ဒီးနီၢ်မၤရံစံးဝဲဒၣ်, ကွၢ်ကွၢ်, ကစၢ်အကုၢ်ပိာ်မုၣ်လီၤ. မ်တၢ်ကမၤအသးဒီး ယၤဒ်နကလုၢ် အသိးန့ၣ်တက့ၢ်. ဒီးကလူးန့ၣ် ဟးထီၣ်ကွံာ်ဝဲလၢ အအိၣ်လီၤ. (လူၤကၣ် - ၁း၃၈).အပူၤကွံာ်အနံၣ်တဖၣ်အပူၤန့ၣ်, ခရံာ်အိၣ်ဖျဲၣ်အတၢ်သးဝံၣ် အကျါတယုၢ် ပၣ်ဃုာ်ဒီး နီၢ်မၤရံ အတၢ်ကတိၤ လၢအမ့ၢ်ဝဲ, “ဒ်ကစၢ်ကတိၤတၢ်အသိး, ယကမၤယဲလီၤ. ယကဟ့ၣ်လီၤယတၢ်အိၣ်မူလၢ အစုပူၤလီၤ. ယကနာ်အီၤလၢ ယတၢ်အိၣ်မူခဲလၢာ်အပူၤလီၤ.”
အဝဲန့ၣ်မ့ၢ် နီၢ်မၤရံ အတၢ်စံးဆၢဖဲ အနၢ်ဟူ ကလူးတဲအီၤလၢ အကကဲထီၣ် ကစၢ်ယ့ၣ်ရှူးခရံာ်အမိၢ် အခါလီၤ. တၢ်မ့ၢ်ကဲထီၣ်အသးလၢခံ ဒ်အံၤဒ်နုၤဘၣ်ဆၣ်, အဝဲစံးဝဲလၢ တၢ်သးအိၣ်အပူၤ, “မ်တၢ်ကမၤအသးဒီးယၤ ဒ်နကလုၢ် အသိးန့ၣ်တက့ၢ်.”
နီၢ်မၤရံ အိၣ်ကတဲာ်ကတီၤအသးလၢ အကဟ့ၣ်လီၤအတၢ်အိၣ်မူလၢ ကစၢ်ယွၤအစုပူၤလံ. ပှၤမ့ၢ်စံးအၢစံးသီအီၤ, တဲတရီတပါအီၤ ဒၣ်လဲာ် အတၢ်အိၣ်မူန့ၣ် အိၣ်လၢကစၢ်ယွၤ အစုပူၤလီၤ. ခီဖျိလၢ အဝဲနာ်ကစၢ်ယွၤလၢ အတၢ်အိၣ်မူခဲလၢာ်အပူၤအဃိ, အဝဲကဲထီၣ်ဘၣ် ကစၢ်ယ့ၣ်ရှူးခရံာ်အမိၢ်, ဒီးမၤလၤကပီၤ ပှၤအုၣ်ခီၣ်တၢ်တဂၤ အတၢ်ဟဲအိၣ်ဖျဲၣ်ထီၣ် သ့ဝဲလီၤ. နီၢ်မၤရံဒိကနၣ်ကစၢ်ယွၤအကလုၢ်, တူၢ်လိာ် ကစၢ်ယွၤအတၢ်ဘၣ်သးလၢ အတၢ် အိၣ်မူအဂီၢ်, ဒီး ဟ့ၣ်လီၤအသးလၢ ကစၢ်ယွၤအစုပူၤလီၤ.
အဝဲန့ၣ်မ့ၢ် တၢ်မၤလၤကပီၤခရံာ်အိၣ်ဖျဲၣ် အကံၢ်အစီ, လၢအမ့ၢ်ဝဲ တၢ်လၢပှၤအါဂၤတနာ်အီၤဘၣ်န့ၣ် နနာ်န့ၢ်အီၤ လၢလၢပှဲၤပှဲၤ, ဒီးနတူၢ်လိာ်ကစၢ်ယွၤ အတၢ်ဘၣ်သးလၢ နတၢ်အိၣ်မူအပူၤ, ဒီး နဟ့ၣ်လီၤနသးလၢ ကစၢ်ယွၤ အတၢ်မၤအဂီၢ်, ဒီးနနာ်လၢ နတၢ်အိၣ်မူန့ၣ် အိၣ်လၢကစၢ်ယွၤ အစုပူၤန့ၣ်လီၤ. ထဲန့ၣ်မး ပကမၤလၤကပီၤ ကစၢ်ခရံာ် အတၢ်ဟဲအိၣ်ဖျဲၣ်ထီၣ် အခီပညီအမ့ၢ်အတီန့ၣ်လီၤ.
တနံၤအံၤ ဃ့သးစီဆှံလၢ ကမၤစၢၤနၤ ဒ်သိး နကနာ်ကစၢ်ယွၤလၢ နတၢ်အိၣ်မူအပူၤ ဒီး ဃ့လၢ ကစၢ်ယွၤ ကပၢ ကဆှၢနတၢ်အိၣ်မူန့ၣ်တက့ၢ်. နမ့မၤဒ်န့ၣ်န့ၣ်, နတၢ်အိၣ်မူ ကဆီတလဲအသးလီၤ.
