ယကဟ့ၣ်လီၤသုလၢ တၢ်စူၤလၢအဆၢအကတီၢ်ဒၣ်ဝဲ, ဒီး ဟီၣ်ခိၣ်ကဟ့ၣ်အတၢ်အါထီၣ် ဒီးသ့ၣ်လၢ ပှၢ်လၢ်ကျါန့ၣ် အတၤသၣ်, - (၃ မိၤရှ့ -၂၆း၄).လံာ်စီဆှံအဆၢဖိလၢတနံၤအံၤအပူၤ, ကစၢ်ယွၤအၢၣ်လီၤလၢ ကဆှၢလီၤ တၢ်စူၤလၢ “အဆၢအကတီၢ် ဒၣ်ဝဲ” လီၤ. ဘၣ်ဃး “အဆၢအကတီၢ်ဒၣ်ဝဲ” အပူၤအံၤ ပမၤလိန့ၢ်တၢ်အါမးဘၣ်ဃး တၢ်ပၢဆှၢ ပသး အတၢ်တူၢ်ဘၣ်တဖၣ် သ့ဝဲဒၣ်န့ၣ်လီၤ. အခီပညီလၢ ကစၢ်ယွၤအိၣ်ဒီး တၢ်ဆၢကတီၢ်လၢ အလီၤဆီ, လၢ ကမၤလၢပှဲၤ ပတၢ်လိၣ်ဘၣ်တဖၣ် ဒီး ဆှၢလီၤ တၢ်ဆိၣ်ဂ့ၤဆိၣ်ဝါ တဖၣ် လၢအပာ်ကီၤ န့ၢ်လၢ ပဂီၢ်လီၤ. အတၢ်ဆၢကတီၢ်န့ၣ် တမ့ၢ်ပတၢ်ဆၢကတီၢ် ထီဘိဘၣ်, ဒီး တမၤတၢ်လၢပဂီၢ်ထီဘိဖဲ ပဆိကမိၣ်လၢ အကဘၣ်မၤဝဲအခါဘၣ်. ဘၣ်ဆၣ် ကစၢ်ယွၤသ့ၣ်ညါ ဂ့ၤန့ၢ်ဒံးပှၤ, ဒီး အတၢ်ဆၢကတီၢ် မ့ၢ်တၢ်လၢတၢ်ပှဲၤ လီၤ.
ဖဲပသ့ၣ်ညါလၢ ကစၢ်ယွၤအိၣ်ဒီး တၢ်အဆၢအကတီၢ်ဒၣ်ဝဲလၢတၢ်ကိးမံၤဒဲး အဂီၢ်န့ၣ်, ပမၤစ့ၢ်ကီးတၢ်လၢ ပတၢ်တူၢ်ဘၣ် တဖၣ်အဂီၢ်, ဒ်အမ့ၢ် တၢ်ပျံၤတၢ်ဖုး, တၢ်သးဘၣ်ဖှီၣ်, ဒီး တၢ်ကိၢ်တၢ်ဂီၤတဖၣ် သ့ဝဲဂ့ၤဂ့ၤ လီၤ. ပအိၣ်မုာ်က့ၤပသးသ့ဝဲ, အိၣ်ဒီးတၢ်သူၣ်စူၤသးစူၤ, ဒီးနာ်အီၤလၢကမၤ တၢ်လၢပအဲၣ်ဒိးလၢအကမၤ ဖဲ တၢ်ဆၢကတီၢ်ဘၣ်ဝဲအခါလီၤ. တလိၣ်ပမၤဆူၣ်တၢ်နီတမံၤ လၢကကဲထီၣ်သးအဂီၢ်ဘၣ်. ပအိၣ်ဘှံး လၢ ယွၤအပူၤ တုၤလၢယွၤအတၢ်ဆၢကတီၢ်ဘၣ်သ့ဝဲန့ၣ်လီၤ.
ပှၤကိးဂၤဒဲးလၢ အလဲၤတၢ်ဒီးကစၢ်ယွၤန့ၣ် အိၣ်ဒီး အတၢ်ခွဲးတၢ်ယာ် ဒီးအမူဒါတၢ်ဖံးတၢ်မၤလၢ ကဟ့ၣ်လီၤ အးလီၤအတၢ်ဘၣ်သးဆူ ကစၢ်ယွၤအတၢ်ဘၣ်သးအအိၣ်, ကစၢ်ယွၤအတၢ်တိာ်ပာ်တဖၣ်, ဒီး ကစၢ်ယွၤ အတၢ်သုးတၢ်ကျဲၤတဖၣ် အအိၣ်န့ၣ်လီၤ. ဒီးကစၢ်ယွၤ အတၢ်ဆၢကတီၢ်မ့ၢ် အတၢ်ဘၣ်သး အကျါ တခါ လီၤ. တဘျီတခီၣ်, ကစၢ်ယွၤအတၢ်ဘၣ်သးန့ၣ် ကဟံးန့ၢ်တၢ်ဆၢကတီၢ်ယံာ်မး, တဘျီ တခီၣ် ကယံာ် န့ၢ်ဒံးပအဲၣ်ဒိးအီၤဒံး, အဃိ ပကဘၣ်လဲၤခီဖျိ တၢ်ဆၢကတီၢ်ဖးယံာ် လၢတၢ်အိၣ်ခိးတၢ် အဂီၢ်လီၤ.
ဖဲပအိၣ်ဒီး တၢ်ပာ်လီၤသးလၢအဂ့ၤန့ၣ်, တၢ်အိၣ်ခိးတၢ်န့ၣ် မ့ၢ်တၢ်ညီညီဖိလီၤ. အခီၣ်ထံးကတၢၢ်, ပကဃုထၢ နာ်ကစၢ်ယွၤအတၢ်ဆၢကတီၢ်လၢအမ့ၢ်တၢ်လၢတၢ်ပှဲၤန့ၣ်တက့ၢ်. ခံမံၤတမံၤန့ၣ်, ပကအိၣ်ဒီး တၢ်ပာ်လီၤသး လၢပကနာ်အီၤလၢာ်လၢာ်ဆ့ဆ့န့ၣ်တက့ၢ်. သၢမံၤတမံၤ, ပကသူပတၢ်အိၣ်ခိးတၢ်အဆၢ ကတီၢ် လၢပကမၤအတၢ်မၤ ဒီး မၤတၢ်ဂ့ၤလၢပှၤဂၤအဂီၢ် ဒ်ပမၤသ့အသိးန့ၣ်တက့ၢ်. အခဲအံၤ နမ့ၢ်အိၣ်ခိး တၢ်တမံၤမံၤန့ၣ်, မ်နကဒိးန့ၢ်တၢ်ဂံၢ်တၢ်ဘါတက့ၢ်. ဖဲကစၢ်ယွၤအဆၢကတီၢ်ဘၣ်ဝဲန့ၣ် အဝဲဒၣ်ကမၤ လၢပှဲၤဝဲလီၤ.
