ဒီးကလံၤတပျုာ်တပျီၤထီၣ်ဖးဒိၣ်, ဒီးလပီတဖၣ် ဟဲနုာ်ဆူကဘီပူၤ တုၤအကပှဲၤတ့ၢ်ကဘီပူၤလီၤ. (မၢ်ကူး ၄း၃၇).
ပီၣ်လဲၣ်ကၤလံၤလါန့ၣ် ဘၣ်တၢ်သ့ၣ်ညါအီၤလၢ အအိၣ်ဒီး ကလံၤမုၢ်လၢ အဆူၣ်လၢအဟဲကဲထီၣ်အသး ဒ်လဲၣ်ဒ်လဲၣ်န့ၣ် တၢ်တသ့ၣ်ညါဘၣ်, ဒီး တၢ်တနၤလၢ ယ့ၣ်ရှူးဒီးအပျဲၢ်တဖၣ် ခီဂာ်ပီၣ်လဲၣ်ကၤလံၤလါ လၢကလဲၤ ဆူဝၢ်ဘးခီအခါန့ၣ် ကလံၤမုၢ်အံၤဟဲကဲထီၣ်အသးလီၤ. လံာ်စီဆှံတဲဝဲလၢ ဖဲအဝဲသ့ၣ်ဒိးကဘီအခါ ကလံၤတပျုာ် တပျီၤထီၣ်ဖးဒိၣ်လီၤ. ဖဲန့ၣ်အပျဲၢ်အဘီၣ်တဖၣ် ထံၣ်လီၤအသးလၢ အအိၣ်ဝဲလၢ ကလံၤမုၢ် အသးကံၢ်ပူၤ, အဃိ အဝဲသ့ၣ်အသူၣ်ကိၢ်သးဂီၤဒိၣ်မးလီၤ.
လၢလံာ်စီဆှံဒီတဘ့ၣ်ညါအပူၤ, ပကထံၣ်ဘၣ်လၢ ကလံၤမုၢ်န့ၣ် လီၤဂာ်ဒ်သိးဒီး ပတၢ်အိၣ်မူတၢ်မၤကွၢ် အဒိအတဲာ် အသိးလီၤ. ယ့ၣ်ရှူးစံးဝဲဒၣ်, “လၢဟီၣ်ခိၣ်အံၤ, သုကဘၣ်တၢ်ဖှီၣ်လီၤ” (ယိၤဟၣ် ၁၆း၃၃). ဒီးတဘျီတခီၣ်န့ၣ် တၢ်ကိၢ်တၢ်ဂီၤ ကဟဲဘၣ်ပှၤလၢပတသ့ၣ်ညါ အဂံၢ်အထံး, ဒီးဟဲဘၣ်ပှၤဒ် ကလံၤမုၢ်ဟဲသတူၢ်ကလာ်အသိး လီၤ. ပကဘၣ်လဲၤခီဖျိအီၤဒ်လဲၣ်.
ပကသ့ၣ်ညါဘၣ်လၢ အဆိကတၢၢ်န့ၣ် အပျဲၢ်အဘီၣ်တဖၣ် ကဂုာ်ကျဲးစၢး ဘှါလီၤက့ၤတၢ်ဂ့ၢ်ကီ လၢအကစၢ်ဒၣ်ဝဲ လီၤ. အဝဲသ့ၣ်ကဝၢ်အကဘီ ဆူၣ်ထီၣ်လီၤ. အဝဲသ့ၣ်ကဂုာ်ကျဲးစၢးဝဲသပှၢ်ကတၢၢ်လီၤ. ဘၣ်ဆၣ် တစိၢ်ဖိအလီၢ်ခံ အဝဲသ့ၣ်ကလီၤဘှံးဝဲလီၤ. ဖဲအဝဲသ့ၣ်ထံၣ်လီၤအတၢ်ဂံၢ်စၢ်ဘါစၢ်အခါမး အဝဲသ့ၣ်ဃၣ်က့ၤဆူ ယ့ၣ်ရှူးအအိၣ် လီၤ. လၢတၢ်ကမၢကမၣ်အပူၤ, အဝဲသ့ၣ်ထံၣ်လၢ ယ့ၣ်ရှူးန့ၣ် မံဘၣ်အသးလၢ ခိၣ်သခၢၣ်အလိၤလၢ ကဘီအခံ လီၤ. ယ့ၣ်ရှူးမံဝဲကသ့ဒ်လဲၣ်. အပျဲၢ်အဘီၣ်လၢ အပျံၤတၢ်ဖုးတၢ်တဖၣ် ဆိကမိၣ်ဝဲလၢ ယ့ၣ်ရှူးတကဟုကယာ် အဝဲ သ့ၣ်ဒီး တသ့ၣ်ညါ တၢ်အိၣ်သးဘၣ်. “သရၣ်ဧၢ, ပကဟးဂီၤန့ၣ်, မ့ၢ်နတပာ်ဘၣ်လၢ တၢ်နီတမံၤဘၣ်ဧါ” (မၢ်ကူး ၄း၃၈).
အဝဲသ့ၣ်အတၢ်ပာ်သူၣ်ပာ်သးလၢ ယ့ၣ်ရှူးအဖီခိၣ်န့ၣ်, ဒုးထံၣ်ပှၤ ပသူၣ်ပသးဒၣ်ပဝဲလီၤ. ဖဲပဘၣ်သဂၢၢ်ဒီး တၢ်အိၣ်သးလၢ ပထံၣ်လၢပလဲၤခီဖျိအီၤလၢပဂံၢ်ပဘါဒၣ်ပဝဲတန့ၢ်ဘၣ်န့ၣ် ညီနုၢ်ပသံကွၢ်ကစၢ်ယွၤလီၤ. ဘၣ်မနုၤအဃိ ကစၢ်ယွၤပျဲပဘၣ်လဲၤခီဖျိတၢ်အံၤလဲၣ်. ကစၢ်ယွၤတပာ်ဘၣ်လၢတၢ်နီတမံၤဘၣ်ဧါ. အဝဲမ့ၢ်ကဟု ကယာ်ပှၤန့ၣ်, ဘၣ်မနုၤအဃိအဝဲတမၤတၢ်တမံၤမံၤဘၣ်လဲၣ်. ဒ်အပျဲၢ်အဘီၣ်တဖၣ်အသိး, ပကဆိကမိၣ်ချ့သဒံး လၢ မ့ၢ်လၢယ့ၣ်ရှူးတပတုာ်ကလံၤမုၢ်တဘျီဃီဘၣ်အဃိ, ဘၣ်သ့ၣ်သ့ၣ်အဝဲဒၣ်တမ့ၢ် ပှၤလၢအအဲၣ်ပှၤကွံပှၤ တဂၤဘၣ်, မ့တမ့ၢ်ဘၣ်တခီ အဝဲဒၣ်အစိကမီၤတအိၣ်ထဲသိး လံာ်စီဆှံတဲဝဲအသိးဘၣ်. ဘၣ်ဆၣ်, ယ့ၣ်ရှူး အတၢ်မံသပ့ၤဖဲကလံၤမုၢ်လီၤအခါအံၤ မ့ၢ်တၢ်လၢ ကဒုးထံၣ်ပှၤကျဲအဂၤတဘိလၢ ပတၢ်အိၣ်မူအဂီၢ်တခီဧါ.
ယ့ၣ်ရှူးအတၢ်မံသပ့ၤ ဖဲကလံၤမုၢ်လီၤအခါအံၤ ဒုးသ့ၣ်နီၣ်ထီၣ်ပှၤလၢ ကစၢ်ယွၤတဟံးန့ၢ်ကွံာ် ပကလံၤမုၢ်ထီဘိ ဘၣ်, ဘၣ်ဆၣ် ပကဘၣ်သ့ၣ်ညါလၢ ထီဘိန့ၣ် အဝဲဒၣ်အိၣ်ဒီးပှၤလၢ ကဘီအပူၤလီၤ.
