ဒီးအဝဲဒၣ်စံးဘၣ်ယၤ, ယဘျုးယဖှိၣ် အါလံလၢ နဂီၢ်လံ. အဂ့ၢ်ဒ်အံၤ, ယစိယကမီၤ လၢထီၣ်ပှဲၤထီၣ် လၢ တၢ်အဂံၢ် စၢ်အဘါစၢ် အပူၤလီၤ. (၂ ကရံၣ်သူး - ၁၂း၉).လၢလံာ်စီဆှံအပူၤ တၢ်ဆီဟံၣ်ဆီဃီလၢ အဂ့ၤကတၢၢ်န့ၣ် နဆိကမိၣ် ကမ့ၢ် မတဂၤလဲၣ်. စီၤအၤဒၣ်ဒီး နီၢ်အံၣ်အု စးထီၣ်ဝဲလၢ ဧ့ၤဒ့ၣ်တၤသၣ်လီၢ်အပူၤ ဘၣ်ဆၣ် အတၢ်လဲၤကျဲ လီၤသထြုးလီၤ ဝဲဖဲန့ၣ်လီၤ. စီၤအၤဘြၤဟၣ် လီတၢ် ဒီးစံးဝဲလၢ အမါ, နီၢ်စၤရါ, မ့ၢ်အဒီပုၢ်ဝဲၢ်မုၣ်, ဝံၤအလီၢ်ခံ မံဃုာ်ဒီးအမါအကုၢ်ပိာ်မုၣ်, နီၢ်ဟၤကၢ် လီၤ. စီၤအံၤစဲး ဒီး နီၢ်ရံးဘကၤ မၤလၢာ်အတၢ်ဆၢကတီၢ်လၢ အတၢ်ဆီဟံၣ်ဆီဃီအပူၤ အါတက့ၢ်လၢ တၢ်တဘၣ်လိာ် ဖိးဒ့လိာ်သးအပူၤ ခီဖျိ စီၤအံၤစဲး အဲၣ်ဒိၣ်ဝဲ အဖိခွါအဒိၣ် စီၤဧ့စှီၤ, ဒီး နီၢ်ရံးဘကၤ အဲၣ်ဒိၣ်ဝဲ အဖိခွါအဆံး စီၤယၤကိာ် အဃိလီၤ.
စီၤယၤကိာ်ဒိးန့ၢ်အဖိတဖၣ် ခီဖျိ အမါခံဂၤ ဒီး အမါခံဂၤအကုၢ်ပိာ်မုၣ်တဖၣ် အဃိလီၤ. တၢ်လၢပသ့ၣ်ညါဘၣ်ဃး စီၤမိၤရှ့အမါအဂ့ၢ်န့ၣ် မ့ၢ်ဝဲ အဝဲသ့ၣ်အိၣ်ဒီး တၢ်တဲအါလိာ်သး ဘၣ်ဃး တၢ်ကူးတရံး အဖိခွါ, ဒီး အဝဲကိး စီၤမိၤရှ့ လၢ “တၢ်သွံၣ်အတလးမူးပိာ်ခွါ” လီၤ (၂ မိၤရှ့ - ၄း၂၆). ဒ်ဝၤတဂၤအသိး စီၤဒၤဝံး တဟံးန့ၢ်အမူဒါမူာ်မူာ်နီၢ်နီၢ်ဘၣ်, ဒီး စီၤရှလိၤမိၤန့ၣ် နးန့ၢ်ဒံး အပၢ်စီၤဒၤဝံးဒံး. ဖဲစီၤယိၤဘး အတၢ်အိၣ်မူ အိၣ်လၢတၢ်နးတၢ်ဖှီၣ်အပူၤအခါ, အမါစံး ဘၣ်အီၤ, “ဆိၣ်အၢယွၤဒီးသံတက့ၢ်” (ယိၤဘး ၂း၉).
လၢတၢ်ဃဲၤမုာ်နၢ် အပူၤ, ပကထံၣ်လၢ တၢ်အိၣ်မူန့ၣ် အိၣ်ဒီး တၢ်လဲၤခီဖျိလၢအကီဝဲခဲဝဲ တုၤလၢ နထီၣ်ပှၢ်တစု, ဝံၤဒီး နအိၣ်လၢတၢ်သူၣ်ခုသးခုအပူၤ တစိၤသးလီၤ. ဘၣ်ဆၣ် လံာ်စီဆှံတတဲပှၤဘၣ်ဃး ပှၤနီၢ်ဒီမါဝၤ ထီၣ်ပှၢ် ဝံၤဒီး အိၣ်မူလၢ တၢ်သူၣ်ခုသးခုအပူၤ တစိၤသးန့ၣ် တအိၣ်နီတဘျီဘၣ်. တၢ်ဆီဟံၣ်ဆီဃီ တမၤပူၤဖျဲးပှၤနီတဂၤ ဘၣ်. ထဲဒၣ်ယ့ၣ်ရှူးတဂၤမၤပူၤဖျဲးပှၤလီၤ. ဘၣ်ဆၣ်, လၢတၢ်အိၣ်ဖှိၣ်တဖၣ်အပူၤ နီၢ်ဒီမါဝၤတဖၣ် ဆ့ၣ်နီၤ ဒ်သိးသိးလၢ တၢ်ကစုဒုအပူၤ လၢအပှဲၤဒီး တၢ်သူၣ်အူသးကဲၤန့ၣ် အိၣ်တဘျီဘျီဧါ. အဝဲသ့ၣ် သ့ၣ်ညါ ကဘၣ် ဒိၣ်ထီၣ်လၢ နီၢ်သးတကပၤဒ်လဲၣ်, ဘၣ်ဆၣ် အဝဲသ့ၣ် ကဒဲကဒဲအပူၤ တၢ်ရ့လိာ်သးဘူးဘူးတံၢ်တံၢ် တအိၣ်ဘၣ်. မ့တမ့ၢ်ဘၣ်တခီ, တၢ်မၤနၢၤ မၤဃၣ်လိာ်သး အိၣ်ဝဲလၢ အဝဲသ့ၣ်ကဒဲကဒဲအပူၤအဃိလီၤ. မ့တမ့ၢ် ဘၣ်တခီ, အဖိမုၣ်ဒၢထီၣ်ဒီး တသ့ၣ်ညါဝဲ ကဘၣ်မၤမနုၤလဲၣ်န့ၣ်ဘၣ်. မ့တမ့ၢ်ဘၣ်တခီ, အဝဲသ့ၣ် အကျါ တဂၤဂၤ မ့ၢ်ပှၤသူတၢ်မူၤတၢ်ဘှီး အဃိလီၤ. မ့တမ့ၢ်ဘၣ်တခီ, အဝဲသ့ၣ်ဘၣ်သဂၢၢ်ဒီး ကျိၣ်စ့တၢ်ဖှီၣ်တၢ်ယာ် အဃိ လီၤ.
ပှၤလၢအလိၣ်ဘၣ် တၢ်မၤစၢၤတဖၣ် ညီနုၢ် ဒိးန့ၢ်ဝဲလၢ လီၢ်ခံကတၢၢ် မ့ၢ်လၢ အဝဲသ့ၣ်ဆီၣ်လီၤသး တကဲဘၣ် အဃိလီၤ. ဘၣ်ဆၣ်, ပှၤကညီအနီၢ်ကီၢ်တဂၤ ပမ့နာ်န့ၢ်အီၤထဲသိးဒီး လံာ်စီဆှံ လၢအဘၣ်ဃးဒီး တၢ်ဆီဟံၣ်ဆီဃီ န့ၣ် တၢ်ကမၤအသးဒ်လဲၣ်. လၢလံာ်စီဆှံအပူၤ, တၢ်ဆီဟံၣ်ဆီဃီန့ၣ် မ့ၢ်တၢ်လီၢ်လၢ ပကမၤလိန့ၢ်တၢ် အဂီၢ်, ပကဒိးန့ၢ် ကစၢ်ယွၤအတၢ်ဘျုးတၢ်ဖှိၣ် အဂီၢ်, ဒီး ပကဒိၣ်ထီၣ်တပူၤဃီလၢ တၢ်အဲၣ်တၢ်ကွံအပူၤ အဂီၢ် န့ၣ်လီၤ.
