ပှၤလၢအသးကူၣ်တၢ်သ့န့ၣ် ဒိးန့ၢ်တၢ်မၤလိာ်လီၤ. (ကတိၤဒိ - ၁၀း၈).နမ့ၢ်အဲၣ်ဒိးလဲၤလၢယွၤအတၢ်ဆိၣ်ဂ့ၤဆိၣ်ဝါအပူၤန့ၣ်, ပတုာ်ကဒူးကဒ့ၣ်တၢ် ဒီး ဟံးန့ၢ်မူဒါ လၢနတၢ်အိၣ်မူအဂီၢ် တက့ၢ်. လံာ်စီဆှံစံးဝဲ, “ပှၤလၢအသးကူၣ်တၢ်သ့န့ၣ် ဒိးန့ၢ် တၢ်မၤလိာ်လီၤ. မ့မ့ၢ်ပှၤလၢ အဟးဂီၤလၢ အပျုၤန့ၣ် ကလီၤဃံၤဝဲလီၤ” (ကတိၤဒိ - ၁၀း၈). တၢ်သ့ဟံးန့ၢ်မူဒါမ့ၢ် တၢ်သကဲာ်ပဝးဒီး တၢ်ဒိၣ်တုာ်ခိၣ်ပှဲၤ အပနီၣ်လီၤ. တၢ်အရ့ဒိၣ်ကတၢၢ်န့ၣ်မ့ၢ်ဝဲ, နမ့တသ့ၣ်ညါဒီး ဃၣ်ဒူၣ်ချၢ နသးဆူ နတၢ်ဒဲးဘး အအိၣ်ဘၣ်န့ၣ်, ကစၢ်ယွၤ မၤဂ့ၤ ထီၣ်က့ၤနၤတသ့ဘၣ်.
ခီဖျိလၢပှၤအဂၤတဂၤ အတၢ်ဖံးတၢ်မၤအဃိ ကစၢ်ယွၤပျၢ်ကွံာ် ပတၢ်ဒဲးဘးလီၤန့ၣ် လံာ်စီဆှံပူၤ တတဲပှၤနီတတီၤ ဘၣ်. လံာ်စီဆှံစံးဝဲလၢ ကစၢ်ယွၤက “ဟ့ၣ်ကၣ်တၢ်လၢ ပှၤကညီဒ် အမၤတၢ် အသိးန့ၣ် ကိးဂၤဒဲးလီၤ” (ကတိၤဒိ - ၂၄း၁၂). ဖဲနပာ်တၢ်ကမၣ်လၢ ပှၤဂၤအလိၤတလီၢ်လီၢ်န့ၣ်, နတတုၤဆူ မူဒါအမ့ၢ်အတီ, လၢအမ့ၢ်ဝဲ တၢ်ဆီတလဲအနီၢ်ကီၢ် စးထီၣ်အသး အအိၣ်နီတဘျီဘၣ်. တၢ်ပာ်တၢ်ကမၣ်လၢပှၤလိၤ ဒီး တၢ်မၤမဲာ်ဆှးပှၤဂၤ ဒ်သိး ပှၤကဆီတလဲအဂီၢ်န့ၣ် မ့ၢ်ဒၣ်ဒ်တၢ်ဂဲၤလိာ်ကွဲတခါအသိး လၢအမၤလၢာ်တၢ်ဆၢကတီၢ်န့ၣ်လီၤ. ကဒုးတူၢ် ပှၤဂၤလၢ အတၢ်ကမၣ်အိၣ်, ဘၣ်ဆၣ် တဆီတလဲတၢ်နီတမံၤဘၣ်. ဘၣ်ဆၣ်, ပမ့ၢ်မၤဒ်န့ၣ်န့ၣ် ပတၢ်တူၢ်ဘၣ် ကလီၤစှၤကွံာ်ဝဲ ဒီး တၢ်လၢ အမၤသးဒိၣ်ပှၤ ဒီး မၤသးတမုာ်ပှၤတဖၣ် ကစှၤလီၤကွံာ်ဝဲလီၤ.
သနာ်က့, ပမ့ၢ်တဒုးကပီၤထီၣ် ယ့ၣ်ရှူးခရံာ် အတၢ်ကပီၤ လၢ ပသကဲာ်ပဝး အပူၤန့ၣ်, ပတမၤန့ၢ် တၢ်ဆီတလဲ လီၤတံၢ်လီၤဆဲး လၢပသူၣ်ကံၢ်သးလဲ အပူၤဘၣ်. တၢ်ပာ်တၢ်ကမၣ်လၢပှၤလိၤ တလီၢ်လီၢ်န့ၣ် ညီနုၢ် မ့ၢ်ကျဲတဘိ လၢ ပကဟးဆှဲးတၢ်မ့ၢ်တၢ်တီ ဘၣ်ဃး ပကစၢ်ဒၣ်ပဝဲန့ၣ်လီၤ. ယ့ၣ်ရှူးစံးဝဲဒၣ်, တၢ်သ့ၣ်ညါတၢ်မ့ၢ်တၢ်တီ ကမၤထူၣ်ဖျဲးပှၤလီၤ (ကွၢ် ယိၤဟၣ် - ၈း၃၂). အခီၣ်ထံး ကမၤတမုာ်နၤဖးဒိၣ်, ဘၣ်ဆၣ် အဝဲအံၤမ့ၢ် တၢ်တမံၤ လၢ ကမၤထူၣ်ဖျဲးနၤ အနီၢ်ကီၢ်လီၤ.
နမ့တအဲၣ်ဒိး ကွၢ်ဆၢၣ်မဲာ် နတၢ်ကမၣ်တဖၣ်ဘၣ်န့ၣ်, နကအိၣ်ဒီး တၢ်ကီတၢ်ခဲထီဘိလီၤ. မ့ၢ်နအဲၣ်ဒိး အိၣ်မူ ဒ်န့ၣ်ထီဘိလီၤဧါ. တအဲၣ်ဒိးအိၣ်မူဘၣ်. မ့မ့ၢ်ဒ်န့ၣ်ဒီး, တဲကစၢ်ယွၤလၢတၢ်မ့ၢ်တၢ်တီ, ဒီးပျဲအမၤစၢၤနၤ လၢနကဘှီ ဘၣ်က့ၤ တၢ်တဂ့ၤတဘၣ် တဖၣ်လၢ နတၢ်အိၣ်မူအပူၤတက့ၢ်.
