ယတၢ်ကတိၤလၢအဟဲထီၣ်လၢ ယထးခိၣ် ကမၤအသးဒ်န့ၣ်, ဒီးတဟဲက့ၤကဒါက့ၤဆူ ယအိၣ်ကလီကလီဘၣ်. မ့ၢ်အကမၤထီၣ်တၢ်လၢ အဘၣ်ယသးဒီး ကဒုးကဲထီၣ် တၢ်လၢ ယမၢအမၤတၢ်န့ၣ်လီၤ. (ယရှါယၤ ၅၅း၁၁).ဒ်ပှၤဟီၣ်ခိၣ်ဖိအသိး, ပအိၣ်ဒီးန့ဆၢၣ်လၢ ပဂုၥ်ကျဲးစၢးဃုသ့ၣ်ညါတၢ်လၢ တၢ်ကဲထီၣ်အသးလၢပခိၣ်ပဃၢၤ အါန့ၢ်ဒံး တၢ်ကဲထီၣ်သးလၢပကံၢ်ပလဲအပူၤလီၤ. ဘၣ်ဆၣ် ကျဲလၢပကမၤဆၢက့ၤ တၢ်ကဲထီၣ်သးလၢ တၢ်ချၢ တဖၣ် ညီနုၢ် လီၣ်ဖျါထီၣ် ပတၢ်ဆိကမိၣ်, ပတၢ်နၥ်, ဒီး ပတၢ်ဆိကမိၣ်ဆိကမးလၢအအိၣ်လၢပပူၤလီၤ.
တၢ်အိၣ်သးတမံၤဃီအဖီခိၣ် ပှၤအါဂၤကအိၣ်ဒီး တၢ်မၤဆၢက့ၤတၢ် လၢအလီၤဆီလိၥ်သးလီၤ. ပထံၣ်န့ၢ်အီၤသ့လၢ ဖဲယ့ၣ်ရှူး ဒီးအပျဲၢ်အဘီၣ်တဖၣ် အိၣ်လၢ ကလံၤမုၢ်အသးကံၢ်ပူၤအခါလီၤ (ဖးဘၣ် လူၤကၣ် ၈း၂၂-၂၅ တက့ၢ်). လၢတၢ်ဂ့ၢ်အံၤအပူၤ ပကထံၣ်ဘၣ် တၢ်မၤဆၢက့ၤတၢ်လၢအ လီၤဆီလိၥ်သးခံခါ ဘၣ်ဃးတၢ်လၢအအိၣ်လၢပပူၤလီၤ. ဖဲအပျဲၢ် အဘီၣ်ထံၣ်ဘၣ်ကလံၤမုၢ်ဟဲဆူၣ်ဆူၣ်ကလဲၥ်အခါ, အပျဲၢ်အဘီၣ်တဖၣ် အိၣ်ဒီးတၢ်ပျံၤတၢ်ဖုးဒီး တၢ်သးဟးဂီၤ လီၤ.
တၢ်ကီတၢ်ခဲမ့ၢ်ကဲထီၣ်အသး အဝဲသ့ၣ်ကဘၣ်မၤဝဲဒ်လဲၣ်န့ၣ် အန့ဆၢၣ်တၢ်သ့ၣ်ညါ အိၣ်ပၥ်စၢၤဝဲ, ဘၣ်ဆၣ် တၢ်လၢအတသ့ၣ်ညါဝဲဘၣ်န့ၣ်မ့ၢ်ဝဲ အတၢ်ပျံၤတၢ်ဖုးတဖၣ် စးထီၣ်ဒိၣ်ထီၣ်လၢအသးကံၢ်ပူၤလံန့ၣ်လီၤ. အဝဲသ့ၣ် ဆိကမိၣ်လၢ အဂံၢ်အဘါစၢ်ဝဲလၢ ကဆီတလဲ တၢ်အိၣ်သးအံၤ, အဃိတၢ်အံၤပၥ်ဖျါထီၣ်လၢ အဝဲသ့ၣ်အတၢ်စူၢ် တၢ်နၥ်စှၤဝဲ လၢယ့ၣ်ရှူးတဲတ့ၢ်ဝဲ တချုးအဝဲသ့ၣ် နုၥ်လီၤဒံးလၢကဘီပူၤအခါလီၤ. အဝဲသ့ၣ် အသးစၢၢ်ဆၢလၢ တၢ်လၢအဟဲလၢတၢ်ချၢ ဒိၣ်န့ၢ်ဒံး ယ့ၣ်ရှူးအတၢ်ကတိၤ လၢအနုၥ်လီၤလၢအဝဲသ့ၣ်အသူၣ်ကံၢ်သးလဲအပူၤ ဒံးလီၤ.
ဘၣ်ဆၣ် ဖဲကလံၤမုၢ်ဟဲဆူၣ်ဆူၣ်ကလဲၥ်အခါ, ယ့ၣ်ရှူးမံဝဲမုၥ်မုၥ်လၢ တၢ်ဃူတၢ်ဖိးအပူၤ, လၢပၢ်အတၢ်ကဟု ကယၥ်အဃိလီၤ. ယ့ၣ်ရှူးသ့ၣ်ညါဝဲလၢ တၢ်လၢအကဘၣ်မၤန့ၣ်မ့ၢ်ဝဲ တၢ်လဲၤတုၤလၢ ပီၣ်လဲၣ်ဝၢ်ဘးခီ, ဒီးအတၢ် တိၥ်န့ၣ်တဝံၤဒံးဘၣ်လီၤ. ဖဲအပျဲၢ်အဘီၣ်တဖၣ် ထိၣ်ဂဲၤထၢၣ်အီၤအခါ, ယ့ၣ်ရှူးတပျဲ အဝဲသ့ၣ်အတၢ်ပျံၤတၢ်ဖုး မ့တမ့ၢ် ကလံၤမုၢ်ဆူၣ် ဟုၣ်န့ၢ်တၢ်နၥ် ဒီး တၢ်ဃူတၢ်ဖိးလၢအအိၣ်လၢအသးကံၢ်ပူၤဘၣ်.
ယ့ၣ်ရှူးဒူကလံၤမုၢ် လၢအဂုၥ်ကျဲးစၢး တြီအဝဲသ့ၣ်လၢ ကတုၤလၢအတၢ်ဖံးတၢ်မၤအပျီမုၢ်လါဟ့ အလိၤလီၤ. ယ့ၣ်ရှူးဒုးနဲၣ် ဝဲလၢ ကလံၤမုၢ်လၢတၢ်ချၢမ့ၢ်ဒိၣ်ထဲလဲၣ်ဘၣ်ဆၣ်, တအိၣ်ဒီးတၢ်စိတၢ်ကမီၤလၢ အကဆီတလဲ အဝဲဒၣ် အသးအတၢ်ဃူတၢ်ဖိး ဒီး အတၢ်နၥ်လၢ ပၢ်အပူၤဘၣ်. လၢတၢ်စိတၢ်ကမီၤအပူၤ, ယ့ၣ်ရှူး ဒူကလံၤမုၢ် အလိၤ ဒီး မၤလီၤကယၥ်က့ၤကလံၤမုၢ်လီၤ.
ယ့ၣ်ရှူးဆီတလဲ တၢ်အိၣ်သးလၢ တၢ်ချၢတကပၤသ့ဝဲန့ၣ် မ့ၢ်လၢ အဝဲဒၣ် ပၢၤဃၥ်အတၢ်နၥ်ဒီး သးအတၢ်ဃူ တၢ်ဖိးလၢအသးကံၢ်ပူၤအဃိလီၤ. ဖဲနဆၢထၢၣ်ဂၢၢ်ကျၢၤလၢ နတၢ်နၥ် လၢယွၤကလုၢ်ကထါအပူၤန့ၣ်, နသူၣ်ကံၢ်သးလဲအပူၤန့ၣ် အိၣ်ပှဲၤဒီး သးအတၢ်ဃူတၢ်ဖိး ဒီး တၢ်ပျံၤတၢ်ဖုး ဒိၣ်ဘၢနၤတသ့လၢၤဘၣ်.
ကစၢ်ယွၤတ့လီၤနၤအိၣ်ဒီး တၢ်တိၥ်ဖးဒိၣ်, ဘၣ်ဆၣ် ဖဲနလဲၤလၢ နကမၤလၢပှဲၤတၢ်တိၥ်အံၤအခါ, နကဘၣ်သဂၢၢ် ကလံၤမုၢ်တွၤ တဖၣ်လၢ နကျဲအပူၤလီၤ. သုတသူၣ်ပျံၤသးဖုးဒီး ဘၣ်ယိၣ်ဘၣ်ဘီလၢ လပီလၢ အကမၤထီဒါ နကျိၣ်နစ့, နတၢ်အိၣ်ဆူၣ်အိၣ်ချ့, နဟံၣ်ဖိဃီဖိ, ဒီး နတၢ်အိၣ်မူအတၢ်ပၥ်လုၢ်ပၥ်ပှ့ၤအဂၤတဖၣ်န့ၣ် ဒိၣ်ဆံးအါလဲၣ် ဆံးအါလဲၣ်န့ၣ်တဂ့ၤ. တၢ်နၥ်ကစၢ်ယွၤအကလုၢ်ကထါန့ၣ် အစိအကမီၤအိၣ်ဒိၣ်န့ၢ်ဒံး တၢ်တဖၣ်န့ၣ်ဒံးလီၤ.
ကွၢ်တၢ်လိၤလိၤဆူ ကစၢ်ယွၤအတၢ်အၢၣ်လီၤအီလီၤ အအိၣ်, အန့ၣ်မး အတၢ်ဃူတၢ်ဖိး ကဆဲးမၤဆူၣ်ထီၣ် နသးအတၢ်ဂံၢ် တၢ်ဘါလီၤ. အန့ၣ်မး ကလံၤမုၢ်တွၤလၢ တၢ်ချၢ မၤပတုၥ်နၤလၢ နကလဲၤတုၤဆူ ကစၢ်ယွၤအတၢ် ဆိၣ်ဂ့ၤလၢ အပၥ်ဃၥ်လၢ နဂီၢ် တသ့ဘၣ် န့ၣ်လီၤ.
