ယ့ၣ်ရှူးစံးဘၣ်အီၤ, ယဲဒၣ်အံၤ ယမ့ၢ်တၢ်ဂဲၤဆၢထၢၣ်က့ၤဒီးတၢ်မူလီၤ. ပှၤလၢအစူၢ်က့ၤနၥ်က့ၤယၤန့ၣ်, မ့ၢ်သံဘၣ်ဆၣ်ဒီး, ကမူထီၣ်ဝဲလီၤ. (ယိၤဟၣ် ၁၁း၂၅).ဖဲယ့ၣ်ရှူးသံလၢ ပတၢ်ဒဲးဘးအဂီၢ် ဒီး ပျၢ်ပတၢ်ကမၣ်အခါန့ၣ်, အဝဲဒၣ်မၤပူၤဖျဲးပှၤလၢ တၢ်လီၤဖးလီၤစိၤလီၤထီ ဒီး ကစၢ်ယွၤလီၤ. လၢတၢ်သံလၢတအိၣ်ဒီးတၢ်မုၢ်လၢ်ဘၣ်အလီၢ်န့ၣ် အဝဲဒၣ်ဟ့ၣ်ပှၤ တၢ်မုၢ်လၢ်လၢအမူ လၢခါဆူညါ တၢ်လီၤထူလီၤယိၥ်အပူၤ လၢပကစၢ်ယ့ၣ်ရှူးခရံၥ်အမဲၥ်ညါလီၤ. ဒီးဖဲယ့ၣ်ရှူး ဂဲၤထၢၣ်က့ၤလၢ တၢ်သွၣ်ခိၣ်အခါန့ၣ်, အဝဲဒၣ်ပၥ်ဖျါထီၣ် အတၢ်မၤနၢၤတၢ်သံ, တၢ်သံအစိကမီၤ န့ၣ်ပထိၣ်သတြီၤဒီးအီၤ တန့ၢ်နီတစဲးဘၣ်. တၢ်လီၣ်ဖျါ ၁း၁၈ အပူၤ, ယ့ၣ်ရှူးခရံၥ်စံးဝဲဒၣ်, “ဒီးယမ့ၢ်ပှၤလၢအမူ, ဒီးပှၤလၢအသံတ့ၢ်, ဒီးကွၢ်ကွၢ်, ယမူလီၤထူလီၤယိၥ်, ဒီးယအိၣ်ဒီး တၢ်သံဒီးပျုၤပူၤအနီၣ်ဝံၥ်လီၤ.”
ဖဲတၢ်သံမ့ၢ်တၢ်နီၢ်ကီၢ်လၢ အကီခဲဒိၣ်ကတၢၢ် လၢပဂီၢ် လၢပတၢ်အိၣ်မူပူၤအံၤ, ဒီး ဖဲပလဲၤခီဖျိဘၣ် သးအတၢ်တူၢ်ဘၣ် ခီဖျိပှၤလၢအဘူးကတၢၢ်ဒီးပှၤတဖၣ် ပၥ်တ့ၢ်ကွံၥ်ပှၤ, ဒီးလီၢ်ခံကတၢၢ် ပကစၢ်ဒၣ်ဝဲအတၢ်သံအခါန့ၣ်, ပအိၣ်ဒီး တၢ်မုၢ်လၢ်သ့လၢ ယ့ၣ်ရှူးအိၣ်ဒီး တၢ်သံအနီၣ်ဝံၥ်ခံ, ဒီး အဝဲဒၣ် ဒုးအိၣ်ထီၣ်တြဲၤလၢ ပဂီၢ် လၢပကလဲၤနုၥ်လီၤ ဆူတၢ်မူလီၤထူလီၤယိၥ်အပူၤလီၤ. တၢ်သံလၢဟီၣ်ခိၣ်အံၤ တမ့ၢ်တၢ်ကတၢၢ်လၢပဂီၢ်ဘၣ်. တၢ်လၢ အကဟဲအိၣ်အါမးဒံး. ယ့ၣ်ရှူးအၢၣ်လီၤပှၤလၢ လံၥ် ယိၤဟၣ် ၁၁း၂၅ အပူၤစံးဝဲလၢ, “ပှၤလၢအစူၢ်က့ၤနၥ်က့ၤ ယၤန့ၣ်, မ့ၢ်သံဘၣ်ဆၣ်ဒီး, ကမူထီၣ်ဝဲလီၤ.”
မ့ၢ်လၢယ့ၣ်ရှူးအုၣ်က့ၤခီၣ်က့ၤပှၤလၢ တၢ်သံလီၤထူလီၤယိၥ်အပူၤအဃိ, တလိၣ်ပအိၣ်မူ ပတၢ်အိၣ်မူလၢ တၢ်ပျံၤအပူၤလၢၤဘၣ်. ပသဘျ့လၢပကအိၣ်မူလၢတၢ်သးခူတလ့ၢ်အပူၤ, တၢ်အိၣ်မူလၢအလၢအပှဲၤ, တၢ်လၢ ကဟဲဘၣ်ပှၤတမံၤဂ့ၤတမံၤဂ့ၤ ပသ့ၣ်ညါသ့လၢ ပကအိၣ်မူလီၤထူလီၤယိၥ်လၢ ကစၢ်ယွၤအမဲၥ်ညါ ဒီးလၢ အဟံၣ်ဖိဃီဖိအပူၤလီၤ. ပမ့ၢ်ဘၣ်သူၣ်အုးသးအုးလၢ ပှၤလၢပအဲၣ်ဘၣ်တဖၣ်အဂီၢ်ဒၣ်လဲၥ်, ပသူၣ်အုးသးအုး လၢတၢ်မုၢ်လၢ်အပူၤ, မ့ၢ်လၢ ပသ့ၣ်ညါလၢ အဝဲသ့ၣ်မ့ၢ်အိၣ်ဒီးအတၢ်နၥ်လၢ ယ့ၣ်ရှူးအပူၤန့ၣ်, ပကအိၣ်က့ၤတပူၤဃီ ဒီး လဲၤခီဖျိဘၣ် ကစၢ်ယွၤအလၤကပီၤဒ်သိးသိး အဃိလီၤ.
ဖဲခရံၥ်ဂဲၤဆၢထၢၣ်က့ၤအမုၢ်ခီၣ်ထံးနံၤအံၤ, မ်ပကထၢနုၥ် ကစၢ်ခရံၥ်အတၢ်မၤနၢၤတၢ်သံ လၢပသးကံၢ်ပူၤ, ဒီးပကကွၢ်တၢ်လိၤလိၤဆူ ပတၢ်ပူၤဖျဲးလီၤထူလီၤယိၥ် လၢမူခိၣ်န့ၣ်တက့ၢ်. တၢ်သံအံၤအစုၣ်အပျၢ် တအိၣ် လၢၤဘၣ်. ပကမၤလၤကပီၤကစၢ်ယ့ၣ်ရှူးခရံၥ်အတၢ်မၤနၢၤ, ပကလၢပှဲၤဒီးတၢ်စံးဘျုးစံးဖှိၣ်, ဒီးပကမၤအါထီၣ်ပတၢ်ပၥ်လီၤသး လၢ ပှၤကိးဂၤဒဲးလၢ ဟီၣ်ခိၣ်အံၤ ကဘၣ်အိၣ်ဒီး မူခိၣ်ဘီမုၢ်အတၢ်မုၢ်လၢ် ဒ်ပှၤ အသိးတက့ၢ်. အဝဲန့ၣ်မ့ၢ် တၢ်တိၥ်လၢ ခရံၥ်အတၢ်ဟဲတူၢ်သံအသးလၢ ပှၤဟီၣ်ခိၣ်ဖိကိးဂၤဒဲး အတၢ်ဒဲးဘး အဂီၢ်လီၤ. တၢ်လၢနကဟ့ၣ်ဆၢက့ၤ ကစၢ်ခရံၥ်န့ၣ် မ့ၢ်နကတဲဘၣ်ဟီၣ်ခိၣ်လၢ ကစၢ်ခရံၥ်အတၢ်အဲၣ်လၢ အဝဲသ့ၣ်အဂီၢ်လီၤ. အဃိ, လဲၤဒီးအိၣ်မူတၢ်အိၣ်မူလၢအဂ့ၤကတၢၢ်, မ့ၢ်လၢယ့ၣ်ရှူးမူဝဲအဃိလီၤ.
