ဒီးကွၢ်ကွၢ်, လၢမုၢ်မဆါတနံၤအံၤ ယပိာ်ပှၤ ဟီၣ်ခိၣ်ဖိခဲလၢာ်အကျါ, ဒီးသုသ့ၣ်ညါလၢ သုသးခဲလၢာ်, ဒီး လၢ သုသူၣ်ကံၢ်သးလဲ အပူၤခဲလၢာ်, လၢတၢ်တဟါမၢ် ဘၣ်နီတမံၤ လၢ ကယဲၢ်တၢ်ဂ့ၤလၢ ယွၤသုကစၢ် ကတိၤတၢ်လၢ သုဂ့ၢ်သုကျိၤန့ၣ်ဘၣ်. တၢ်မၤအသး လၢသုဂီၢ်ခဲလၢာ်လီၤ. တၢ်တဟါမၢ်ဘၣ်လၢ အကျါနီတမံၤဘၣ်. (ယိၤရှူ ၂၃း၁၄).စီၤယိၤရှူအတၢ်အိၣ်မူ ဒီကတီၢ်ညါအပူၤ အဝဲဘၣ်တူၢ်ဘၣ် တၢ်တတၢာ်တနါ, တၢ်လီၤဆံးလီၤစှၤ, ဒီး တၢ်သးဟးဂီၤ တဖၣ်လီၤ. ဘၣ်ဆၣ်, အဝဲဒၣ်တပာ်တ့ၢ်အတၢ်စူၢ်တၢ်နာ် ဘၣ်ဃး ကစၢ်ယွၤအတၢ်ပၢၤဃာ် အတၢ်အၢၣ် လီၤအီလီၤ နီတဘျီဘၣ်. ဖဲအသးသမူအနံၣ်လၢခံကတၢၢ်တဖၣ်အပူၤ အဝဲဒၣ်ထံၣ်ဘၣ် ကစၢ်ယွၤ အတၢ်သးတီ လၢပှၤအံၣ်စရ့လးဖိအဂီၢ် အိၣ်ဖျါဝဲလီၤတံၢ်လီၤဆဲး အဃိ, အဝဲတဲဘၣ် ပှၤအံၣ်စရ့လးဖိတဖၣ် လၢ ကသ့ၣ်ညါဒီး သ့ၣ်နီၣ်ထီၣ် ကစၢ်ယွၤအတၢ်အၢၣ်လီၤအီလီၤ တဖၣ်လီၤ.
တၢ်ဆိကမိၣ်လၢနမၤပှဲၤအီၤလၢ နခိၣ်နူာ်ပူၤတဖၣ် မ့ၢ်တၢ်လၢအဘၣ်ဃးဒီးနၤ, မ့ၢ်လၢ တၢ်လၢနသးစဲဘူးဒီးအီၤ တမံၤဂ့ၤတမံၤဂ့ၤ လုၢ်ဘၢကွံာ် နတၢ်ထံၣ်တဖၣ်အဃိလီၤ.
နမ့ၢ်ဃုထၢလၢ နကအိၣ်လၢကစၢ်ယွၤအတၢ်အၢၣ်လီၤအီလီၤအပူၤန့ၣ်, နကစးထီၣ်သ့ၣ်ညါ ကစၢ်ယွၤအတၢ် ဆိၣ်ဂ့ၤတဖၣ်ဖဲ တၢ်အိၣ်သးတဂၢၢ်တကျၢၤဘၣ်အခါလီၤ. အါန့ၢ်အန့ၣ်, နမ့ၢ်နာ်လၢ ကစၢ်ယွၤကပှ့ၤက့ၤတၢ်လၢ နတူၢ်ဘၣ်အခဲအံၤတဖၣ်န့ၣ်, ကဒုးဆူၣ်ထီၣ်နသးလၢ နကလဲၤဆူညါလၢတၢ်နာ်အပူၤ ဒီး ဂုာ်ကျဲးစၢးလၢ နတၢ်ဒုး အပူၤလီၤ.
တနံၤအံၤ ဖဲနလဲၤဆူညါအခါ, ဆိကမိၣ်ကဒါက့ၤ ကစၢ်ယွၤအတၢ်အၢၣ်လီၤအီလီၤတဖၣ်, ဒီးပျဲအဆီတလဲ နတၢ်ဆိကမိၣ်အကျဲတဖၣ်တက့ၢ်.
- ကစၢ်ယွၤကစိာ်မူစိာ်ဂဲၤနၤလီၤ.
- ကစၢ်ယွၤအတၢ်ဃူတၢ်ဖိးကပၢၤနသူၣ်နသးလီၤ.
- ကစၢ်ယွၤသးခုလၢနဃိဃုာ်ဒီး တၢ်သးဝံၣ်လီၤ.
- ကစၢ်ယွၤကပၢကဆှၢနၤ ဒီးသိၣ်လိနၤ ဒ်ကျဲလၢနကြၢးလဲၤအသိးလီၤ.
- ကစၢ်ယွၤမ့ၢ်နတၢ်အိၣ်သဒၢအလီၢ် ဒီး နဂံၢ်နဘါ, နတၢ်မၤစၢၤ ဖဲနလိၣ်ဘၣ်အီၤအခါလီၤ.
- လၢတၢ်ခဲလၢာ်အဖီခိၣ်, နဂ့ၤဒိၣ်န့ၢ် ပှၤမၤနၢၤတၢ်, မ့ၢ်လၢ ကစၢ်ယွၤအဲၣ်နၤအဃိလီၤ.
- ကစၢ်ယွၤတပာ်တ့ၢ်နၤ ဒီး တလဲၤသဒၣ်နၤနီတဘျီဘၣ်.
- ကစၢ်ယွၤအတၢ်အဲၣ်လၢအလၢဝဲပှဲၤဝဲအံၤ တြူာ်ကွံာ်နတၢ်ပျံၤတၢ်ဖုးခဲလၢာ်လီၤ.
- တၢ်လၢအကမၤလီၤဖးနၤဒီး ကစၢ်ယွၤအတၢ်အဲၣ်တၢ်ကွံန့ၣ် တအိၣ်ဘၣ်နီတမံၤဘၣ်.
- ကစၢ်ယွၤမၤတၢ်လၢနဂီၢ်တဝံၤဒံးဘၣ်. ကစၢ်ယွၤမၤတၢ်လၢနဂီၢ်တဝံၤဒံးဘၣ်. ကစၢ်ယွၤမၤတၢ်လၢနဂီၢ်တဝံၤဒံးဘၣ်.
ယွၤဧၢ, ယစံးဘျုးဘၣ်နၤဒိၣ်မး မ့ၢ်လၢ လံာ်စီဆှံအံၤပှဲၤဒီး နတၢ်အၢၣ်လီၤအီလီၤတဖၣ် အဃိလီၤ. မၤစၢၤယၤဒ်သိး ယသးကစဲဘူးဒီး တၢ်မ့ၢ်တၢ်တီလၢယသ့ၣ်ညါအံၤ တက့ၢ်. ဒုးသ့ၣ်နီၣ်ယၤ ဘၣ်ဃး နတၢ်သးတီတက့ၢ်. ဖဲယဘၣ် တၢ်လ့ပစီယၤ ဒ်သိးယကသးပ့ၤနီၣ် တၢ်လၢနမၤတ့ၢ်လၢယဂီၢ် အခါ, ထိးဘၣ်ယသးဒ်သိး ယကသ့ၣ်နီၣ်အီၤ တက့ၢ်. ဒုးအိၣ်ဂၢၢ်ဆိးကျၢၤယၤ တက့ၢ်. အၤမ့ၣ်.
