တုၤယလဲၤလၢ တၢ်သံအကဒု အကစၢၢ်ကဆူးပူၤဒၣ်လဲၥ်န့ၣ်, ယတပျံၤဘၣ်တၢ်အၢဘၣ်. အဂ့ၢ်ဒ်အံၤ, နအိၣ်ဒီး ယၤလီၤ. နနီၣ်ထိးဘိ ဒီး နနီၣ်ထိးတဘိ န့ၣ် မၤမုၥ်ထီၣ်က့ၤယၤလီၤ. (စံးထီၣ်ပတြၢၤ ၂၃း၄).တၢ်ဟါမၢ်န့ၣ် မ့ၢ်တၢ်ဂ့ၢ်ညီနုၢ်မၤအသးလၢ သးအတၢ်တူၢ်ဘၣ်အဂီၢ်လီၤ. တၢ်ဟါမၢ် ကဲထီၣ်အသး သ့ အါမံၤ, လၢအမ့ၢ် နတၢ်ဖံးတၢ်မၤ, နတၢ်အိၣ်ဆူၣ်အိၣ်ချ့, နကျိၣ်နစ့, နတၢ်ဘၣ်သူၣ်ဘၣ်သး, မ့တမ့ၢ် ပှၤလၢနအဲၣ် တဂၤလီၤ.
ဖဲပှၤတဂၤဂ့ၤတဂၤဂ့ၤ လဲၤခီဖျိဘၣ် တၢ်ဟါမၢ်န့ၣ်, နကထံၣ်ဘၣ် တၢ်ညီနုၢ်ကဲထီၣ်အသး ဒီးအီၤခံမံၤ, တၢတမံၤ န့ၣ်မ့ၢ် တၢ်ပျံၤတၢ်ဖုး, ဒီးခံမံၤတမံၤန့ၣ် မ့ၢ် တၢ်သူၣ်အုးသးအုး န့ၣ်လီၤ.
တၢ်သူၣ်အုးသးအုးန့ၣ် မ့ၢ်တၢ်လၢအဂ့ၤလီၤ. တၢ်သူၣ်အုးသးအုးန့ၣ် မ့ၢ်ကျဲလၢ ပကလဲၤခီဖျိ တၢ်အိၣ်မူအတၢ် ဆီတလဲန့ၣ်လီၤ. အနီၢ်ကီၢ်န့ၣ်, နမ့ၢ်တသးအုးဘၣ်န့ၣ်, နကအိၣ်ပတုၥ်လၢတၢ်ဖးဖီလီၤ.
တၢ်ပျံၤတၢ်ဖုးတခီ မ့ၢ်တၢ်လၢအတဂ့ၤဘၣ်တခါလီၤ. လံၥ်စီဆှံတတဲပှၤနီတဘျီလၢ “သးအုးတဂ့ၤ,” “ဟီၣ်တၢ် ယၢၤတၢ်တဂ့ၤ,” “ဟီၣ်ကသွံတဂ့ၤ.” ဘၣ်ဆၣ်လံၥ်စီဆှံတဲဘၣ်ပှၤလၢ, “ပျံၤတၢ်တဂ့ၤ.” လံၥ်စီဆှံတဲဝဲ အဘျီ ၃၆၅ ဘျီညါ. တၢ်သူၣ်အုးသးအုးတမၤသံပှၤတခီပၤဘၣ်. ဘၣ်ဆၣ် တၢ်ပျံၤမၤဝဲလီၤ.
စီၤဒၤဝံးစံးဝဲဖဲ ထါစံးထီၣ်ပတြၢၤ ၂၃း၄ န့ၣ် စံးဝဲ, “တုၤယလဲၤလၢ တၢ်သံအကဒု အကစၢၢ်ကဆူးပူၤဒၣ်လဲၥ်န့ၣ်, ယတပျံၤဘၣ်တၢ်အၢဘၣ်. အဂ့ၢ်ဒ်အံၤ, နအိၣ်ဒီး ယၤလီၤ. နနီၣ်ထိးဘိ ဒီး နနီၣ်ထိးတဘိ န့ၣ် မၤမုၥ်ထီၣ်က့ၤ ယၤလီၤ.”
ဖဲထါစံးထီၣ်ပတြၢၤအံၤ ဘၣ်တၢ်ကွဲးအီၤအဆၢကတီၢ်, ပှၤကွၢ်သိဖိတဖၣ် ညီနုၢ်စိၥ်ဝဲဒၣ် နီၣ်ထိးဘိ ဒီး နီၣ်ထိးတဘိ လၢကဒီသဒၢ အသိတဖၣ်အဂီၢ်လီၤ. လၢကျဲတဘိဃီအံၤအပူၤ, စီၤဒၤဝံးသ့ၣ်ညါဝဲလၢ ကစၢ်ယွၤန့ၣ် အိၣ်ဒီး တၢ်ပီးတၢ်လီတဖၣ်လၢ ကဒီသဒၢ အီၤလီၤ. ဒီးအဝဲဒၣ် နၥ်န့ၢ်ယွၤ, လၢ တၢ်ခံးယုၢ်ကလၥ်အကစၢၢ်ကဆူး အပူၤဒၣ်လဲၥ်လီၤ.
ဘၣ်သ့ၣ်သ့ၣ် အခဲအံၤ နကလဲၤခီဖျိဘၣ် တၢ်အကဒုအကစၢၢ်ကဆူးလီၤ. ဘၣ်တဘၣ်ကမ့ၢ် ဒ့ၣ်ကမၣ်အကဒု အကစၢၢ်ကဆူးလီၤ. ဘၣ်တဘၣ် ကမ့ၢ် တၢ်သဘံၣ်ဘုၣ် အကဒုအကစၢၢ်ကဆူးလီၤ. ဘၣ်တဘၣ် ကမ့ၢ် တၢ်သး ဟးဂီၤ အကဒုအကစၢၢ်အကဆူးလီၤ. ဘၣ်တဘၣ် ကမ့ၢ် တၢ်ဂံၢ်စၢ်ဘါစၢ် အကဒုအကစၢၢ်အကဆူးအပူၤလီၤ.
တၢ်ကဒုန့ၣ်မ့ၢ်တၢ်လၢ အလီၤပျံၤလီၤ. သ့ၣ်နီၣ်ထီၣ်လၢ နနီၣ်ဆံးအခါ ဖဲနမံနီၤလၢနလီၢ်မံခိၣ် န့ၣ် နပျံၤ တၢ်ကဒု တဖၣ်န့ၣ်တက့ၢ်. တၢ်ကဒုန့ၣ် ပသ့ၣ်ညါအီၤသ့ဝဲခံမံၤ…
အခီၣ်ထံးတမံၤ, တၢ်ကဒုန့ၣ် မၤဆါနၤတသ့ဘၣ်.
ခံမံၤတမံၤ, တၢ်ကဒုန့ၣ်ညီနုၢ်ဒိၣ်န့ၢ်ဒံး တၢ်အက့ၢ်အဂီၤ တက့ၢ်လီၤ.
ဒီး တၢ်သးခုကစီၣ်န့ၣ်မ့ၢ်အအံၤ, တၢ်ကဒုမ့အိၣ်န့ၣ်, တၢ်ကပီၤကဘၣ်အိၣ်ဝဲလီၤ. တၢ်ကပီၤမ့တအိၣ်ဘၣ်န့ၣ် တၢ်ကဒုအိၣ်တသ့ဘၣ်. အဃိ, နီၣ်ဝံၥ်ခံန့ၣ်မ့ၢ်ဝဲ ဖဲနလဲၤခီဖျိ ဘၣ် တၢ်ကဒုအကစၢၢ်ကဆူးန့ၣ် ဃၣ်နချၢဆူ တၢ်ကဒုအအိၣ်, ဒီးကွၢ်တၢ်ဆူ တၢ်ကပီၤအအိၣ်တက့ၢ်. မ့ၢ်လၢ ဖဲနမဲၥ်ချံကွၢ်တၢ်ဆူတၢ်ကပီၤ လၢအမ့ၢ် ယ့ၣ်ရှူး အအိၣ်, ဟီၣ်ခိၣ်အတၢ်ကပီၤအအိၣ်အခါန့ၣ်, တၢ်ကဒုမၤပျံၤနၤတသ့ဘၣ်.
အဝဲန့ၣ်မ့ၢ် ကျဲလၢ နကလဲၤခီဖျိ တၢ်သံအကဒုအကစၢၢ်အကဆူးလီၤ. အဝဲန့ၣ်မ့ၢ်ကျဲလၢ နကမၤစၢ်လီၤ နတၢ်သူၣ် အုးသးအုးတဖၣ်လီၤ. မ်နကအိၣ်ဒီးတၢ်နၥ်ကစၢ်ယွၤလၢ တၢ်ခံးယုၢ်ကလၥ်အကစၢၢ်ကဆူးအပူၤ, ဒ်စီၤဒၤဝံး အသိး, လၢအဘါ ထုက ဖၣ်, “တုၤယသးလီၤဘှံးလီၤဘှါဒီး သးဟးဂီၤန့ၣ်, အဝဲသ့ၣ်ညါ ယကဘၣ်မၤတၢ်မနုၤ လဲၣ်န့ၣ်လီၤ” (စံးထီၣ်ပတြၢၤ ၁၄၂း၃ ခ့ခါစှီၤကျိၥ်).
