တၢ်တ့လီၤယၤအိၣ်ဒီး ပျံၤတၢ်အလီၢ်, ဒီးကမၢကမၣ်တၢ် အလီၢ်လီၤ. မၤသးဒ်န့ၣ်ဒီး ယကစံးထီၣ်ပတြၢၤနၤ လီၤ. နတၢ်မၤတဖၣ် လီၤလးဝဲန့ၣ် ယသ့ၣ်ညါသပှၢ်ပှၢ်လီၤ. (စံးထီၣ်ပတြၢၤ ၁၃၉း၁၄).ဘၣ်ဃးဒီး နကစၢ်ဒၣ်နဲန့ၣ် မ့ၢ်နတူၢ်ဘၣ်ဒ်လဲၣ်. နကစံးလၢ နအိၣ်ဒီး နက့ၢ်ဂီၤအတၢ်အိၣ်သးလၢအဂ့ၤဧါ. နပတြၢၤနဂံၢ်နဘါဧါ. နအဲၣ်လီၤနသးစ့ၢ်ကီးဧါ. နပာ်ကဲလီၤနသးဧါ. နဆိမိၣ် ဒိၣ်လီၤနသးလၢ ကျဲလၢအဘၣ် ဘျီးဘၣ်ဒါအပူၤဧါ. မ့တမ့ၢ်တခီ မ့ၢ်နအိၣ်ဒီး တၢ်ထံၣ်ဆံးလီၤနသးဧါ. မ့ၢ်နဆိကမိၣ်ဘၣ်ဃးနတၢ်ဂံၢ်စၢ်ဘါစၢ် အါတလၢဧါ. နဆိကမိၣ်ဆံးလီၤနသး မ့တမ့ၢ် နတဲဆံးလီၤနသးစ့ၢ်ကီးဧါ. မ့ၢ် နဂုာ်ကျဲးစၢးတူၢ်လိာ် နတၢ်ဂံၢ်စၢ် ဘါစၢ်တဘျီဘျီဧါ. ပှၤအါဂၤ ထံၣ်လီၤအတၢ်ဂံၢ်စၢ်ဘါစၢ်အါတလၢ အဃိ မၤဟးဂီၤက့ၤ အတၢ်မ့ၢ်တၢ် တဖၣ်န့ၣ်လီၤ.
ပအိၣ်ဒီး တၢ်ဂံၢ်ဆံးဘါစၢ် ကိးဂၤဒဲးလီၤ. ဘၣ်ဆၣ် ကစၢ်ယွၤစံးဝဲလၢ အဝဲဒၣ် အ “တၢ်စိတၢ်ကမီၤ လၢထီၣ် ပှဲၤထီၣ်လၢ တၢ်အဂံၢ်စၢ်အဘါစၢ်အပူၤလီၤ” (၂ ကရံၣ်သူး ၁၂း၉). လၢတၢ်ကတိၤအဂၤတဖျၢၣ်န့ၣ်, ပတၢ်ဂံၢ်စၢ် ဘါစၢ် တဖၣ်န့ၣ် ဟ့ၣ်လီၤကစၢ်ယွၤ တၢ်ခွဲးတၢ်ယာ်လၢ ကလီၣ်ဖျါထီၣ်အတၢ်ဖံးတၢ်မၤခီဖျိပှၤလီၤ. ဒ်သိး ကစၢ်ယွၤအတၢ်စိတၢ်ကမီၤ ကယွၤလီၤလၢပပူၤအဂီၢ်, ပကြၢးကွၢ်သတြီၤ ပတၢ်ဂံၢ်စၢ်ဘါစၢ်တဖၣ် ဒီး ပာ်လီၤပသး လၢ ပသုတပျဲ အမၤတံာ်တာ်ပှၤတဂ့ၤ န့ၣ်လီၤ. ပကဘၣ်အဲၣ် ဒီး တူၢ်လိာ် ပနီၢ်ကစၢ်ဒၣ်ပဝဲ, ဒ်အမ့ၢ် ပတၢ်ဂံၢ်စၢ် ဘါစၢ်တဖၣ်, ပတၢ်သးဒိၣ်တဖၣ်, ပတၢ်ကမၣ်တဖၣ်, ဒီး တၢ်အဂၤတဖၣ်, မ့ၢ်လၢ ကစၢ်ယွၤအဲၣ်ပှၤဒီး တူၢ်လိာ်ပှၤ လၢတအိၣ်ဒီး တၢ်ပာ်ဒ့ၣ်ပာ်ကမၣ် နီတမံၤဘၣ်အဃိလီၤ.
အဲၣ်ဒိးဟ့ၣ်ဂံၢ်ဟ့ၣ်ဘါနၤ, ဖဲနတူၢ်ဘၣ်လၢ နတဘၣ်တၢ်အဲၣ်နၤဘၣ် မ့တမ့ၢ် တၢ်တတူၢ်လိာ်နၤဘၣ်န့ၣ်, ဒုးသ့ၣ်နီၣ် လီၤနသးလၢ တၢ်တူၢ်ဘၣ်ဒ်န့ၣ်န့ၣ် မ့ၢ်ဒၣ် တၢ်သးတဂၢၢ်တကျၢၤဘၣ်လီၤ. သ့ၣ်နီၣ်ထီၣ်က့ၤလၢ ကစၢ်ယွၤတ့လီၤနၤ လၢအက့ၢ်အဂီၢ်ဒၣ်ဝဲ, ဒ်ပှၤထုတၢ်ဂီၤတဂၤထုဝဲလၢ ကအိၣ်ဒီး ပျံၤတၢ်အလီၢ် ဒီး ကမၢကမၣ်တၢ်အလီၢ်အပူၤ အသိးလီၤ. အဝဲအဲၣ်နၤဒီး တူၢ်လိာ်နၤလၢလၢပှဲၤပှဲၤ ဒီးအိၣ်ဒီး တၢ်တိာ်ကျဲၤလီၤလိၢ်လီၤလး လၢနတၢ်အိၣ်မူအဂီၢ် လီၤ. နတၢ်ဂံၢ်စၢ်ဘါစၢ် ဒီး နတၢ်တလၢတပှဲၤဘၣ်တဖၣ် တမၤပတုာ်အီၤ လၢ ကမၤလၢပှဲၤ အတၢ်တိာ်လၢနဂီၢ်, မ့တမ့ၢ် မၤတၢ်ခီဖျိလၢနၤ လၢကဆိၣ်ဂ့ၤပှၤဂၤအဂီၢ်ဘၣ်. တဲဘၣ်လီၤနသးလၢ ကစၢ်ယွၤအဲၣ်နၤ ဒီး နသုတပျဲန တၢ်ဂံၢ်စၢ်ဘါစၢ်တဖၣ် တြီနၤလၢ နကပိာ်အခံလၢနသးဒီဖျၢၣ်ညါ န့ၣ်တဂ့ၤ. တယံာ်ဘၣ်, နကအိၣ်က့ၤဒီး တၢ်နာ်လီၤသး ဒီး တၢ်ဂံၢ်တၢ်ဘါတဖၣ်လီၤ.
