လံာ်စီဆှံအပူၤ, ပဖးဘၣ်တၢ်ဆၢကတီၢ်တဘျီဖဲ ယ့ၣ်ရှူးသိၣ်လိ အပျဲၢ်အဘီၣ်လၢ ကအိၣ်ကတဲာ် ကတီၤအသး ဖဲအဝဲဒၣ်ဟဲက့ၤ ကဒါက့ၤခံဘျီတဘျီ အဆၢကတီၢ်လီၤ. အဝဲတဲဘၣ်အပျဲၢ်အဘီၣ်လၢ တၢ်အဒိအတဲာ် တခါ လၢ ကမၤစၢၤအဝဲသ့ၣ် လၢကနၢ်ပၢၢ် တၢ်အိၣ်ကတဲာ်ကတီၤသးန့ၣ် လီၤဂာ်ဒ်လဲၣ် လီၤ. တၢ်အဒိအတဲာ်န့ၣ်မ့ၢ် တၢ်ဃဲၤ ပူတခါလၢ မၤစၢၤပှၤဒ်သိး ပကနၢ်ပၢၢ် တၢ်လၢအရ့ဒိၣ်တမံၤအဂီၢ်လီၤ. တၢ်အဒိအတဲာ်တခါန့ၣ်မ့ၢ်ဒ်အံၤ -
တဘျီန့ၣ် တၢ်ဖျီအမူးဖးဒိၣ်အိၣ်ဝဲတမူးလီၤ. တၢ်ဖျီအမူးအံၤ မ့ၢ်မူးဖးဒိၣ်တခါ အဃိ မုၣ်ကနီၤ ထီၣ်ဆှၢ တလးမူးပိာ်မုၣ် အိၣ်ဝဲ အဂၤတဆံညါလီၤ. မုၣ်ကနီၤတဖၣ်အံၤ ကဘၣ်မၤစၢၤ တလးမူး ပိာ်မုၣ် လၢ ကအိၣ်ကတဲာ် ကတီၤအသး လၢ တၢ်ဖျီအဂီၢ်လီၤ. အဆၢကတီၢ်ဖဲန့ၣ် တၢ်ဖျီန့ၣ် ဘၣ်တၢ် စးထီၣ်အီၤ လၢ မုၢ်နၤခီလီၤ. ပှၤကိးဂၤဒဲး သ့ၣ်ညါလၢ မုၢ်နၤခီအဆၢကတီၢ်တဘျီဘျီန့ၣ် တလးမူးပိာ်ခွါ ကဟဲဆူ တလးမူးပိာ်မုၣ် အဟံၣ် ဒီး ကကိးထီၣ် တလးမူးပိာ်မုၣ်လီၤ. ဖဲန့ၣ်အဆၢကတီၢ် မုၣ်ကနီၤဆံဆဲၣ်ဂၤအံၤ ကဘၣ်ဒွဲၣ်ထီၣ် အမ့ၣ်အူဒၢသိအတၢ်ကပီၤ, ဒီးဖဲန့ၣ် တလးမူးပိာ်မုၣ်ဒီး တလးမူးပိာ်ခွါ ခံဂၤ ကထံၣ်လိာ် သးလီၤ. တလးမူးပိာ်ခွါအံၤ ကသူၣ်ခုသးခုဒိၣ်မး မ့ၢ်လၢ ကထံၣ်ဘၣ်တလးမူး ပိာ်မုၣ် လၢ အဒိၣ်တၢ်ဂ့ၤမး အဃိ လီၤ.
ပှၤကိးဂၤဒဲးကဘၣ်ဒွဲၣ်ထီၣ်အမ့ၣ်အူဒၢအတၢ်ကပီၤ ဒ်သိး အဝဲသ့ၣ်ကလဲၤဆူ တလးမူးပိာ်ခွါ အဟံၣ် အဂီၢ်လီၤ. ဒီးဖဲန့ၣ် တၢ်ဂဲၤကလံၣ်, တၢ်အီၣ်တၢ်အီ, ဒီးတၢ်သူၣ်ဖှံသးညီတဖၣ် တၢ်ကမၤအီၤဖဲ တၢ်ဖျီအဆၢ ကတီၢ်လီၤ.
ဖဲယ့ၣ်ရှူး အတၢ် အဒိအတဲာ်အပူၤန့ၣ်, အဝဲတဲဘၣ်ဃး တၢ်မၤအသး ဘၣ်ဃး ပိာ်မုၣ်ဆံဆဲၣ်ဂၤ အဂ့ၢ် ဖဲအဝဲသ့ၣ်အိၣ်ကတဲာ်ကတီၤအသးလၢ တၢ်ဖျီအဂီၢ်အခါလီၤ. ပိာ်မုၣ်အကျါယဲၢ်ဂၤန့ၣ်ကူၣ်တၢ်သ့, အဃိ အဝဲသ့ၣ် သ့ၣ်ညါလၢ တလးမူးပိာ်ခွါ အတၢ်ဟဲန့ၣ် တဘျီတခီၣ် ဘၣ်အိၣ်ခိးအီၤ ဖးယံာ်ညါလီၤ. အဃိ, ပိာ်မုၣ်လၢအကူၣ် တၢ်သ့ယဲၢ်ဂၤအံၤ ဟဲစိာ်ဃုာ်ဒီး သိလၢအပိၣ်လၢ အမ့ၣ်အူဒၢအဂီၢ်လီၤ. အဝဲသ့ၣ် အဲၣ်ဒိးအိၣ်ကတဲာ်ကတီၤအသး ဖဲတလးမူးပိာ်ခွါ မ့ၢ်ဟဲတုၤစဲၤခံအခါလီၤ.
မ့မ့ၢ်ပိာ်မုၣ်အဂၤယဲၢ်ဂၤန့ၣ် မ့ၢ်ပိာ်မုၣ်လၢအဟးဂီၤလီၤ. အဝဲသ့ၣ်တဆိကမိၣ်လၢ ကဟဲစိာ် သိလၢ အပိၣ် ဘၣ်.
ဖဲမုၣ်ကနီၤဆံဆဲၣ်ဂၤ ကတဲာ်ကတီၤတလးမူးပိာ်မုၣ်ဝံၤ, အဝဲသ့ၣ်အိၣ်ခိး တလးမူးပိာ်ခွါ အတၢ် ဟဲလီၤ. အဝဲသ့ၣ်ဒွဲၣ်ထီၣ်ပာ်စၢၤအမ့ၣ်အူဒၢအတၢ်ကပီၤ မ့ၢ်ဒ်သိး ဖဲတလးမူးပိာ်ခွါဟဲအခါ အဝဲသ့ၣ် ကတူၢ်လိာ်ဝဲ အဂီၢ်လီၤ. ဘၣ်ဆၣ်, တၢ်ဆၢကတီၢ်လဲၤအသးတဆဲးဘၣ်တဆဲး အဃိ တလးမူးပိာ်မုၣ်ဂ့ၤ မုၣ်ကနီၤဆံဆဲၣ်ဂၤဂ့ၤ အဲၣ်ဒိးမံအဃိ မံဘၣ် အသးလီၤ.
ဖဲန့ၣ်သတူၢ်ကလာ်, ပှၤတဂၤကိးပသူထီၣ်, “တလးမူးပိာ်ခွါဟဲလံ, ဟဲထီၣ်ဆူတၢ်ချၢဒီး သဂၢၢ်အီၤ တက့ၢ်.”
တလးမူးပိာ်မုၣ်ဒီး မုၣ်ကနီၤကိးဂၤဒဲး ပၢၢ်ထီၣ်ဝဲလီၤ. အဝဲသ့ၣ်မၤဂ့ၤထီၣ်အမ့ၣ်အူဒၢ ဒ်သိး အမ့ၣ် အူဒၢ ကကပီၤဂ့ၤဂ့ၤအဂီၢ်လီၤ. မုၣ်ကနီၤဟးဂီၤယဲၢ်ဂၤ သ့ၣ်ညါဝဲလၢ အမ့ၣ်အူဒၢ အသိလၢာ်ကွံာ်လံ. အဝဲ သ့ၣ်ဃ့ မုၣ်ကနီၤကူၣ်တၢ်သ့ယဲၢ်ဂၤန့ၣ် အသိ တနီၤ, ဘၣ်ဆၣ် ပိာ်မုၣ်ကူၣ်တၢ်သ့ယဲၢ်ဂၤန့ၣ် အသိအပိၣ် တအိၣ် လၢၤဘၣ်. အသိအိၣ်ဒၣ်ထဲအမ့ၣ်အူဒၢအဂီၢ်လီၤ.
ပိာ်မုၣ်ဟးဂီၤယဲၢ်ဂၤန့ၣ် ကဘၣ်ဂုာ်ကျဲးစၢးလဲၤဃုအါထီၣ်သိလၢ အမ့ၣ်အူဒၢအဂီၢ်လီၤ. အဝဲသ့ၣ် လဲၤပိာ် တလးမူးပိာ်မုၣ်အခံ ဒ်သိး ကလဲၤသဂၢၢ်တလးမူးပိာ်ခွါအဂီၢ်တသ့ဘၣ်. အဝဲသ့ၣ်တလဲၤဘၣ်ဒီး အသကိးအဂၤ တဖၣ်ဆူ တၢ်ဖျီအလီၢ်ဘၣ်. အဝဲသ့ၣ်အတၢ်မၤအါလၢ ကဘၣ်ဃုအါထီၣ်သိအဂီၢ်လီၤ.
ဖဲပိာ်မုၣ်ကူၣ်တၢ်သ့ယဲၢ်ဂၤ ဒီး ပှၤအဂၤတဖၣ် လဲၤတုၤဆူ တလးမူးပိာ်ခွါအဟံၣ်န့ၣ်, အဝဲသ့ၣ် လဲၤနုာ်ဆူ ဟံၣ်ပူၤဒီး တၢ်ဖျီအမူးစးထီၣ်အသးလီၤ. တလးမူးပိာ်ခွါ ကးတံာ်က့ၤအဟံၣ်အတြဲၤ ဒ်သိး ပှၤစီစၣ် နုာ်လီၤ သုတသ့တဂ့ၤ အဂီၢ်လီၤ. ဖဲပိာ်မုၣ်ဟးဂီၤယဲၢ်ဂၤ လဲၤတုၤဆူ တလးမူးပိာ်ခွါ အဟံၣ် အတြဲၤခီၣ်ထံးန့ၣ် တၢ်တပျဲနုာ် အဝဲသ့ၣ်လၢဟံၣ်ပူၤလၢၤဘၣ်. မ့ၢ်လၢ တလးမူးပိာ်ခွါဒၣ်လဲာ် တသ့ၣ်ညါ အဝဲသ့ၣ်ဘၣ်အဃိလီၤ.
တၢ်အဒိအတဲာ်အံၤ မၤစၢၤပှၤဒ်သိး ပကနၢ်ပၢၢ် တၢ်ကမၤအသးဖဲ ယ့ၣ်ရှူး ဟဲက့ၤကဒါက့ၤ ခံဘျီတဘျီ အဆၢကတီၢ် လီၤ. ယ့ၣ်ရှူးကဟဲက့ၤအခါဖဲလဲၣ်, အဆၢကတီၢ်ဖဲလဲၣ်န့ၣ် မတဂၤမး တသ့ၣ် ညါဘၣ်. ပကဘၣ်အဲၣ်ကစၢ်ယွၤ ဒီးဒိကနၣ်အကလုၢ်ထီဘိ, အန့ၣ်မး ပကမ့ၢ်ပှၤလၢ အအိၣ်ကတဲာ် ကတီၤ အသး ဖဲယ့ၣ်ရှူးဟဲက့ၤအခါလီၤ.
