စံယိၣ် အဖိမုၣ်ဧၢ, သူၣ်ဖှံသးညီဒိၣ်ဒိၣ်ကလဲၥ် တက့ၢ်. ယရူၤရှလ့ၣ်အဖိမုၣ်ဧၢ, ကိးပသူထီၣ်တက့ၢ်. ကွၢ်ကွၢ်, နစီၤပၤ ဟဲဆူနအိၣ်လီၤ. တီဝဲလိၤဝဲ, ဒီးအုၣ်က့ၤခီၣ်က့ၤတၢ်လီၤ. အသူၣ်စူၤအသးစူၤ, ဒီးဒိးကသ့ၣ်ယီၤ, ကသ့ၣ်ယီၤအ သးစၢ်ဒၣ်လဲၥ်, ကသ့ၣ်ယီၤမိၢ်အဖိလီၤ. (စကၤရယၤ ၉း၉).တၢ်မၤနၢၤအတၢ်နုၥ်လီၤ (Triumphal Entry) မ့ၢ် ယ့ၣ်ရှူးအတၢ်ဟဲနုၥ်လီၤဆူဝ့ၢ်ယရူၤရှလ့ၣ် လၢပသ့ၣ်ညါအီၤလၢ စူၣ်ပလိၣ်အမုၢ် ခီၣ်ထံးနံၤ (Palm Sunday), မုၢ်ခီၣ်ထံးနံၤတချုးခရံၥ်ဘၣ်တၢ်ပျၤထီအီၤလၢထူၣ်စုညါလိၤ (ယိၤဟၣ် ၁၂း၁,၁၂) န့ၣ်လီၤ. တၢ်မၤနၢၤအတၢ်နုၥ်လီၤအံၤ အိၣ်ဖျါထီၣ်လၢ လံၥ်တၢ်သးခုကစီၣ်လွံၢ်ဘ့ၣ်လၢၥ်အပူၤလီၤ (မးသဲ ၂၁း၁-၁၇, မၢ်ကူး ၁၁း၁-၁၁, လူၤကၣ် ၁၉း၂၉-၄၀, ယိၤဟၣ် ၁၂း၁၂-၁၉). ခီဖျိလၢလံၥ်တၢ်သးခုကစီၣ်လွံၢ်ဘ့ၣ်လၢၥ် ပၥ်ဖျါထီၣ် တၢ်ဂ့ၢ်အံၤအဃိ, ပသ့ၣ်ညါသ့လၢ တၢ်မၤနၢၤအတၢ်နုၥ်လီၤအံၤ မ့ၢ်တၢ်ဆၢကတီၢ်အရ့ဒိၣ်တကတီၢ် လၢ ကစၢ်ခရံၥ်အစိၤတကးဘၣ် လၢ ခရံၥ်ဖိအတၢ်စံၣ်စိၤတဲစိၤအပူၤဒၣ်လဲၥ်လီၤ.
တၢ်တနံၤန့ၣ်, ယ့ၣ်ရှူးဒိးထီၣ် ကသ့ၣ်ယီၤဖိလၢ တၢ်တဒိးဘၣ်အီၤနီတဘျီဒံးဘၣ် ဒီး နုၥ်လီၤဝဲဆူ ဝ့ၢ်ယရူၤရှလ့ၣ် အပူၤလီၤ. အပျဲၢ်အဘီၣ်တဖၣ် ပၥ်ထီၣ်တၢ်ကူလၢ ကသ့ၣ်ယီၤအလိၤ ဒ်သိးယ့ၣ်ရှူးကဆ့ၣ်နီၤလၢအလိၤအဂီၢ်, ပှၤဂီၢ်မုၢ်ဟဲထီၣ်သဂၢၢ်အီၤ, ဒါလီၤအတၢ်ကူ ဒီး စူၣ်ပလိၣ်အလၣ်လၢ ကျဲလိၤလၢကသ့ၣ်ယီၤဖိ ကယီၢ်အီၤအဂီၢ်လီၤ. ပှၤဂီၢ်မုၢ်ကိးပသူထီၣ် စံးထီၣ်ပတြၢၤအီၤဒ် “စီၤပၤလၢအဟဲလၢယွၤအမံၤ” တဂၤအသိးလီၤ.
ယ့ၣ်ရှူးအတၢ်တိၥ်လၢ အတၢ်နုၥ်လီၤဆူဝ့ၢ်ယရူၤရှလ့ၣ် ဒိးဒီးကသ့ၣ်ယီၤဖိန့ၣ် မ့ၢ်ဒ်သိး ကပၥ်ဖျါထီၣ်အသးဒ် အမ့ၢ် မ့ၤရှံအၤ ဒီး အံၣ်စရ့လးအစီၤပၤ လၢကမၤလၢပှဲၤလံၥ်စီဆှံ အလီၢ်လံၤတကတြူၢ် အတၢ်စံးပၥ် အဂီၢ်လီၤ. လံၥ်မးသဲပၥ်ဖျါထီၣ်လၢ စီၤပၤလၢအဟဲဒိးဒီးကသ့ၣ်ယီၤဖိ န့ၣ်မ့ၢ်တၢ်မၤလၢပှဲၤထီၣ် စကၤရယၤ ၉း၉, “စံယိၣ် အဖိမုၣ်ဧၢ, သူၣ်ဖှံသးညီဒိၣ်ဒိၣ်ကလဲၥ် တက့ၢ်. ယရူၤရှလ့ၣ်အဖိမုၣ်ဧၢ, ကိးပသူထီၣ်တက့ၢ်. ကွၢ်ကွၢ်, နစီၤပၤ ဟဲဆူနအိၣ်လီၤ. တီဝဲလိၤဝဲ, ဒီးအုၣ်က့ၤခီၣ်က့ၤတၢ်လီၤ. အသူၣ်စူၤအသးစူၤ, ဒီးဒိးကသ့ၣ်ယီၤ, ကသ့ၣ်ယီၤအ သးစၢ်ဒၣ်လဲၥ်, ကသ့ၣ်ယီၤမိၢ်အဖိလီၤ.” ယ့ၣ်ရှူးဒိးဒီးကသ့ၣ်ယီၤဖိ, နုၥ်လီၤဝဲဆူ ဝ့ၢ်ယရူၤရှလ့ၣ်အပူၤ ဒ်စီၤပၤ လၢအမၤနၢၤတၢ်တဂၤအသိး, ဒီးပှၤဂီၢ်မုၢ်တဖၣ်စ့ၢ်ကီး စံးထီၣ်ပတြၢၤအီၤဒ်န့ၣ်အသိးလီၤ. တၢ်ဒါလီၤတၢ်ကူ လၢ ကျဲအလိၤန့ၣ် မ့ၢ်တၢ်ပနီၣ်တခါလၢ တၢ်တူၢ်လိၥ်စီၤလိၣ်စီၤပၤတဖၣ်လီၤ (၂စီၤပၤ ၉း၁၃). အကတီၢ်ဖဲန့ၣ် ယ့ၣ်ရှူး ဘိးဘၣ်သ့ၣ်ညါပှၤဂီၢ်မုၢ်တဖၣ်လၢ အဝဲဒၣ်မ့ၢ် အဝဲသ့ၣ်အစီၤပၤ ဒီး မ့ၤရှံအၤလၢ အဝဲသ့ၣ်အိၣ်ခိးဝဲန့ၣ်လီၤ.
ဘၣ်ဆၣ်သနၥ်က့, ပှၤဂီၢ်မုၢ်တဖၣ်အတၢ်စံးထီၣ်ပတြၢၤယ့ၣ်ရှူးန့ၣ် တမ့ၢ်လၢအဝဲသ့ၣ် သ့ၣ်ညါလၢယ့ၣ်ရှူးမ့ၢ် ပှၤလၢအအုၣ်က့ၤခီၣ်က့ၤဝဲသ့ၣ်လၢ တၢ်ဒဲးဘးဘၣ်. အဝဲသ့ၣ်တူၢ်လိၥ်မုၥ်ယ့ၣ်ရှူးန့ၣ်မ့ၢ်လၢ အဝဲသ့ၣ်လိၣ်ဘၣ် မ့ၤရှံအၤလၢ အကဟဲထုးထီၣ်အဝဲသ့ၣ်လၢ ရိမ့ၤအစုဖီလၥ်, ဆှၢအဝဲသ့ၣ်လၢ ကထီဒါ ရိမ့ၤအဂီၢ်လီၤ. ဘၣ်ဆၣ်, တုၤလၢအဝဲသ့ၣ် သ့ၣ်ညါလၢ ယ့ၣ်ရှူးတမ့ၢ်ပှၤတဂၤဒ် အဝဲသ့ၣ်မုၢ်လၢ်အသိး ဘၣ်အဃိ, စှၤသီဝံၤအလီၢ်ခံ အဝဲသ့ၣ် ကိးပသူထီၣ် “ပျၤထီကွံၥ်အီၤ” န့ၣ်လီၤ (လူၤ ၂၃း၂၀-၂၁).
တၢ်မၤနၢၤအတၢ်နုၥ်လီၤအံၤ လၢပှၤနၥ်တၢ်ဖိတဖၣ်အဂီၢ် မ့ၢ်တၢ်လၢပကဘၣ်ဟံးန့ၢ် သးအတၢ်ဂံၢ်တၢ်ဘါလီၤ. မ့ၢ်အဘၣ်ဃးဒီး စီၤပၤလၢအဟဲဒ်သိး တၢ်ခ့တၢ်ပှၤလၢအပတီၢ်ဖုၣ်ကတၢၢ်တဂၤ အသိးလၢကသ့ၣ်ယီၤဖိအလိၤ, လၢအတပၣ်ဃုၥ်ဒီး စီၤလိၣ်စီၤပၤ အတၢ်ကူတၢ်သိး အတၢ်ကယၢကယဲနီတမံၤဘၣ် လီၤ. ကစၢ် ယ့ၣ်ရှူးခရံၥ် တဟဲဒ်သိး ကမၤနၢၤဟီၣ်ခိၣ်အံၤလၢ တၢ်စုဆူၣ်ခီၣ်တကးဒ် ဟီၣ်ခိၣ်စီၤပၤတဂၤအသိးဘၣ်, မ့မ့ၢ် တခီ ဟဲဒ်သိးကမၤနၢၤဟီၣ်ခိၣ်လၢ တၢ်အဲၣ်တၢ်ကွံ, တၢ်ဘျုးတၢ်ဖှိၣ်, တၢ်သးကညီၤ, ဒီးတၢ်ဟ့ၣ်လီၤသးလၢ အပှၤ ဂီၢ်မုၢ်အဂီၢ်လီၤ. အဘီအမုၢ်န့ၣ်တမ့ၢ် ဘီမုၢ်လၢအလၢပှဲၤဒီး တၢ်ဒုးသုးဒုးသံၣ်အတၢ်ပီးတၢ်လီတဖၣ်ဘၣ်. အဃိ, အတၢ်မၤနၢၤန့ၣ် တမ့ၢ်ထဲဘီမုၢ်တဖၣ်ဧိၤဘၣ်, မ့မ့ၢ်တခီ မၤနၢၤစ့ၢ်ကီး ပှၤသူၣ်ပှၤသးလီၤ. တၢ်ကစီၣ်န့ၣ်မ့ၢ်ဒၣ် သး အတၢ်ဃူတၢ်ဖိ, လၢအတမ့ၢ် တၢ်ဃူတၢ်ဖိးတစိၢ်တလီၢ်ဘၣ်. ကစၢ်ခရံၥ် မ့ၢ်ဟဲနုၥ်လီၤလၢပသးပူၤ ဒ်တၢ်မၤနၢၤ အတၢ်နုၥ်လီၤအသိးန့ၣ် အဝဲကပၢတၢ်လၢပသးပူၤလၢ တၢ်အဲၣ်တၢ်ကွံဒီး တၢ်ဃူတၢ်ဖိးလီၤ. ဒ်ပမ့ၢ်ပှၤခရံၥ်ဖိ တဖၣ်အသိး, ပလီၣ်ဖျါထီၣ်စ့ၢ်ကီးခရံၥ် အက့ၢ်အဂီၤလၢ ပပူၤအဃိ, မ်ဟီၣ်ခိၣ်ကထံၣ် စီၤပၤအမ့ၢ်အတီတဂၤ ပၢတၢ်လၢပပူၤတက့ၢ်.
