မၤသးဒ်န့ၣ်ဒီး ယ့ၣ်ရှူးစံးဘၣ်ကဒီးပှၤတဖၣ်, ဒီးစံးဝဲဒၣ်, ယဲဒၣ်အံၤ, ယမ့ၢ်ဟီၣ်ခိၣ်အကပီၤလီၤ. ပှၤလၢ အပိာ်ယခံ တဖၣ်န့ၣ်, တဟးဘၣ်ဝဲလၢ တၢ်ခံးကျါဘၣ်, ဒီးကန့ၢ်ဘၣ် တၢ်မူအတၢ်ကပီၤလီၤ. (ယိၤဟၣ် - ၈း၁၂).ဖဲ လါဒံၤစဲဘၢၣ် ၁၄ သီ, ၂၀၂၅ နံၣ် ဟါလီၤခီ, တၢ်ခးသံတၢ် ဒိၣ်ဒိၣ်မုၢ်မုၢ် ကဲထီၣ်အသးဖဲ ဝ့ၢ်စံးဒနံၣ်, ဘီၤဒၤ ပီၣ်လဲၣ်ကၢၢ်နံၤ ဖဲပှၤယူဒၤဖိတဖၣ် ကတဲာ်ကတီၤအသးလၢ ကမၤဝဲ ဘူၣ်တၢ်ကပီၤ (Feast of Hanukkah) အခါ န့ၣ်လီၤ. တၢ်ခးတၢ်တဘျီအံၤ ပှၤယူဒၤဖိတဖၣ် သံဝဲ ၁၅ ဂၤ အကျါ ပၣ်ဃုာ်ဒီး ဖိသၣ်မုၣ်ဖိ အနံၣ်တဆံဖိ တဂၤ ဒီး ယူဒၤအတၢ်ဘူၣ်တၢ်ဘါခိၣ်နၢ်တဂၤလီၤ.
Feast of Hanukkah (ဘူၣ်ဟၤနူးခၤ) မ့ၢ်ပှၤယူဒၤ အဘူၣ်အကျါတခါ လၢဘၣ်တၢ်မၤအီၤ လၢဃိးသီအတီၢ်ပူၤ, မုၢ်ဆၣ်နံၤဆူ လၢခံတနွံမုၢ်ဆၣ်နံၤ, အဃိ ၂၀၂၅ နံၣ်အပူၤ ဘၣ်တၢ်မၤအီၤစးထီၣ် လါဒံၤစဲဘၢၣ် ၁၅ သီတုၤ ၂၂ သီ န့ၣ်လီၤ. ဖဲတၢ်မၤဘူၣ်အံၤအဆၢကတီၢ် တၢ်ဒွဲၣ်ကပီၤထီၣ် ပနဲတသီတဘိလၢ ဃိးသီအတီၢ်ပူၤန့ၣ်လီၤ. အဃိ, ပှၤယူဒၤဖိ အပှၤကွဲးတၢ်စံၣ်စိၤတဲစိၤလၢအမ့ၢ် ယိၤစ့ဖၢး ကိးဝဲဘူၣ်အံၤအမံၤလၢ ဘူၣ်တၢ်ကပီၤ (Feast of Lights) န့ၣ်လီၤ.
ဘူၣ်အံၤကဲထီၣ်အသးအခီၣ်ထံးခီၣ်ဘိ ဖဲ ပှၤယူဒၤဖိတဒူၣ်လၢဘၣ်တၢ်ကိးအီၤလၢ မၤကဘံၣ်တဖၣ် ဒုးန့ၢ်က့ၤ ဝ့ၢ်ယရူၤရှလ့ၣ် ဒီး တၢ်လုၢ်ဟံၣ်လၢ ပှၤကြံးဖိတဖၣ်အစုပူၤ ဖဲတချုးခရံာ်နံၣ် ၁၆၄ နံၣ်အခါန့ၣ်လီၤ. ခီဖျိလၢ ပှၤကြံးဖိတဖၣ် ဒုးန့ၢ်ဝ့ၢ်ယရူၤရှလ့ၣ် အဃိ, ပာ်ကဲဝဲ ပှၤယူဒၤဖိအတၢ်လုၢ်ဟံၣ် လၢအဝဲသ့ၣ်အကစၢ်စူ အတၢ်လုၢ်ဟံၣ်, ထၢနုာ်အကစၢ်စူ အတၢ်ဂီၤ ဒီး တၢ်လုၢ်တၢ်ပာ်အတၢ်ဖိတဖၣ်လံၤ တဖၣ်လၢ တၢ်လုၢ်ဟံၣ်ပူၤအဃိ, ပှၤယူဒၤဖိတဖၣ် တဘၣ်သးဝဲဘၣ်. အဃိ, ပှၤလုၢ်တၢ်အဒိၣ်လၢအမ့ၢ် မၤထၤသံယး တီခိၣ်ရိာ်မဲ ပှၤယူဒၤဖိလၢ အအဲၣ်ဒိးထီဒါတၢ်တဖၣ်, ကိးလီၤအသးလၢ မၤကဘံၣ်, ဒီး ထီဒါဝဲပှၤကြံးဖိတဖၣ် ဒီးဒုးန့ၢ်က့ၤဝဲ ဝ့ၢ်ယရူၤရှလ့ၣ် လၢ ဃိးသီအတီၢ်ပူၤန့ၣ်လီၤ. ဝံၤအလီၢ်ခံ, အဝဲသ့ၣ်မၤကဆှီကွံာ် တၢ်လုၢ်ဟံၣ် ဒီး ပာ်စီဆှံက့ၤအီၤ လၢအဝဲသ့ၣ် အတၢ်ဘူၣ်တၢ်ဘါအဂီၢ်လီၤ. အဃိ တၢ်မၤဝဲ ဘူၣ်တၢ်ကပီၤတနံၣ်တဘျီ လၢ ဃိးသီအတီၢ်ပူၤ အံၤမ့ၢ် တၢ်မၤဘူၣ် တခါလၢ ပှၤယူဒၤဖိ အဖိအလံၤတဖၣ်ကသ့ၣ်နီၣ် ပာ်စီဆှံက့ၤသး, ဒီး အးလီၤအသးလၢ အတၢ်ဘူၣ်တၢ်ဘါ အဂီၢ်လီၤ.
လါဒံၤစဲဘၢၣ်အံၤ မ့ၢ်တၢ်ကပီၤအလါ လၢပှၤယူဒၤဖိအဂီၢ် ဒီး ပှၤခရံာ်ဖိတဖၣ်အဂီၢ်လီၤ. ပှၤယူဒၤဖိ မၤကပီၤ ထီၣ်ပနဲလၢ ဃိးသီအတီၢ်ပူၤ လၢတၢ်ပာ်စီဆှံက့ၤသးအဂီၢ် ဒီး တၢ်အးလီၤသးလၢယူဒၤအတၢ်ဘူၣ်တၢ်ဘါအဂီၢ် အသိး, ပှၤခရံာ်ဖိတဖၣ်အဂီၢ်စ့ၢ်ကီး မ့ၢ်ဘူၣ်တၢ်ပီၤတခါလၢ တၢ်ကပီၤအဒိၣ်ကတၢၢ်လၢ အမ့ၢ်ကစၢ်ယ့ၣ်ရှူးခရံာ် အတၢ်ဟဲလီၤဆူဟီၣ်ခိၣ်လၢအခံးယုၢ်တဘ့ၣ်အံၤအပူၤ လၢကဒုးကပီၤထီၣ်အီၤ အဂီၢ်လီၤ. ယ့ၣ်ရှူးစံးဝဲ, အဝဲဒၣ်မ့ၢ်ဟီၣ်ခိၣ်အတၢ်ကပီၤ, ဒီး ပှၤလၢအပိာ်အခံတဖၣ်န့ၣ် တဟးဘၣ်ဝဲလၢတၢ်ခံးကျါဘၣ်. တကးဘၣ်, ကန့ၢ်တၢ်မူအတၢ်ကပီၤလီၤ. အဃိ, ပကမ့ၢ်ခရံာ်ဖိလၢအပိာ် ကစၢ်ခရံာ်အခံ, ဟးလၢတၢ်ကပီၤအပူၤ, ဒီးကဲထီၣ် တၢ်ကပီၤလၢ ပခိၣ်ပဃၢၤအဂီၢ်တက့ၢ်.
