ယွၤမ့ၢ်ယတၢ်ကပီၤ, ဒီးတၢ်အုၣ်က့ၤခီၣ်က့ၤယၤလီၤ, ယကပျံၤမတၤတဂၤလဲၣ်. ယွၤမ့ၢ်ယသး သမူအဂံၢ် အဘါလီၤ, ယကပျံၤမတၤတဂၤလဲၣ်. (စံးထီၣ်ပတြၢၤ - ၂၇း၁).ပအိၣ်လၢဟီၣ်ခိၣ်လၢ အပှဲၤဒီးတၢ်ပနီၣ်တဖၣ် လၢအမ့ၢ် တၢ်တတီတလိၤ, တၢ်ဘၣ်လိၥ်ဖိးဒ့တအိၣ်, ဒီး တၢ်ကီတၢ်ခဲဒိၣ်ဒိၣ်မုၢ်မုၢ် တဖၣ်လီၤ. လၢကျဲတနီၤအပူၤ တၢ်သ့ၣ်တဖၣ်န့ၣ် ဟ့ၣ်ပှၤဒ်သိး ပကဆိကမိၣ် လီၤက့ၤ ပသးအဂီၢ်လီၤ. လၢတၢ်န့ၣ်အဃိ, နကအိၣ်ဒီး တၢ်ပျံၤတၢ်ဖုး သ့ဝဲဒၣ်, နကဆိကမိၣ်လၢ ကျဲဟးထီၣ်တအိၣ် လၢၤဘၣ်, ဒီးနကနၥ်လၢ နမ့ၢ်ဟ့ၣ်အရှူန့ၣ် ကညီဒိၣ်မးလီၤ. ဘၣ်ဆၣ် တၢ်မ့ၢ်တၢ်တီန့ၣ် တၢ်ဟ့ၣ်အရှူ တမ့ၢ် တၢ်လၢ အဃဲၣ်လီၤကွံၥ်တၢ်ကီတၢ်ခဲတဖၣ်ဘၣ်, ဘၣ်ဆၣ် ဖဲနအိၣ်ဒီး တၢ်စူၢ်တၢ်နၥ်အဂၢၢ်အကျၢၤ လၢယွၤအပူၤ န့ၣ်, အဝဲဒၣ်ကဟ့ၣ်နၤ တၢ်ဂံၢ်တၢ်ဘါ လၢနကမၤနၢၤ တၢ်ကီတၢ်ခဲ တဖၣ်လီၤ.
ဖဲဝံဃဘးကူၥ်အစိၤ, တၢ်တူၢ်ဘၣ်ခီၣ်ဘၣ်, တၢ်မၤအၢမၤနး, ဒီးတၢ်ဘၣ်ဂံၥ်ဂူၥ်တဖၣ် အိၣ်ဝဲလၢ တၢ်လီၢ်ကိးပူၤဒဲး, အဃိ ဝံဃဘးကူၥ် အနီၢ်ကစၢ်ဒၣ်ဝဲ တူၢ်ဘၣ်လၢအအိၣ်သယုၢ်သတွၤဒိၣ်မးလီၤ. ဝံဃဘၤကူၥ် ကိးထီၣ်ကစၢ်ယွၤ ဒီးသံကွၢ်, “ယွၤဧၢ, နတအုၣ်က့ၤခီၣ်က့ၤဘၣ်န့ၣ် မ့ၢ်ဆံးယံၥ်လဲၣ်.” ဖဲန့ၣ် ကစၢ်ယွၤတဲဘၣ် ဝံဃဘးကူၥ် လၢအသု တသူၣ်ကိၢ်သးဂီၤလၢ တၢ်အိၣ်သးကဆီတလဲအသးအခါဖဲလဲၣ် န့ၣ်တဂ့ၤ. မ့မ့ၢ်တခီ, စံးဘၣ် ဝံဃဘးကူၥ်လၢ ကမၤဆူၣ်ထီၣ်အတၢ်နၥ်လၢ ယွၤအတၢ် အၢၣ်လီၤအီလီၤအပူၤ, မ့ၢ်လၢ တၢ်သ့ၣ်တဖၣ်န့ၣ်ကလၢထီၣ်ပှဲၤထီၣ် ဖဲတၢ်ဆၢကတီၢ်ဟဲတုၤဝဲ အခါလီၤ. ကစၢ်ယွၤစံးဘၣ်အီၤ, “တၢ်ထံၣ်လၢညါခီန့ၣ် အိၣ်ဝဲလၢ တၢ်အဆၢအကတီၢ် အဂီၢ်, ဒီးကကတိၤတၢ်လၢ တၢ်အကတၢၢ်, ဒီးတကတိၤကဘျံးကဘျၣ်ဘၣ်. မ့ၢ်သုးနံၤသုးသီ ဘၣ်ဆၣ်ဒီး, အိၣ်ခိး အီၤတက့ၢ်. အဂ့ၢ်ဒ်အံၤ, ကဟဲသပှၢ်တၢၢ်ဒီး တသုးနံၤသုးသီဘၣ်.” (ဃဘးကူၥ် ၂း၃).
လၢကျဲတမံၤဃီအပူၤ, နကလဲၤခီဖျိဘၣ် တၢ်အိၣ်သးလၢ နတထံၣ်ဘၣ်တၢ်ဆီတလဲနီတမံၤဘၣ်, လီၤဂၥ်ဒ်သိး ကစၢ်ယွၤထုးယံၥ်တၢ်ဆၢကတီၢ်လၢ ကစံးဆၢတၢ်အဂီၢ်လီၤ. မ့ၢ်ကဲထီၣ်အသးဒ်န့ၣ် န့ၣ်, တဘၣ်ပျဲတၢ်အိၣ်သး ကတိၤတၢ်ဒိၣ်န့ၢ် ကစၢ်ယွၤအတၢ်အၢၣ်လီၤအီလီၤလၢ နဂီၢ်တဂ့ၤ. နမ့ၢ်ဟံးန့ၢ်တၢ်ဆၢကတီၢ် လၢနကဆိကမိၣ် ဘၣ်ဃး တၢ်ကီတၢ်ခဲတဖၣ် မ့ၢ်အါထီၣ်န့ၣ်, နကတဲဘၣ်ဃးတၢ်ဂ့ၢ်အဝဲန့ၣ် ထီဘိလီၤ. တၢ်န့ၣ်အဃိ, တၢ်အဝဲ အံၤကဒုးတူၢ်နၤ တၢ်တူၢ်ဘၣ်လၢ အတဂ့ၤတဖၣ်, ဒီးကဒုးကဲထီၣ်နၤ လၢ နကတူၢ်ဘၣ်ဒ်သိးဒီး နဂံၢ်နဘါ စၢ်လီၤ, နတအိၣ်ဒီးတၢ်မုၢ်လၢ်လၢၤဘၣ်, ဒီး နတၢ်စိတၢ်ကမီၤလၢၥ်ကွံၥ်ဝဲလီၤ.
လၢကျဲအဂၤတဘိန့ၣ်, နမ့ၢ်ဆိကမိၣ်ဘၣ်ဃး ကစၢ်ယွၤ အတၢ်အၢၣ်လီၤအီလီၤန့ၣ်, နကပှဲၤဒီး တၢ်မုၢ်လၢ်, တၢ်ဃူ တၢ်ဖိး, ဒီး တၢ်သူၣ်ခုသးခုလီၤ. တၢ်အံၤကမၤဆူၣ်ထီၣ်န တၢ်နၥ်လီၤ. ဒီး တၢ်နၥ်ကအိးထီၣ်တြဲၤ လၢ ကစၢ်ယွၤ အတၢ်စိတၢ်ကမီၤ ကဟဲနုၥ်လီၤမၤတၢ်လၢ နတၢ်အိၣ်မူအပူၤလီၤ.
ဝံဃဘၤကူၥ် တပၥ်မၤအသးဒ်သိး တၢ်ကီတၢ်ခဲတအိၣ်ဘၣ် န့ၣ်ဘၣ်. ဘၣ်ဆၣ် အဝဲ ပၥ်လီၤအသးလၢ ကစံးကတိၤ ဘၣ်ဃး တၢ်အၢၣ်လီၤအီလီၤတဖၣ်, ဟ့ၣ်တၢ်ဘျုးတၢ်ဖှိၣ်, ဒီးစံးဘျုးယွၤလၢ အမ့ၢ်ပှၤလၢအအုၣ် က့ၤခီၣ်က့ၤအီၤလီၤ. တၢ်အံၤမၤဆူၣ်ထီၣ်က့ၤအီၤ, ဒီး ဟ့ၣ်အီၤတၢ်ဃူတၢ်ဖိးလၢသူၣ်လၢသးလီၤ. ဝံဃဘၤကူၥ် နၥ်လၢ အတၢ်စူၢ်တၢ်နၥ်အဂံၢ်ဆူၣ်ထီၣ် န့ၣ်တမ့ၢ်လၢ တၢ်အိၣ်သးအဃိဘၣ်, မ့မ့ၢ်တခီ မ့ၢ်လၢ ကစၢ်ယွၤ အကလုၢ်ကထါလၢ အဂံၢ်ဆူၣ်ဘါဆူၣ်အံၤ အိၣ်လၢအပူၤအဃိလီၤ.
နတၢ်အိၣ်သးမ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ, နၥ်ကစၢ်ယွၤအကလုၢ်ကထါတက့ၢ်. ဖဲနအိၣ်ခိးလၢ တၢ်အိၣ်သးကဆီ တလဲအသးအခါန့ၣ်, နကဘၣ်စံးဘျုးဒီး စံးထီၣ်ပတြၢၤကစၢ်ယွၤ, မ့ၢ်လၢ အဝဲမ့ၢ် တၢ်လၢနလိၣ်ဘၣ်ခဲလၢၥ် အဂံၢ်ခိၣ်သ့ၣ်လီၤ. လၢကျဲဒ်အံၤအဃိ, နကဘၣ်တၢ်မၤဆူၣ်ထီၣ်နၤ လၢကစၢ်ယွၤအစိကမီၤ ဒ်သိး နကအိၣ်ခိး တၢ်ဆၢကတီၢ် ဖဲကစၢ်ယွၤကဆီတလဲ တၢ်အိၣ်သးလၢအကီခဲအံၤ အခါ န့ၣ်လီၤ.
