ယွၤကဒုးတၢ်လၢသုဂီၢ်, ဒီးသုကဘၣ်အိၣ်ဘှီၣ်ကလာ်လီၤ. (၂ မိၤရှ့ - ၁၄း၁၄)ပှၤအံၣ်စရ့လးဖိတဖၣ်ဟးထီၣ်ကွံာ်လၢ ကီၢ်အဲၤကူပတူး ဝံၤအလီၢ်ခံ စီၤမိၤရှ့ ဟ့ၣ်ဂံၢ်ဟ့ၣ်ဘါ ပှၤအံၣ်စရ့လးဖိ တဖၣ်လၢ တၢ်ကတိၤအံၤလီၤ. ဘၣ်တဘၣ် စီၤမိၤရှ့ နၢ်ပၢၢ်ဝဲလၢ ဖဲတၢ်လီၤတံၢ်လီၤဆဲး တအိၣ်အခါ ပန့ဆၢၣ် အတၢ်မၤဆၢက့ၤတၢ်န့ၣ် စံၣ်ထီၣ်စံၣ်လီၤလၢ တၢ်သူၣ်ကိၢ်သးဂီၤဒီး တၢ်သူၣ်ဟးဂီၤသးဟးဂီၤ အဘၢၣ်စၢၤလီၤ.
တၢ်တူၢ်ဘၣ်လၢ တၢ်လီၤတံၢ်လီၤဆဲးတအိၣ်ဘၣ်န့ၣ် အကတၢၢ်ဆှၢပှၤဆူ တၢ်ဆိကမိၣ်တၢ်တဘၣ်လၢၤဘၣ်, မၤစၢ် လီၤနခိၣ်နူာ်အတၢ်သ့တၢ်ဘၣ် ဘၣ်ဃး တၢ်ဘှါလီၤက့ၤတၢ်ကီတၢ်ခဲတဖၣ်, တၢ်ဟ့ၣ်တၢ်သးစၢၢ်ဆၢ, ဒီး တၢ်အိၣ်ဂၢၢ် အိၣ်ကျၢၤ သ့ၣ်တဖၣ်န့ၣ်လီၤ. တၢ်အံၤမၤအါထီၣ် တၢ်ခွဲးတၢ်ယာ်ဘၣ်ဃး တၢ်မၤဘၣ်ထွဲလိာ်သးအါထီၣ်ဒီး တၢ်သကဲာ်ပဝးလၢ အတဂ့ၤတဖၣ် ဒီး မၤကဲထီၣ်နၤလၢ နကအိၣ်ဒီး တၢ်သူၣ်ကိၢ်သးဂီၤ, တၢ်သူၣ်ဟးဂီၤသးဟးဂီၤ ဒီး တၢ်ဘၣ်ယိၣ်ဘၣ်ဘီ တဖၣ်လီၤ.
လၢတၢ်န့ၣ်အဃိ တၢ်လၢအရ့ဒိၣ်န့ၣ်မ့ၢ်ဝဲ နကပာ်နတၢ်နတၢ်ဆိကမိၣ်ဒီး နတၢ်ပာ်သူၣ်ပာ်သး လိၤလိၤဆူ ကစၢ်ယွၤ အတၢ်မ့ၢ်တၢ်တီအအိၣ်လီၤ. တၢ်အိၣ်ဘှီၣ်ကလာ်န့ၣ် မ့ၢ်တၢ်မၤလိတခါလၢ အလဲၤအသးတပယူာ်ဃီ, ဘၣ်ဆၣ် တၢ်အိၣ်ဘှီၣ်ကလာ်န့ၣ် ကျ့ဂ့ၤထီၣ် ပတၢ်ထံၣ်တၢ်သ့ၣ်ညါတဖၣ် ဒီး ဟ့ၣ်ပှၤလၢ ပကသ့ၣ်ညါအါထီၣ် ကစၢ်ယွၤ အတၢ်အိၣ်ဒီးပှၤ လၢ တၢ်ဆၢကတီၢ်အခဲအံၤအပူၤလီၤ.
အဃိ, ပကဘၣ်မၤလိအိၣ်ဘှီၣ်ကလာ်ဒ်လဲၣ်. ကျဲလၢပမၤအီၤသ့န့ၣ် မ့ၢ်တၢ်လဲၤဒ် ခီၣ်ခါသၢခါလၢ ပတဲတ့ၢ်လံ အပူၤအသိးလီၤ.
၁. သ့ၣ်ညါနမၤတၢ်သ့ဆံးအါ - ဟံးန့ၢ်တၢ်ဆၢကတီၢ်စှၤမံးနံး ဒီးဟ့ၣ်လီၤနတၢ်သးစၢၢ်ဆၢ ဆူနတၢ်တူၢ်ဘၣ် အအိၣ်, ဒီး ကိးထီၣ်နတၢ်တူၢ်ဘၣ်တဖၣ်န့ၣ်အမံၤတက့ၢ်. ဟ့ၣ်လီၤနကစၢ်ဒၣ်နဲ တၢ်ပျဲလၢ နကတူၢ်ဘၣ်ဒ်နသးတူၢ်ဘၣ် အသိးတက့ၢ်. ကျိၤကျဲအံၤ ကမၤစၢၤနၤလၢ နကမၤဟးဂီၤကွံာ် တၢ်ဆိကမိၣ်လၢအတဂ့ၤတဖၣ်အသကွီၤ, ဒီးမၤစၢၤ နခိၣ်နူာ်လၢ ကစးထီၣ်ဆိကမိၣ် ကျဲအသီတဖၣ် လၢနကဘှါဆှဲကွံာ် နတၢ်အိၣ်သးလၢ အတလီၤတံၢ်လီၤ ဆဲးဘၣ်လီၤ.၂. ဟ့ၣ်လီၤအးလီၤနတၢ်အဲၣ်ဒိးတဖၣ် - ခဲအံၤ တၢ်လၢအကမၤ ကဲထီၣ်နၤလၢ နကတူၢ်ဘၣ် တၢ်သူၣ်ကိၢ်သးဂီၤ မ့တမ့ၢ် တၢ်ပျံၤတၢ်ဖုး န့ၣ်မ့ၢ်တၢ်မနုၤတဖၣ်လဲၣ်. ဆိကမိၣ်မှံလၢ နဖၢနုာ်တၢ်တဖၣ်န့ၣ်လၢ တလါတဖျၢၣ်အပူၤ, ဒီးဟ့ၣ်တလါတဖျၢၣ်န့ၣ်ဆူ ကစၢ်ယွၤအအိၣ်တက့ၢ်. ဃ့ကစၢ်ယွၤလၢ ကဆီတလဲန့ၢ်နၤ နတၢ်ဘၣ်ယိၣ်ဘၣ်ဘီ တဖၣ် ဆူ တၢ်သ့ၣ်နီၣ်ထီၣ်ကစၢ်ယွၤအတၢ်အၢၣ်လီၤအီလီၤ တဖၣ်တက့ၢ်. (နကဘၣ်မၤကဒါက့ၤ တၢ်အံၤ တဘျုးဘျီ ဒ်သိး နကတူၢ်ဘၣ်လၢ နအိၣ်ကတီၤနသးလံ လၢ နကလဲၤဆူညါအဂီၢ်န့ၣ်လီၤ.)၃. ဟံးထီၣ်ယွၤအတၢ်အၢၣ်လီၤအီလီၤ - ဟံးန့ၢ်တၢ်ဆၢကတီၢ်အစှၤကတၢၢ် ၅ မံးနံး လၢနကဆိကမိၣ်ဘၣ်ဃး ကစၢ်ယွၤအတၢ်အၢၣ်လီၤအီလီၤတဖၣ်တက့ၢ်. ဆိကမိၣ်မှံလၢ နပာ်လီၤယွၤအတၢ်အၢၣ်လီၤအီလီၤတဖၣ်လၢ တၢ်ကံးညာ်ဝါလၢ အကဆှီတဘ့ၣ်အလိၤ, ဒီး သံကွၢ်ကစၢ်ယွၤလၢ ကဒုးနဲၣ်နၤ တၢ်အၢၣ်လီၤအီလီၤဖဲလဲၣ်တခါ လၢ အအဲၣ်ဒိးလၢ နကဟ့ၣ်နတၢ်သးစၢၢ်ဆၢလၢ တၢ်တနံၤန့ၣ်တက့ၢ်. (မုၢ်နံၤတနီၤနီၤန့ၣ် ကလီၤဂာ်ဒ်သိးဒီး ကစၢ်ယွၤကအဲၣ်ဒိးတဲတၢ်အါမး, ဒီးနံၤတနီၤနီၤန့ၣ် နကတူၢ်ဘၣ်ဒ်သိးဒီး ကစၢ်ယွၤအိၣ်ဘှီၣ်ကလာ်လီၤ. တၢ်ခံခါ လၢာ်မ့ၢ်တၢ်လၢအညီနုၢ်မၤအသးလၢ တၢ်ရ့လိာ်ဘၣ်ထွဲလၢအဂ့ၤအပူၤလီၤ.)
နွံလၢအကဟဲတဖၣ်တပူၤ တၢ်လၢနကဘၣ်သဂၢၢ်အီၤတမံၤဂ့ၤတမံၤဂ့ၤ, သ့ၣ်နီၣ်ထီၣ်က့ၤလၢ တၢ်လၢနကလဲၤခီဖျိ တဖၣ် လၢယွၤအဂီၢ်န့ၣ် မ့ၢ်တၢ်လၢအဂၢၢ်ဝဲကျၢၤဝဲ ထီဘိလီၤ. လၢအပူၤကွံာ်ကစၢ်ယွၤမၤတၢ်လၢနဂီၢ်, ခဲအံၤအဝဲဒၣ် အိၣ်ဒီးနၤ, ဒီး နခါဆူညါ အိၣ်လၢ အဝဲဒၣ်အစုပူၤလီၤ. အိၣ်ဂၢၢ်ဆိးကျၢၤလၢ အတၢ်အၢၣ်လီၤအီလီၤတဖၣ်အပူၤ ဒီး နာ်လၢအဝဲမ့ၢ်တၢ်ဂ့ၤန့ၣ်တက့ၢ်.
