုး ဒီးတၢ်ကိၢ်တၢ်ဂီၤန့ၣ် မၤလီၤဘှံးနသးချ့သဒံးန့ၢ်ထဲလဲၣ် တုၤဒၣ်လဲာ်လၢ နပၢၤက့ၤအီၤတန့ၢ် လၢၤ ဘၣ်လီၤ.
နမ့ၢ်တူၢ်ဘၣ် တၢ်တလီၤတံၢ်လီၤဆဲးထဲလဲၣ်ဘၣ်ဆၣ် တၢ်အိၣ်သးခဲလၢာ် အစၢန့ၣ် ကစၢ်ယွၤသ့ၣ်ညါဝဲခဲလၢာ်လီၤ. ဒီးကစၢ်ယွၤအၢၣ်လီၤဝဲလၢ ပှၤလၢအဟဲဆူအအိၣ်တဂၤလၢ်လၢ်န့ၣ် အဝဲဒၣ် တပာ်တ့ၢ်အီၤဒီး တလဲၤသဒၣ်အီၤ နီတဂၤဘၣ်. ကစၢ်ယွၤအဖိတဖၣ်တအိၣ်သယုၢ်ထဲတဂၤဧိၤနီတဂၤဘၣ်. နတအိၣ်ထဲတဂၤဧိၤဘၣ်. ဒီးနခါဆူညါ န့ၣ်အိၣ်လၢကစၢ်ယွၤ အစုပူၤလီၤ.
အဃိ, နကကွၢ်ဆၢၣ်မဲာ် တၢ်တလီၤတံၢ်လီၤဆဲးတဖၣ်ဒ်လဲၣ်.
နကဘၣ်သ့ၣ်ညါနမၤတၢ်သ့ဆံးအါလဲၣ်, ဟ့ၣ်လီၤအးလီၤ နတၢ်အဲၣ်ဒိးတဖၣ်, ဒီးဟံးထီၣ် ကစၢ်ယွၤ အတၢ်စံးတၢ်ကတိၤတဖၣ်န့ၣ်လီၤ. ဆူမဲာ်ညါလွံၢ်နွံ အတီၢ်ပူၤ ပကကွၢ်ခီၣ်ခါတဖၣ်အံၤဘူးဘူး, ဒီး မၤလိန့ၢ် တၢ်တဖၣ် အံၤလၢ ပနီၣ်သး အတၢ်အိၣ်မူအဂီၢ်လီၤ.
