မ်ပကွၢ်လိာ်ပသး တဂၤဒီးတဂၤ, ဒ်သိး ပကသဆၣ်ထီၣ်လိာ်ပခံ ဆူတၢ်အဲၣ်တၢ်ကွံ, ဒီးတၢ်မၤဂ့ၤတၢ်န့ၣ်တက့ၢ်. ဟးဆှဲးပတၢ်အိၣ်ဖှိၣ်ရိဖှိၣ်, ဒ်ပှၤတနီၤနီၤ အလုၢ်အလၢ်အသိးန့ၣ် တဂ့ၤ, ပသဆၣ်ထီၣ်လိာ်ပခံဒီး, ပထံၣ်အမုၢ်တနံၤ ဒံးဘူးထီၣ်ဒီး, မ်ပသဆၣ်ထီၣ်လိာ်ပခံ ဒံးအါထီၣ်တက့ၢ်. (ဧ့ၤဘြံၤ ၁၀း၂၄-၂၅).ဖဲပဘၣ်သဂၢၢ်တၢ်ကီတၢ်ခဲအခါပလဲၤခီဖျိအီၤဒ်လဲၣ်. တၢ်ကီတၢ်ခဲတဖၣ်အံၤကဒုးယံၤပှၤဒီး တၢ်စူၢ်တၢ်နာ်ဧါ, မ့တမ့ၢ် ကမၤယိာ်ထီၣ် ပတၢ်စူၢ်တၢ်နာ်ဧါ. မ့ၢ်ပဂုာ်ကျဲးစၢးအိၣ်ထဲတဂၤဧိၤဧါ, မ့တမ့ၢ် ပဃုတၢ်မၤစၢၤ လၢပပှၤတဝၢ အပူၤဧါ.
ကစၢ်ယွၤတအၢၣ်လီၤအီလီၤပှၤနီတဘျီလၢ ပတၢ်အိၣ်မူအခဲအံၤ ကလဲၤအသးညီကဒၣ်ဘၣ်, ဘၣ်ဆၣ် ကစၢ်ယွၤ အၢၣ်လီၤပှၤလၢ ကအိၣ်ဒီးပှၤ ခီဖျိ သးစီဆှံလီၤ. ဖဲပလဲၤခီဖျိဘၣ် ကလံၤမုၢ်တွၤ ဒိၣ်မ့ၢ်ဂ့ၤ ဆံးမ့ၢ်ဂ့ၤ ကစၢ်ယွၤမ့ၢ် ပှၤလၢ အမၤမုာ်ထီၣ်ပှၤလီၤ. ကစၢ်ယွၤလၢအဒိၣ်န့ၢ် ပတၢ်ကီတၢ်ခဲ ခဲလၢာ်တဂၤအံၤ စိာ်ပှၤလၢ အစုဒုၣ်လိၤလီၤ. ကစၢ်ယွၤပာ်လီၤပှၤ လၢပှၤနာ်တၢ်ဖိအတဝၢအပူၤ လၢအစိာ်ကဖီထီၣ်လိာ်သးကဒဲကဒဲ ဖဲတၢ်ကီတၢ်ခဲအဆၢကတီၢ် လီၤ. တလိၣ်လၢ ပကဘၣ်လဲၤခီဖျိအီၤ ထဲတဂၤဧိၤဘၣ်.
ဘီနံၤ မ့ၢ်တၢ်အိၣ်ဖှိၣ်သရၣ်မုၣ်လၢ ဘဲလ်ဖျါဝၢၣ်, ခဲၣ်လံၣ်ဖိနံယါ တဂၤလီၤ. အဝဲတဲဘၣ်ဃး အတၢ်လဲၤခီဖျိ ဘၣ်ဃး ခဲစၢၣ်တၢ်ဆါ ဒီး စံးဝဲလၢ ပှၤလၢအဟံၣ်ဖိဃီဖိအပူၤ ဒီး ပှၤခရံာ်ဖိအပှာ်ဘျးစဲ အပူၤတဖၣ် မ့ၢ်ပှၤသ့ၣ်တဖၣ် လၢ မၤစၢၤအီၤလၢ ကလဲၤခီဖျိ တၢ်ကီတၢ်ခဲတဖၣ် ဒီး ဃုထံၣ်န့ၢ် တၢ်ဂံၢ်တၢ်ဘါလၢ ကစၢ်ယွၤအပူၤ ဒီးလၢအကလုၢ် ကထါအပူၤလီၤ. အဝဲသ့ၣ်အတၢ်စူၢ်တၢ်နာ် လၢ တၢ်မၤကွၢ်အပူၤန့ၣ်, မ့ၢ်တၢ်လၢအလီၤကွၢ်လိ ဒီး မ့ၢ်တၢ်လၢ ပဘၣ်မၤထွဲအီၤလီၤ.
မ်နကဘၣ်ဆိၣ်ဂ့ၤ ခီဖျိ တၢ်မၤမုာ်က့ၤနၤ ဒီး တၢ်အံးထွဲကွၢ်ထွဲနၤ လၢအအိၣ်လၢ ကစၢ်ယွၤအကလုၢ်ကထါအပူၤ, ဒီးလၢကစၢ်ယွၤ အတၢ်မၤဘျါအပူၤ, ဒီး လၢပှၤနာ်တၢ်ဖိလၢ အကိးထီၣ်ကစၢ်ယွၤအမံၤ အတဝၢအပူၤန့ၣ်တက့ၢ်.
