ဒီးပှၤဂီၢ်မုၢ်ထံၣ်ဘၣ်ဝဲလၢ စီၤမိၤရှ့ယံာ်ဝဲလၢ အဟဲက့ၤလီၤလၢ ကစၢၢ်လိၤဒီး, ပှၤဂီၢ်မုၢ်အိၣ်ဖှိၣ်လၢ စီၤအၤဟရိၣ် အအိၣ်, ဒီးစံးဘၣ်အီၤ, ဂဲၤဆၢထၢၣ်, တ့န့ၢ်ပကစၢ် လၢအကလဲၤတၢ် လၢပမဲာ်ညါတက့ၢ်. (၂ မိၤရှ့ ၃၂း၁)အနံၣ် လွံၢ်ကယၤ. အဝဲန့ၣ်မ့ၢ် ပှၤအံၣ်စရ့လးဖိတဖၣ် အိၣ်ခိးဝဲ ကစၢ်ယွၤအတၢ်အုၣ်က့ၤခီၣ်က့ၤအီၤ လၢကုၢ်အလီၢ် ယံာ်ဝဲဆံးယံာ်လဲၣ်လီၤ. ဘၣ်ဆၣ်အဝဲသ့ၣ် ဟးထီၣ်ကွံာ်လၢ ကီၢ်အဲၤကူပတူးဝံၤအလီၢ်ခံ, ကစၢ်ယွၤတဆှၢအီၤ တဘျီဃီဆူ ကီၢ်ကနၤဟၣ်ဘၣ်. မ့မ့ၢ်တခီ, အဝဲသ့ၣ်ဘၣ်သူၣ်ဒဲလၢ ကစၢၢ်တဖျၢၣ်အခီၣ်ထံး ဖဲကစၢ်ယွၤဟ့ၣ်လီၤ စီၤမိၤရှ့လၢတၢ်သိၣ်တၢ်သီတဖၣ်အခါလီၤ.
ဘၣ်ဆၣ်, အသီ လွံၢ်ဆံ ဝံၤအလီၢ်ခံ ပှၤအံၣ်စရ့လးဖိတဖၣ် အသးလီၤဘှါထီၣ်ဝဲလီၤ. အဝဲသ့ၣ်အတၢ်အဲၣ်ဒိးလၢ အမၤယံာ်မၤနီၣ်အသးအံၤ ဆှၢအဝဲသ့ၣ်ဆူ တၢ်ဆၢတဲာ်လၢအကမၣ်, မ့ၢ်လၢ အဝဲသ့ၣ်ထီဒါကစၢ်ယွၤ ဒီး ဃုန့ၢ် ဝဲတၢ်လၢအဂ့ၤလၢအဝဲသ့ၣ်အဂီၢ်အဃိလီၤ.
နသးမ့ၢ်လီၤဘှါ ခီဖျိ တၢ်အိၣ်သးလၢ တဂၢၢ်ဝဲကျၢၤဝဲ လၢအလဲၤအသးယံာ်န့ၢ်ဒံး နသ့ၣ်ညါအီၤ မ့တမ့ၢ် နဆၢမုၢ်လၢ် အီၤဘၣ်န့ၣ် နတအိၣ်တဂၤဘၣ်. ပမ့ၢ်ကွၢ်တၢ်ထဲ ပတၢ်သးဟးဂီၤဧိၤန့ၣ် ပသးပ့ၤနီၣ်လၢ ကစၢ်ယွၤမ့ၢ် ပှၤလၢ အသုးကျဲၤ တၢ်ခဲလၢာ် သ့ဝဲလီၤ. လၢတၢ်န့ၣ်အဃိ, တၢ်အရ့ဒိၣ်ကတၢၢ်လၢပကဘၣ်သ့ၣ်နီၣ် အီၤန့ၣ်မ့ၢ်ဝဲ နအိၣ်ခိး တၢ်န့ၣ် တမ့ၢ်တၢ်မၤလၢာ်ဂီၤတၢ်ဆၢကတီၢ် နီတဘျီဘၣ်.
ပှၤအံၣ်စရ့လးဖိတဖၣ်မ့ၢ်တထံၣ်တၢ်အံၤလၢအဆၢကတီၢ် အဝဲန့ၣ်ဘၣ်ကယၢာ်, ကစၢ်ယွၤတဟံးန့ၢ်ကွံာ် အတၢ်အၢၣ်လီၤအီလီၤလၢ အဝဲသ့ၣ်အအိၣ်ဘၣ်. မ့မ့ၢ်တခီ, ကစၢ်ယွၤကတဲာ်ကတီၤအဝဲသ့ၣ်လၢ အတၢ်အၢၣ် လီၤအီလီၤအဂီၢ်လီၤ.
အဃိ, နသးမ့ၢ်လီၤဘှါခီဖျိနအိၣ်ခိးတၢ်အဃိန့ၣ်, မၤတၢ်လၢပှၤအံၣ်စရ့လးဖိတဖၣ်သးပ့ၤနီၣ်မၤဝဲတက့ၢ်. ကွၢ်ဃု တၢ်အုၣ်သးဘၣ်ဃး ကစၢ်ယွၤအတၢ်အိၣ်ဒီးနၤ, ဒီးကွၢ်ကဒါက့ၤ တၢ်လၢအဝဲဒၣ် မၤဘၣ်နၤတဖၣ် တက့ၢ်. ကစၢ်ယွၤ အတၢ်ဆၢကတီၢ် ကလီၤဆီဒီးနၤ, ဘၣ်ဆၣ် အတၢ်သးတီန့ၣ် တလဲၤအသးကဒံကဒါနီတဘျီဘၣ်. နတၢ် အိၣ်ခိးတၢ်န့ၣ် ကတဲာ်ကတီၤနၤသ့လၢ တၢ်သုးတၢ်ကျဲၤဒီးတၢ်တိာ်လၢ ကစၢ်ယွၤပာ်လီၤလၢနဂီၢ်လီၤ.
တၢ်သံကွၢ်လၢနကသံကွၢ်လီၤနသးအဂီၢ်
- တၢ်လၢနဟံးဃာ်ဒံး လၢနသ့ၣ်ညါလၢ နကဘၣ်တၢၤကွံာ်အီၤန့ၣ် မ့ၢ်မနုၤတဖၣ်လဲၣ်.
- ကစၢ်ယွၤသးတီဒီးနတၢ်အိၣ်မူလၢ ကျဲမနုၤတဖၣ်လဲၣ်.
- ကစၢ်ယွၤဂုာ်ကျဲးစၢးဒုးနဲၣ်နၤတၢ်လၢ နတၢ်အိၣ်သးလၢအခဲအံၤအပူၤမ့ၢ် မနုၤတဖၣ်လဲၣ်.
