စီၤနဧၤမၣ် အိၣ်ဒီး တၢ်ဆါအၢ, လၢအဒုးကဲထီၣ်အီၤလၢ ပှၤလၢအမၤလၢပှဲၤအမူအဒါတန့ၢ်ဘၣ် တဂၤ လီၤ. မ့တမ့ၢ် ဘၣ်လၢ အမၤဘျါက့ၤ အတၢ်ဆါဘၣ်န့ၣ် အဝဲဆှၢ ကီၢ်စူၤရံအသုးမုၢ်လၢ တၢ်မၤနၢၤ တသ့လၢၤ ဘၣ်. မ့ၢ်လၢ စီၤနဧၤမၣ် အပတီၢ်အဃိ, အဝဲဒိးန့ၢ်တၢ်ပျဲလၢ ကအိၣ်လၢဟံၣ်, ဘၣ်သ့ၣ်သ့ၣ် ကအိၣ်ဒၢးလီၤဆီဒီး အဟံၣ်ဖိ ဃီဖိအဂၤတဖၣ်လီၤ.
ကုၢ်ပိာ်မုၣ်ဖိလၢ အဟဲလၢ အံၣ်စရ့လး အံၤ အဲၣ်ဒိးမၤစၢၤ အကစၢ်န့ၣ် မ့ၢ်တၢ်လၢအလီၤ ကမၢကမၣ် ဒိၣ်မး လီၤ. အဃိ, အဝဲတဲဘၣ် စီၤနဧၤမၣ်အမါ ဘၣ်ဃး ဝံတဂၤလၢအအိၣ်လၢ ရှၤမရံ (ကီၢ်အံၣ်စရ့လး အဝ့ၢ် ခိၣ်), လၢအမ့ၢ် ဝံ အလံၤ ရှါ တဂၤ, မၤဘျါအဝၤ အတၢ်ဆါ သ့ဝဲလီၤ. တၢ်ဂ့ၢ်လၢ စီၤနဧၤမၣ် မၤဒ် ပိာ်မုၣ်ဖိ တဂၤ အံၤ အတၢ်ဟ့ၣ်ကူၣ်အသိး န့ၣ် ဒုးနဲၣ် ဖျါထီၣ်လၢ အဝဲအဲၣ်ဒိးဝဲဒိၣ်မးလၢ အကဘျါက့ၤ, ဒီး အိၣ်စ့ၢ်ကီးဒီး တၢ်ပာ် ကဲ ပိာ်မုၣ်ဖိတဂၤအံၤအဃိလီၤ.
အဝဲလဲၤစိာ်ဒီးလံာ်ပရၢတဘ့ၣ်လၢ အစီၤပၤ ဘ့ၣ်ဟဒးဟ့ၣ်လီၤဝဲ, ဃုာ်ဒီး တၢ်ဟ့ၣ်တဖၣ်လၢအမ့ၢ် ထူ, စ့, ဒီး တၢ်ကူတၢ်သိး တဖၣ်, ဒီးလဲၤဝဲဆူ အံၣ်စရ့လး အစီၤပၤအအိၣ်လၢ ကဃ့တၢ်မၤစၢၤလၢ ဝံအလံၤရှါ အအိၣ် အဂီၢ် လီၤ. ဘၣ်ဆၣ် လံာ်ပရၢ န့ၣ် မၤပျံၤမၤဖုး စီၤယဟိရၣ် (အံၣ်စရ့းလးအစီၤပၤ) ဒိၣ်မးလီၤ. အဝဲဆိကမိၣ်လၢ စီၤပၤ ဘ့ၣ်ဟဒး ဂုာ်ကျဲး စၢးလၢ ကဒုး တၢ်ဒီးအီၤလီၤ. အဝဲအတၢ်စိကမီၤတအိၣ်နီတမံၤလၢ ကမၤဘျါ ပှၤတဂၤ အံၤဘၣ်. ဘၣ်ဆၣ်, အဝဲမ့ၢ် သမၢဝဲလၢ ကမၤဘျါ စီၤနဧၤမၣ်န့ၣ်, စူၤရံအစီၤပၤ ကသးဒိၣ်ထီၣ်ဒီး ကဒုး အံၣ်စ ရ့လး လီၤ.
ကစၢ်ယွၤသူ ဝံအလံၤရှါလၢ ကနုာ်လီၤလၢတၢ်ဂ့ၢ်အံၤအပူၤလီၤ. ဝံအလံၤရှါ နၢ်ဟူဘၣ်ဃး လံာ်ပရၢအံၤ အဂ့ၢ်ဒီး တဲဘၣ် စီၤပၤ ယဟိရၣ် လၢအသုတသးဒိၣ်ထီၣ်ဒီး ပျံၤတၢ်တဂ့ၤအဂီၢ်လီၤ. ကစၢ်ယွၤကမၤဘျါ စီၤနဧၤ မၣ် လီၤ. စီၤနဧၤမၣ် လဲၤဒီး အိၣ်ခိးဝဲလၢ ဝံအလံၤရှါ အဟံၣ်ချၢလီၤ. လၢတၢ်ပာ်ထီၣ်ထီသးအပူၤ, စီၤနဧၤမၣ် ကအိၣ်ဒီး တၢ်ဆိကမိၣ်ဆိပာ်စၢၤ ဘၣ်ဃး တၢ်ကမၤဘျါအီၤဒ်လဲၣ်အဂ့ၢ်လီၤ. အဝဲကမၢကမၣ်လၢ ဝံအလံၤရှါ တဟဲဆူ တၢ်ချၢ ဒီး ဆၢဂ့ၤအီၤဘၣ်လီၤ. မ့မ့ၢ် တခီ, ဝံဆှၢလီၤ အခ့အပှၤ တဂၤဆူ စီၤနဧၤမၣ်အအိၣ် ဒီးတဲအီၤ လၢ အကဘၣ် သ့စီအသး နွံဘျီလၢ ယၣ်ဒ့ၣ်ကျိအပူၤ လၢ ကဘျါက့ၤအဂီၢ်လီၤ.
လၢတၢ်သးဒိၣ်အပူၤ, စီၤနဧၤမၣ် လဲၤဝဲလီၤ. အဝဲဒုးနဲၣ်ဝဲလၢ ဒၤမ့စ့း အထံကျိတဖၣ် ကဆှီဒိၣ်န့ၢ်ဒံး ယၣ်ဒ့ၣ်ကျိ ဒံး လီၤ. အခ့အပှၤတဖၣ် တဲအီၤလၢ မ့ၢ်မၤဒ် ဝံအလံၤရှါတဲအီၤအသိးန့ၣ် ကညီဝဲလီၤ. အဝဲဆီတလဲ အတၢ်ဆိကမိၣ်, ဒီး ဒိကနၣ်ယွၤအဝံအကလုၢ်လၢတၢ်ဆီၣ်လီၤသးအပူၤ, ဒီးအတၢ်ဆါအၢန့ၣ် ဘၣ်တၢ်မၤဘျါအီၤ လီၤ.
ဝံအလံၤရှါအခ့အပှၤ န့ၣ်တဒ်သိးဒီး စီၤနဧၤမၣ်အခ့အပှၤဘၣ်, တမ့ၢ်တၢ်ခ့တၢ်ပှၤ လၢအသးတီတဂၤ ဘၣ်. စီၤက့ၤ ဃစံ ပာ်လီၤအသးလၢ ကဟံးန့ၢ်ကျိၣ်စ့လၢ တၢ်ဂ့ၢ်တခါအံၤအဃိလီၤ. ဝံအလံၤရှါ သမၢ စီၤနဟၤ မၣ် အတၢ်ဟ့ၣ် တဖၣ်ဝံၤ အလီၢ်ခံ, စီၤက့ၤဃစံ လဲၤဃ့ၢ်ပိာ် အခံဒီး ဃ့တၢ်ဟ့ၣ်တဖၣ်လီၤ. စီၤနဟၤမၣ် သးခုဝဲ လၢ ကဟ့ၣ်ဘၣ်တၢ်ဟ့ၣ်တဖၣ်ဒီး ကျိၣ်စ့တဖၣ်လီၤ. စီၤက့ၤဃစံ ပာ်ခူသူၣ်ကျိၣ်စ့တဖၣ်န့ၣ်, ဘၣ်ဆၣ် ဝံအလံၤ ရှါ သ့ၣ်ညါ ဝဲအတၢ်ဖံးတၢ်မၤ တဖၣ် တကီၢ်ခါ လီၤ. လီၢ်ခံကတၢၢ်, စီၤက့ၤဃစံ ဘၣ်တၢ်တီၢ်အီၤဒီး တၢ်ဆါအၢ လီၤ.
