ဒီးတုၤစီၤမိၤရှ့ ယူာ်ထီၣ်အစုဒီး, တၢ်မၤအသးလၢ အံၣ်စရ့လး မၤနၢၤတၢ်, ဒီးတုၤ အယၤလီၤအစုဒီး ပှၤဧမၤလ့းဖိ မၤနၢၤတၢ် လီၤ. ဒီးစီၤမိၤရှ့ အစုဃၢဝဲ, ဒီးအဝဲသ့ၣ်တဖၣ်န့ၣ် ဟံးန့ၢ် လၢၢ်တဖျၢၣ်, ဒီး ပာ်လၢအဖီလာ်, ဒီးဆ့ၣ်နီၤ ဝဲလၢအဖီခိၣ်, ဒီးစီၤအၤဟရိၣ်, ဒီးစီၤဃူၢ် ဟံးစိာ်ထီၣ် အစု တဂၤတခီ တဂၤတခီ, ဒီးအစုအိၣ်ဂၢၢ်ဆိးကျၢၤ တုၤ မုၢ်လီၤနုာ်လီၤ. ဒီးစီၤယိၤရှူ မၤနၢၤမၤဃၣ် ပှၤဧမၤလ့းဖိ, ဒီးအပှၤဂီၢ်မုၢ်လၢ နးအကနၣ်လီၤ. (၂ မိၤရှ့ ၁၇း၁၁-၁၃).နဆၢထၢၣ်လၢ တၢ်လူၢ်ခိၣ် အိၣ်ဒီးနီၣ်ထိးဘိ ယူာ်ထီၣ်အသးလၢ လၢနဖီခိၣ်န့ၣ် တမ့ၢ်ကျဲအဂ့ၤတဘိလၢ နကမၤ နၢၤ တၢ်ဒုးအဂီၢ်ဘၣ်. ဘၣ်ဆၣ်, မ့ၢ်စီၤမိၤရှ့ အတၢ်သုးတၢ်ကျဲၤလၢ အလီၣ်အိၣ်ဝဲ ဖဲအဝဲ မၢလီၤ စီၤယိၤရှူလၢ ကလဲၤဒုးတၢ်ဒီး ဘီမုၢ်လၢအဂံၢ်ဆူၣ် တဘ့ၣ်အဂီၢ်လီၤ.
ဘၣ်ဆၣ် အတၢ်ဖံးတၢ်မၤ ဖဲတၢ်ဒုးသုးအဆၢကတီၢ်အံၤ တမ့ၢ်ထဲမၤစၢၤ ပှၤအံၣ်စရ့လးဖိ လၢကမၤနၢၤ အဒုၣ်အဒါ အဂီၢ်ဧိၤဘၣ်, မ့မ့ၢ်တခီ ဒုးနဲၣ်စ့ၢ်ကီး ကျဲအဂ့ၤခံဘိ လၢနကသ့ၣ်ညါနမၤတၢ်သ့ဆံးအါ ဖဲတၢ်အိၣ်သးတလီၤတံၢ် လီၤဆဲးအခါလီၤ.
၁. အိၣ်စဲဘူးဒီးပှၤလၢအသ့ၣ်ညါနခါဆူညါ
ဖဲစီၤမိၤရှ့ယူာ်ထီၣ်အနီၣ်ထိးဘိလၢအဖီခိၣ်န့ၣ်, ပှၤအံၣ်စရ့လး မၤနၢၤတၢ်, ဘၣ်ဆၣ် ဖဲအနီၣ်ထိးဘိလီၤဆူ တၢ်ဖီလာ်န့ၣ် ပှၤအံၣ်စရ့လးဖိစးထီၣ်ဃၣ်ကွံာ်ဝဲလီၤ. စီၤမိၤရှ့ အတၢ် ယူာ်ထီၣ်အနီၣ်ထိးဘိအံၤ, မ့ၢ်တၢ်ပနီၣ် တခါလၢ ကစၢ်ယွၤန့ၣ် အိၣ်ဝဲဒီးအဝဲသ့ၣ်ထီဘိ, ဒီးထဲယွၤတဂၤဧိၤမ့ၢ် ပှၤပၢဆှၢတၢ်ခဲလၢာ်လီၤ.
ဒ်စီၤမိၤရှ့အသိး, ဖဲနထံၣ်လၢနအိၣ်လၢ တၢ်ဒုးလၢ နဂံၢ်နဘါဒၣ်နဲနမၤအီၤ တနၢၤဘၣ်အခါန့ၣ်, ကွၢ်တၢ်အိၣ်သး လၢနမဲာ်ညါ ဒီး ဃုကွၢ်တၢ်မၤအသးလၢ နခိၣ်နဃၢၤဝးဝး, ဘၣ်ဆၣ် တဘၣ်ပျဲ တၢ်တဖၣ်န့ၣ် လၢကပတုာ်နၤ လၢနကအိၣ်စဲဘူးဒီး ကစၢ်ယွၤအစိကမီၤန့ၣ်တဂ့ၤ, မ့မ့ၢ်တခီ လူၤန့ၢ်တၢ်လၢ ကစၢ်ယွၤအၢၣ်လီၤနၤန့ၣ်တက့ၢ်.
၂. ပျဲပှၤလၢနနာ်န့ၢ်အီၤကဟဲမၤစၢၤနၤ
ဖဲတၢ်ဒုးအဆၢကတီၢ်, စီၤမိၤရှ့အစုဒုၣ်အဂံၢ်စၢ်လီၤဝဲ အဃိ မ့တမ့ၢ်လၢ အဒိးန့ၢ်တၢ်မၤစၢၤဘၣ်န့ၣ် အဝဲဟ့ၣ်ဆူၣ် ထီၣ်အံၣ်စရ့လးသုမုၢ်အခံတန့ၢ်လၢၤဘၣ်. အဝဲန့ၣ်မ့ၢ်တၢ်ဆၢကတီၢ်လၢ တံၤသကိးလၢအနာ်န့ၢ်ဝဲခံဂၤ နုာ်လီၤမၤ စၢၤအီၤအခါလီၤ. ဖဲအဝဲသ့ၣ်ခံဂၤ ဖီၣ်စၢၤစီၤမိၤရှ့အစုန့ၣ်, အဝဲသ့ၣ်မၤစၢၤစ့ၢ်ကီး အံၣ်စရ့လးသုးမုၢ်လၢ ကမၤနၢၤ တၢ်အဂီၢ်လီၤ.
စီၤမိၤရှ့တဘၣ်တၢ်တ့အီၤလၢ ကလဲၤခီဖျိ တၢ်ကီတၢ်ခဲထဲတဂၤဧိၤဘၣ်, နၤစ့ၢ်ကီးမ့ၢ်တၢ်ဒ်န့ၣ်အသိးလီၤ. အခဲအံၤ နမၤတၢ်သ့ဆံးအါလဲၣ်န့ၣ် မ့ၢ် တၢ်ကွဲမုာ် ပှၤအဂၤတဖၣ်လၢ ကမၤသကိးတၢ်ဒီးနၤ လၢကစၢ်ယွၤအတၢ်ဃဲၤပူလၢ အလီၤလိၢ်လီၤလးအပူၤလီၤ.
တၢ်မၤနၢၤလၢ ပမၤန့ၢ်အီၤဖဲ တၢ်လီၤတံၢ်လီၤဆဲးတအိၣ်ဘၣ်အခါန့ၣ် တမ့ၢ်လၢပမၤန့ၢ်အီၤလၢပဂံၢ်ပဘါဒၣ်ဝဲ အဃိဘၣ်, မ့မ့ၢ်တခီ ခီဖျိလၢ ပအိၣ်စဲဘူးဒီး ကစၢ်ယွၤ ဒီး ပဒိးသန့ၤပသးလၢ ပှၤလၢအမၤစၢၤပှၤတဖၣ် အဃိ လီၤ. အဝဲအံၤမ့ၢ် ကစၢ်ယွၤအတၢ်သးတီဒီးပှၤ လၢအထံၣ်ပှၤလၢ ပတၢ်အိၣ်မူအကလံၤမုၢ်အပူၤ, ဒီးဖဲပသ့ၣ်ညါ တၢ်အံၤန့ၣ် ပဒုးအိၣ်ထီၣ် တၢ်လီၢ်လၢ ကစၢ်ယွၤအဂီၢ် လၢကဒုးနဲၣ်ဖျါထီၣ်အတၢ်စိတၢ်ကမီၤ ဖဲပတၢ်ဂံၢ်စၢ်ဘါစၢ် အပူၤန့ၣ်လီၤ.
တၢ်သံကွၢ်လၢပကဆိကမိၣ်လီၤသးအဂီၢ်
- တၢ်အိၣ်သးလၢနဘၣ်သဂၢၢ်အီၤလၢ နတူၢ်ဘၣ်လၢ ဒိၣ်ဝဲတုၤဒၣ်လဲာ်နမၤနၢၤအီၤလၢနကစၢ်ဒၣ်နဲ တသ့ဘၣ်န့ၣ် မ့ၢ်တၢ်မနုၤလဲၣ်.
- ပှၤလၢနနာ်န့ၢ်အီၤလၢ နဃ့တၢ်မၤစၢၤ သ့န့ၣ် မ့ၢ်မတဂၤတဖၣ်လဲၣ်.
- တနံၤအံၤ ကျဲလၢနကအိၣ်စဲဘူးဒီး ကစၢ်ယွၤအတၢ်စိတၢ်ကမီၤန့ၣ် မ့ၢ်ကျဲမနုၤလဲၣ်.
