မ့မ့ၢ် သးလၢအဘၣ်ဃးဒီး တၢ်မ့ၢ်တၢ်တီန့ၣ် ... ကဆှၢသု ... ဒီး, ကကတိၤဝဲဒီး ကစံၣ်တဲၤတဲလီၤသု တၢ်လၢ အကဟဲတဖၣ်န့ၣ်လီၤ. (ယိၤဟၣ် - ၁၆း၁၃).တၢ်မၤ တၢ်ဆၢတဲာ်လၢတအိၣ်ဒီး ကစၢ်ယွၤ အတၢ်ပၢတၢ်ဆှၢဘၣ်န့ၣ် လီၤဂာ်ဒ်သိးဒီး နဂုာ်ကျဲးစၢးလၢ နကနီၣ် ကဘီယူၤ လၢတအိၣ်ဒီး ရ့ၣ်ဒၢ် ဒီး ဒီလ့ၣ်ဂီၤ အသိးလီၤ. ဒ်အပူၤကွံာ် နတၢ်လဲၤခီဖျိ အိၣ်တ့ၢ်လံအသိး နမၤအီၤ မ့ၢ်သ့ဘၣ်ဆၣ်, တၢ်လၢအကဟဲဆူညါလၢ နတသ့ၣ်ညါအီၤတဖၣ် မၤဟးဂီၤ တၢ်လၢအရ့ဒိၣ်ကတၢၢ်လၢ နဂီၢ် သ့စ့ၢ်ကီးဝဲလီၤ.
လံာ်စီဆှံစံးဝဲဒၣ် ပှၤဟီၣ်ခိၣ်ဖိလၢ အကူၣ်သ့ကတၢၢ်တဂၤ အတၢ်ဆိကမိၣ်ဆိကမးန့ၣ် မ့ၢ်တၢ်ကလီကလီလၢ ကစၢ်ယွၤအဂီၢ်လီၤ (ကွၢ် ၁ ကရံၣ်သူး ၁း၁၈-၂၀). ထဲကစၢ်ယွၤတဂၤဧိၤ သ့ၣ်ညါကျဲ, ဒီး အဝဲ အဲၣ်ဒိးလဲၤလၢ နမဲာ်ညါလီၤ.
စီၤပီလူးစံးဝဲဒၣ် “အဂ့ၢ်ဒ်အံၤ, မုၣ်ကီၤလံၢ် အကစၢ်ဒၣ်လဲာ်, ပျိာ်လဲအသးလၢ တၢ်ကပီၤအကလူးလီၤ” (၂ ကရံၣ်သူး ၁၁း၁၄). ဒီးဖဲ အဝဲအတၢ်ကွဲမုာ် န့ၣ် လၢပှဲၤဒီး တၢ်လၢနသးစဲ အီၤတဖၣ် ဘၣ်ဆၣ်, အကျဲန့ၣ် ကဆှၢနၤ ဆူ တၢ်ဟးဂီၤအပူၤလီၤ (ကွၢ် ယိၤဟၣ် ၈း၄၄).
လံာ်စီဆှံစံးဝဲဒၣ် “နကလုၢ်ကထါန့ၣ် မ့ၢ်မ့ၣ်အူဒၢတဖျၢၣ် လၢယခီၣ်အဂီၢ်, ဒီးတၢ်ကပီၤတဖျၢၣ်လၢ ယကျဲအဂီၢ် လီၤ” (စံးထီၣ်ပတြၢၤ ၁၁၉း၁၀၅) ကပၢဆှၢနၤဆူ တၢ်တီတၢ်လိၤအကျဲပူၤန့ၣ်လီၤ. အဃိ, မ့တမ့ၢ်လၢ နတဲဘၣ် ကစၢ်ယွၤ တၢ်လၢနကမၤအီၤ တဖၣ်ဘၣ်န့ၣ်, နမ့ၢ်ဆိကမိၣ်လၢ နကျဲနဃုထၢအီၤအံၤ မ့ၢ်ဂ့ၤထဲလဲၣ်ဘၣ်ဆၣ် ကဲထီၣ် တၢ်ကလီကလီသ့ဝဲလီၤ.
ယ့ၣ်ရှူးစံးဝဲဒၣ်, “မ့မ့ၢ်သးလၢ အဘၣ်ဃးဒီး တၢ်မ့ၢ်တၢ်တီန့ၣ်, တုၤအဟဲဝဲဒီး, ကဆှၢသုဆူ တၢ်မ့ၢ်တၢ်တီ ခဲလၢာ် အပူၤလီၤ. အဂ့ၢ်ဒ်အံၤ, တကတိၤဘၣ်လၢ အဂ့ၢ်ဒၣ်ဝဲဘၣ်. မ့မ့ၢ်ဖဲဒၣ် အနၢ်ဟူတၢ်ဒီး, ကကတိၤဝဲဒီး ကစံၣ်တဲၤတဲ လီၤသု တၢ်လၢအကဟဲတဖၣ်န့ၣ်လီၤ” (ယိၤဟၣ် ၁၆း၁၃). တၢ်မ့ၢ်တၢ်တီန့ၣ် မ့ၢ်ဝဲ, ပဝဲဒၣ်အါဂၤ ပတဃု ကစၢ်ယွၤ ဒ်န့ဆၢၣ်အသိးဘၣ်. ဖဲ အသးစီဆှံ ကတိၤတၢ်လၢပသးပူၤမး ပစးထီၣ် မၤဒ် အတၢ်ဘၣ်သး အသိးလီၤ.
ဟံးန့ၢ် တၢ်ဆၢကတီၢ် လၢနကဃုန့ၢ် သးစီဆှံ အတၢ်ပၢတၢ်ဆှၢနၤ န့ၣ်တက့ၢ်. နာ်အီၤတက့ၢ်. အဝဲသ့ၣ်ညါ တၢ်လၢအကဟဲကဲထီၣ်အသး ခဲလၢာ် ခီဖျိ နတၢ်ဃုထၢ တဖၣ်အဃိလီၤ. အဝဲကဒုးနဲၣ်နၤ တၢ်ခဲလၢာ် ဒီး ကမၤစၢၤ နၤလၢ နကအိၣ်လၢ ကျဲလၢအဘၣ်တဘိ အလိၤလီၤ.
