သူၣ်ကညီၤသးကညီၤယၤ, ယွၤဧၢ, သူၣ်ကညီၤသးကညီၤယၤတက့ၢ်. အဂ့ၢ်ဒ်အံၤ, ယသး သန့ၤအသး လၢနၤလီၤ. ဒီးယဃ့ၢ်ဆူနဒံးဆ့ အကဒုပူၤ တုၤတၢ်နးတၢ်ဖှီၣ်အံၤ လဲၤပူၤကွံာ်လီၤ. (စံးထီၣ်ပတြၢၤ ၅၇း၁).တၢ်အိၣ်မူန့ၣ်တမ့ၢ်ကလံၤသီၣ်ဂီၤဂ့ၤ အမုၢ်နံၤဖးထီတနံၤဘၣ်. တဘျီတဘျီ ပဝဲကိးဂၤဒဲး ပကလဲၤခီဖျိဘၣ် ကလံၤမုၢ်တဖၣ်, လၢအဟဲဆူနအိၣ်ဒ် တၢ်ဆူးတၢ်ဆါ, တၢ်ဖံးတၢ်မၤလီၤမၢ်, ကျိၣ်စ့တၢ်ကီတၢ်ခဲ, ဒီမါဝၤတၢ်ကီ တၢ်ခဲ, ဖိမုၣ်ဖိခွါတၢ်ကီတၢ်ခဲ, ဒီးတၢ်ကီတၢ်ခဲအဂၤတဖၣ် လၢကဟ့ၣ်နၤ တၢ်ကိၢ်တၢ်ဂီၤ လၢအသဟီၣ်ဆူၣ်, ဒီးလၢအရ့ဒိၣ် ဒိၣ်မးလီၤ. Joyce Meyer စံးဝဲဒၣ်, အနီၢ်ကစၢ်ဒၣ်ဝဲ လဲၤခီဖျိဘၣ် ကလံၤမုၢ်အါမးလၢ အတၢ်အိၣ် မူအပူၤ, တနီၤနီၤလီၤဂာ်ဒီး မုၢ်ဃ့ၢ်လီၤကလံၤမုၢ်လၢ အလီၤဝဲချ့သဒံး, ဒီး တနီၤနီၤလီၤဂာ်ဒ် ကလံၤမုၢ်သဝံးလၢ အပတီၢ်လွံၢ် အသိးလီၤ. မ့ၢ်ဘၣ်မၤလိန့ၢ်တၢ် သးသမူကလံၤမုၢ်တွၤအအိၣ်န့ၣ်, Joyce Meyer စံးလၢ အဝဲဒၣ် မၤလိန့ၢ်ဝဲလၢ ကလံၤမုၢ်တဖၣ်န့ၣ် တမ့ၢ်တၢ်လီၤထူလီၤယိာ်ဘၣ်, အဃိ အဝဲဒၣ် တမၤတၢ်ဆၢတဲာ်ဒိၣ်ဒိၣ်မုၢ်မုၢ် ဖဲကလံၤမုၢ်ဘၣ်အီၤအခါဘၣ်.
ဖဲသးသမူကလံၤမုၢ်တွၤလီၤဘၣ်နၤအခါ, နခိၣ်နူာ်အတၢ်ဆိကမိၣ် ဒီးနသးအတၢ်တူၢ်ဘၣ်တဖၣ် နဘၣ်ပာ်အီၤ ဂၢၢ်ဂၢၢ် တသ့ဖဲအသ့လီၤ. နတၢ်ဆိကမိၣ်ဒီး နတၢ်တူၢ်ဘၣ်တဖၣ် ညီနုၢ် ဃ့ၢ်ဆူအံၤဆူနုၤ ဖဲတၢ်ကီတၢ်ခဲအဆၢ ကတီၢ်, ဘၣ်ဆၣ် အဝဲန့ၣ်မ့ၢ်တၢ်ဆၢကတီၢ် လၢ နကဘၣ်ပလီၢ်နသး ဘၣ်ဃး တၢ်မၤတၢ်ဆၢတဲာ်တဖၣ်လီၤ. ပကဘၣ်အိၣ်ဂၢၢ်သပၢၢ် ဒီးသိၣ်ဃီၣ်လီၤပသး လၢပကကွၢ်လိၤလိၤဆူ တၢ်လၢပမၤသ့ ဒီးနာ်ကစၢ်ယွၤ လၢကမၤ တၢ်လၢပမၤအီၤတသ့တဖၣ်လီၤ.
ခဲကၢာ်တဘျီ ဖဲနကဘၣ်လဲၤခီဖျိ ကလံၤမုၢ်လၢနတၢ်အိၣ်မူအပူၤန့ၣ်, ယနာ်လၢ နကသ့ၣ်နီၣ်ထီၣ်တၢ်ကတိၤ တဖျၢၣ်အံၤ, “ပျဲနသးတၢ်တူၢ်ဘၣ်စၢ်လီၤ တချုးနမၤတၢ်ဆၢတဲာ်န့ၣ်တက့ၢ်.” မၤနဲအဂ့ၤကတၢၢ်ဒ်သိး ကမၤလီၤကယာ် တၢ်အိၣ်သးတဖၣ် တချုးနမၤတၢ်ဆၢတဲာ်လၢအဒိၣ်န့ၣ်တက့ၢ်. ဘၣ်သ့ၣ်သ့ၣ် တၢ်ခွဲးတၢ်ယာ် တအိၣ်ဒီးနၤထီဘိဘၣ်, ဘၣ်ဆၣ်တသ့ဖဲအသ့ တၢ်ဆၢတဲာ်ဖးဒိၣ်လၢနကမၤအီၤတဖၣ် ပာ်ဃာ်အီၤတစိၢ်ဖိ တုၤလၢ ကလံၤမုၢ်လဲၤတလၢနၤနက့ၢ်. ဒ်ကလံၤအူတပျုာ်တပျီၤ ဖဲကလံၤမုၢ်လီၤအခါအသိး, ပတၢ်ဆိကမိၣ်တဖၣ် ကလဲၤ အသးတပျုာ်တပျီၤ ဒ်န့ၣ်အသိး, အဃိ တၢ်အဝဲန့ၣ် တမ့ၢ်တၢ်ဆၢကတီၢ်အဂ့ၤ လၢပကမၤ တၢ်ဆၢတဲာ်ဒိၣ်ဒိၣ်မုၢ်မုၢ် တဖၣ်ဘၣ်.
တၢ်ပာ်လီၤသးဒ်အံၤ ကဒီသဒၢနၤ လၢနကမၤ တၢ်ဆၢတဲာ်လၢ အချ့ဒီး လၢတကူၣ်သ့ဘၣ် လၢအကထုးထီၣ်ကွံာ် နၤ လၢ တၢ်တိာ်လၢကစၢ်ယွၤပာ်လီၤလၢနဂီၢ် အပူၤလီၤ.
