ယူဒၤလီတၢ်, ဒီးတၢ်သးဘၣ်အၢ မၤအသးလၢ အံၣ်စရ့လး ဒီးယရူၤရှလ့ၣ် အပူၤလီၤ. အဂ့ၢ်ဒ်အံၤ, ယူဒၤ မၤဘၣ်အၢ ယွၤ အတၢ်စီဆှံလၢ အအဲၣ်ဝဲ, ဒီးန့ၢ်မါလၢ ပှၤတခီဘီမုၢ်ဖိ အကစၢ်အဖိမုၣ်လီၤ. (မၤလကံ - ၂း၁၁).ကစၢ်ယွၤကဟုကယာ် ဟံၣ်ဖိဃီဖိ ဂ့ၤဂ့ၤကလဲာ်လီၤ. မၤလကံ - ၂း၁၀-၁၂ မ့ၢ်ဝဲ ဟံၣ်ဖိဃီဖိအရ့ဒိၣ် လၢယွၤအဂီၢ် ထဲလဲၣ် အခီၣ်ထံးခီၣ်ဘိလီၤ.
ဟံၣ်ဖိဃီဖိလိၣ်ဘၣ် လၢၢ်ခၢၣ်သနၢၣ်လၢအမ့ၢ် မိၢ်ပၢ်ခံဂၤ အိၣ်ဒီးတၢ်အၢၣ်လီၤအီလီၤဒ်သိးသိး ဘၣ်ဃး တၢ်စူၢ် တၢ်နာ် အဂ့ၢ်န့ၣ်လီၤ. လံာ်မၤလကံအဆၢဖိလၢ အပူၤကွံာ်တဖၣ် တဲဘၣ်ဃး ဟံၣ်ဖိဃီဖိအဂ့ၢ်စ့ၢ်ကီးန့ၣ်လီၤ. ပှၤတဝၢ မ့ၢ်တမၤဒ် အတၢ်စူၢ်တၢ်နာ် အလၢၢ်ခၢၣ်သနၢၣ်အသိး, ဒီး တၢ်ဘူၣ်တၢ်ဘါခိၣ်နၢ်တဖၣ် မ့ၢ်တဒုးနဲၣ် ဒီး သိၣ်လိ အဝဲသ့ၣ်အတၢ်စူၢ်တၢ်နာ် အရ့ဒိၣ်ဆံးအါလဲၣ်န့ၣ်, မိၢ်ပၢ်တဖၣ် ကသူၣ်လီၤ အတၢ်စူၢ်တၢ်နာ် အလၢၢ်ခၢၣ် သနၢၣ် လၢ အဟံၣ်ဖိဃီဖိ အတၢ်အိၣ်မူအပူၤန့ၣ် တမ့ၢ်တၢ်လၢအကကဲထီၣ်အသးညီညီဘၣ်.
တၢ်န့ၣ်ကဲထီၣ်အသးလၢ ဝံမၤလကံ အစိၤအဆၢကတီၢ်အခါလီၤ. ခီဖျိလၢ အပှၤတဝၢအပူၤ အတၢ်စူၢ်တၢ်နာ် ဒီး အတၢ်အဲၣ် ကစၢ်ယွၤဆံးစှၤဝဲအဃိ, ပိာ်ခွါသးစၢ်တဖၣ် ဖျီအသးဒီး ပိာ်မုၣ်တဖၣ်လၢ အတနာ်ကစၢ်ယွၤအမ့ၢ်အတီ ဘၣ်, လၢအဘါကစၢ်အဂၤတဖၣ်လီၤ. ပတၢ်စူၢ်တၢ်နာ်ဒီး ပတၢ်ပာ်လုၢ်ပာ်ပှ့ၤ နုာ်လီၤဆူ ပဟံၣ်ဖိဃီဖိ အတၢ်အိၣ်မူ အပူၤ, ပမ့တဆိကမိၣ်လၢ အရ့တဒိၣ် လၢတၢ်ဆၢကတီၢ် အဝဲန့ၣ်ဘၣ်ဒၣ်လဲာ်လီၤ. ဆိကမိၣ်ကွၢ်, ဟံၣ်ဃီတဖျၢၣ် အပူၤ မိၢ်မ့တမ့ၢ်ပၢ် တဂၤဂၤ မ့ၢ်ဆိကမိၣ်တယာ်ဝဲလၢ အမါမ့တမ့ၢ်အဝၤ တဲဟးဂီၤ အတၢ်စူၢ်တၢ်နာ် အလၢၢ်ခၢၣ် သနၢၣ်န့ၣ် တၢ်ကမၤအသးလၢ ဟံၣ်တဖျၢၣ်န့ၣ်အပူၤဒ်လဲၣ်. လံာ်စီဆှံတဆၢအံၤ တဲဝဲဒၣ်ဘၣ်ဃး ဟံၣ်ဃီလၢ အလီၤဂာ်ဒီး မူခိၣ်ဘီမုၢ်လၢ အအိၣ်လၢတၢ်ပူၤဖျဲးအလီၢ်န့ၣ်လီၤ.
ဟံၣ်ဖိဃီဖိလၢ အအိၣ်လၢတၢ်ပူၤဖျဲးအလီၢ်န့ၣ် ပၣ်ဃုာ်ဒီး မိၢ်ပၢ်လၢ အလီၤဂာ်ဒီး ကစၢ်ယွၤလၢ အအဲၣ်တၢ် ဒီး အိၣ်ဒီး တၢ်သးတီတဂၤန့ၣ်လီၤ. ယွၤလၢ လံာ်စီဆှံကွဲးဝဲအဂ့ၢ်တဂၤန့ၣ် အဲၣ်အဖိတဖၣ် လၢာ်လၢာ်ဆ့ဆ့ လၢ အအိၣ်ဒီး တၢ်ဟ့ၣ်လီၤသး ဒၣ်လဲာ်လီၤ. အဝဲဒၣ် အဲၣ်ဒိးလၢ ဟံၣ်ဖိဃီဖိတဖၣ် ကအိၣ်ဒီး မိၢ်ပၢ်ခံဂၤလၢာ်လၢ အမၤလိကဘၣ်အဲၣ်တၢ်ဒ်လဲၣ် လၢတၢ်အဒိအံၤအပူၤလီၤ.
