ယစံးဘၣ်သုလၢ တၢ်န့ၣ်တဖၣ်, ဒ်သိး သုကအိၣ်ဒီး တၢ်ဃူတၢ်ဖိးလၢယပူၤလီၤ. လၢဟီၣ်ခိၣ်အံၤ, သုကဘၣ် တၢ်ဖှီၣ်လီၤ. ဘၣ်ဆၣ်ဒီး ပာ်သုသး ခူတလ့ၢ်တက့ၢ်. ယမၤနၢၤလံဟီၣ်ခိၣ်လံ. (ယိၤဟၣ် ၁၆း၃၃).ပှၤတနီၤနီၤအိၣ်ဒီးတၢ်ထံၣ်လၢအကမၣ်ဘၣ်ဃး ပှၤခရံာ်ဖိအတၢ်အိၣ်မူန့ၣ်လီၤ. ဖဲအဝဲသ့ၣ် ကဲထီၣ်ပှၤခရံာ်ဖိအခါ အဝဲသ့ၣ်မုၢ်လၢ်ဝဲလၢ တၢ်ကိးမံၤဒဲးကလဲၤအသး ဘျ့ဘျ့ဆှီဆှီလီၤ. ဘၣ်ဆၣ်, ကစၢ်ယ့ၣ်ရှူးခရံာ် တဲပှၤ လီၤတံၢ် လီၤဆဲးလၢ ကစၢ်ယွၤအဖိဒၣ်လဲာ် တၢ်နးတၢ်ဖှီၣ် ကဟဲဘၣ်အီၤလီၤ (ယိၤဟၣ် ၁၆း၃၃). ကစၢ်ယ့ၣ်ရှူးခရံာ် အကစၢ်ဒၣ်ဝဲ ဘၣ်လဲၤခီဖျိဝဲဒၣ် တၢ်နးတၢ်ဖှီၣ် တၢ်ကီတၢ်ခဲတဖၣ်လီၤ.
အဃိ, ပမ့မ့ၢ် ပှၤလၢအပိာ်ကစၢ်ယ့ၣ်ရှူးခရံာ်အခံန့ၣ်, ပကဘၣ်သ့ၣ်ညါလၢ တၢ်နးတၢ်ဖှီၣ် ကဟဲဘၣ်ပှၤ, ဒ်ထံကီၢ်တၢ်အိၣ်သး အိၣ်ဝဲအသိးလီၤ. ပှၤတနီၤနီၤ ဂဲၤဆၢထၢၣ်က့ၤသ့လၢ တၢ်အိၣ်သးအကီအခဲအပူၤ အသိး, ပှၤတနီၤနီၤ ဘၣ်လဲၤခီဖျိ တၢ်တကနၣ်ဃုာ်, တၢ်ဒဲးဘး, ဒီး တၢ်ဆၢတဲာ်လၢ အကမၣ်တဖၣ်လီၤ. တၢ်လၢ ကမၤအသးသ့ အိၣ်စ့ၢ်ကီးဝဲ, လၢအမ့ၢ် တဘျီတခီၣ် ကစၢ်ယွၤပျဲပလဲၤခီဖျိ တၢ်မၤကွၢ်တဖၣ်လီၤ. ဖဲတၢ်ဆၢကတီၢ် အကီအခဲ အပူၤ, ပကတူၢ်လိာ် တၢ်မၤကွၢ်လၢ ကစၢ်ယွၤပျဲ ပလဲၤခီဖျိအီၤန့ၣ် ကမ့ၢ်တၢ်လၢ အကီဝဲခဲဝဲ, ဘၣ်ဆၣ် ပကဘၣ် သ့ၣ်ညါလၢ မ့တမ့ၢ်လၢ ကစၢ်ယွၤအိၣ်ဒီး တၢ်တိာ်လၢအဂ့ၤလၢပဂီၢ်ဘၣ်န့ၣ်, အဝဲဒၣ်တပျဲ ပလဲၤခီဖျိ တၢ်ကီတၢ်ခဲ အံၤဘၣ်. ဒီးအဝဲဒၣ်အၢၣ်လီၤစ့ၢ်ကီးပှၤလၢ ကဟ့ၣ်ပှၤ တၢ်ဂံၢ်တၢ်ဘါဒ်သိး ပလဲၤခီဖျိအီၤကသ့အဂီၢ် လီၤ.
အဃိ, ဖဲပဘၣ်လဲၤခီဖျိ တၢ်နးတၢ်ဖှီၣ် အဆၢကတီၢ်, တၢ်အရ့ဒိၣ်ကတၢၢ်လၢ ပကဘၣ်သ့ၣ်နီၣ်ထီၣ်က့ၤအီၤန့ၣ်, တၢ်နးတၢ်ဖှီၣ် တဖၣ်အံၤ မ့ၢ်တၢ်လၢအကမၤဘျုးပှၤအဂီၢ်လီၤ. ဘၣ်တဘၣ် တၢ်သ့ၣ်တဖၣ်အံၤ ကမ့ၢ်တၢ်လၢ ကမၤကဆှီက့ၤပှၤ ဒီး မၤအါထီၣ်ပတၢ်စူၢ်တၢ်နာ်အဂီၢ်လီၤ. ဘၣ်တဘၣ်, ကစၢ်ယွၤအတၢ်တိာ်န့ၣ်မ့ၢ်လၢ ကမၤကွၢ် ပတူၢ်ခီၣ်တၢ်န့ၢ်စံးအါ, ပတၢ်ဟ့ၣ်လီၤပသးလၢ ယွၤအဂီၢ်အိၣ်ထဲလဲၣ်, ဒီး ကမၤဆူၣ်ထီၣ် ပတၢ်စူၢ်တၢ်နာ် အဂီၢ်လီၤ. မ့တမ့ၢ်ဘၣ် တခီ, ကစၢ်ယွၤအဲၣ်ဒိးပာ်ဖျါထီၣ် အဝဲဒၣ်အတၢ်စိတၢ်ကမီၤ အဂီၢ်လီၤ. ဖဲပလဲၤခီဖျိ တၢ်နးတၢ်ဖှီၣ် အဆၢကတီၢ်, ပနာ်ကစၢ်ယွၤအတၢ်သကဲာ်ပဝးဒီး အတၢ်သ့တၢ်ဘၣ် လၢကမၤပူၤဖျဲးပှၤအံၤ သ့ဝဲဒၣ် လီၤ.
တၢ်မၤကွၢ်လၢနဘၣ်လဲၤခီဖျိအီၤမ့ၢ်တၢ်မနုၤလဲၣ်. ကစၢ်ယ့ၣ်ရှူးခရံာ်သ့ၣ်ညါ နတၢ်တူၢ်ဘၣ်ခီၣ်ဘၣ်တဖၣ် ဒီး အဲၣ်ဒိးဝဲလၢ နကသုးဘူးနသးဆူအအိၣ် ဖဲတၢ်ဆၢကတီၢ်ဂ့ၤမ့ၢ်ဂ့ၤ, အၢမ့ၢ်ဂ့ၤအပူၤလီၤ.
