ကယဲၢ်ပှၤလၢ ယပၢ်ဟ့ၣ်လီၤယၤ တဂၤလၢ်လၢ်န့ၣ်, ကဟဲဆူယအိၣ်လီၤ. ဒီးပှၤလၢ အဟဲဆူယအိၣ်န့ၣ်, ယတဟီထီၣ်ကွံာ်ဘၣ်အီၤဘၣ်. (ယိၤဟၣ် ၆း၃၇).ဖဲစီၤအၤဒၣ်ဒီးနီၢ်အံၣ်အု လီၤဘၣ်လၢတၢ်ဒဲးဘးအပူၤ လၢဧ့ၤဒ့ၣ်တၢ်သၣ်လီၢ်ပူၤအခါန့ၣ်, အဝဲသ့ၣ် ဂုာ်ကျဲးစၢး ပာ်ခူသူၣ်အသးလၢ ကစၢ်ယွၤအမဲာ်ညါ, ဒီးအဝဲသ့ၣ် ဆးချၢၣ်ဒၢအလၣ်ဒ်သိးကပာ်ခူသူၣ် အတၢ်အိၣ်ဘ့ၣ်ဆ့ အဂီၢ်လီၤ (ကွၢ် ၁ မိၤရှ့ ၃း၇). အနီၢ်ကီၢ်န့ၣ်, တလိၣ်ပဃ့ၢ်ကွံာ်လၢကစၢ်ယွၤအမဲာ်ညါ, တလိၣ်ပပာ်ခူသူၣ်ပသးဘၣ်. မ့မ့ၢ်တခီ, ပလဲၤလိၤလိၤဆူယွၤအအိၣ် ဒီး ပပာ်ဖျါထီၣ်တၢ်ကိးမံၤဒဲးလၢ ပမၤတ့ၢ်အီၤလၢ တၢ်တီတၢ်လိၤအပူၤ သ့ဝဲလီၤ. ပကဃ့ၢ်ကွံာ်အလီၢ်န့ၣ်, ကစၢ်ယွၤကွဲမုာ်ပှၤ လၢပကဃ့ၢ်ဆူအအိၣ်လီၤ. အဝဲဒၣ်အၢၣ်လီၤအီလီၤပှၤလၢ တဟီထီၣ်ကွံာ် ပှၤလၢ အဟဲဆူအအိၣ်နီတဂၤဘၣ်.
နမ့ၢ်တူၢ်ဘၣ်လၢ နမၤကမၣ်တၢ်တမံၤမံၤ မ့တမ့ၢ် နဃၣ်ကွံာ်သအုးသပှီၤန့ၣ် ဃ့ၢ်ဆူကစၢ်ယွၤအိၣ်ချ့ချ့ ဒ်သိး နကဒိးန့ၢ် ကစၢ်ယွၤအတၢ်ဖိးဟုနၤ အဂီၢ်တက့ၢ်. အဝဲဒၣ်ကပျၢ်နတၢ်ကမၣ်, ကမၤဂ့ၤထီၣ်က့ၤနၤ, ဒီးကမၤ ဘၣ်ဂီၢ်က့ၤနၤလီၤ. ထဲဒၣ်ကစၢ်ယွၤတဂၤဧိၤ မ့ၢ်ပှၤလၢအမၤစၢၤပှၤလၢ တၢ်ဆၢကတီၢ် အကီအခဲအပူၤ, လၢ တၢ်ဃၣ်ကွံာ်အပူၤ, ဒီး တၢ်ပျံၤတၢ်ဖုးအပူၤ, အဃိ ပမ့ၢ်ဃ့ၢ်ကွံာ်လၢယွၤအမဲာ်ညါ ဆူ တၢ်ဂၤအအိၣ်န့ၣ် ကမ့ၢ် တၢ်တဂိာ်တသီၣ်အတၢ်မၤလီၤ. နမ့ၢ်သးဒိၣ်ဘၣ်ကစၢ်ယွၤလၢ တၢ်သးဟးဂီၤလၢအကဲထီၣ်အသးလၢ နတၢ်အိၣ်မူအပူၤ သနာ်က့, ဃ့ၢ်ဆူအအိၣ်တက့ၢ်. တဲအီၤတၢ်လၢနတူၢ်ဘၣ်တဖၣ် ဒီး ဃ့ယွၤလၢကမၤစၢၤနၤ တက့ၢ်.
ကစၢ်ယ့ၣ်ရှူးခရံာ်နၢ်ပၢၢ်ပှၤသ့ မ့ၢ်လၢ အဝဲဒၣ်စ့ၢ်ကီး ဘၣ်လဲၤခီဖျိ တၢ်လ့ပစီ, တၢ်မၤကွၢ်, ဒီး တၢ်လီၤဘှံးလီၤတီၤ တဖၣ်လီၤ. အဝဲဒၣ်သ့ၣ်ညါ ပတၢ်တူၢ်ဘၣ် လၢအမ့ၢ် ပတၢ်ဂံၢ်စၢ်ဘါစၢ်တဖၣ် ဒီး ပတၢ်အၢတၢ်သီတဖၣ်, ဘၣ်ဆၣ် အဝဲဒၣ် တမၤတၢ်ဒဲးဘး နီတဘျီဘၣ် (ကွၢ် ဧ့ၤဘြံၤ ၄း၁၅). ကစၢ်ယ့ၣ်ရှူးခရံာ်သ့ၣ်ညါ ပတၢ်တူၢ်ဘၣ် လီၤတံၢ်လီၤ ဆဲး, ဒီးအိၣ်ဒီး တၢ်ကွဲမုာ်လၢ ပဝဲကိးဂၤဒဲးအဂီၢ် လၢပကလဲၤဆူအအိၣ် တဘျီဂ့ၤတဘျီဂ့ၤလီၤ. ပလဲၤဆူအအိၣ် သ့ဒ်ပမ့ၢ်တၢ်အသိးလီၤ.
