တကဒံကဒါဘၣ်ဒီး, မ်ပဟံးဃာ်ပတၢ်မုၢ်လၢ် အတၢ်အၢၣ်လီၤအီလီၤ တက့ၢ်. အဂ့ၢ်ဒ်အံၤ, ပှၤလၢ အစံးပာ်တၢ်န့ၣ်, မ့ၢ်ပှၤအကလုၢ်တီလီၤ. (ဧ့ၤဘြံၤ - ၁၀း၂၃).နကထံၣ်ဘၣ် ဖဲကစၢ်ယွၤတ့လီၤပာ်လီၤတၢ်အခါ ကစၢ်ယွၤဂံၢ်မုၢ်နံၤမုၢ်သီ လၢအဒိးသန့ၤထီၣ်အသးလၢ အပူၤကွံာ်တနၤ န့ၣ်လီၤ. လံာ်စီဆှံတစံး, “မုၢ်ဂီၤအိၣ် ဒီးမုၢ်ဟါအိၣ်, မုၢ်တနံၤ.” န့ၣ်ဘၣ်. မ့မ့ၢ်တခီ, စံးဝဲ, “ဒီးမုၢ်ဟါအိၣ်, ဒီးမုၢ်ဂီၤအိၣ်, မုၢ်တနံၤလီၤ” (၁ မိၤရှ့ - ၁း၅). အခီပညီန့ၣ်မ့ၢ်ဝဲ, ကစၢ်ယွၤထုးထီၣ် တၢ်ကပီၤ လၢ တၢ်ခံးအပူၤသ့ဝဲလီၤ. တၢ်န့ၣ်မ့ၢ်ဝဲ, နကဘၣ်လဲၤခီဖျိတၢ်တမံၤ ဒ်သိးနကဒိးန့ၢ် တၢ်အဂၤတမံၤအဂီၢ် လီၤ.
ကစၢ်ယွၤတဲဘၣ် စီၤမိၤရှ့လၢ တၢ်သံအကလူး ကဟဲထီၣ်လၢတၢ်ခံးကျါ, ဒီး သိဖိအသွံၣ်လၢ အထံၣ်ဝဲဖဲ တြဲၤလိၤ ခဲလၢာ်န့ၣ်, ပှၤခဲလၢာ်လၢအအိၣ်လၢ ဟံၣ်ပူၤဖဲန့ၣ်တဖၣ် ကပူၤဖျဲးဝဲလီၤ (ကွၢ် ၂ မိၤရှ့ - ၁၂း၁၂-၁၃). လံာ် ၂ မိၤရှ့ တဲဘၣ် ပှၤလၢ, “ဒီးစီၤမိၤရှ့ယူာ်ဃီၤအစုလၢ ပီၣ်လဲၣ်အဖီခိၣ်, ဒီးယွၤဒုးလဲၤကွံာ် ပီၣ်လဲၣ်လၢကလံၤဆူၣ် လၢမုၢ်ထီၣ်တခီ သီတနၤကျၢၤ, ဒီးဒုးကဲထီၣ်ပီၣ်လဲၣ်လၢခိ, ဒီးထံန့ၣ်လီၤဖးဝဲ လီၤ. ဒီးပှၤအံၣ်စရ့လးဖိ လဲၤလီၤဆူ ပီၣ်လဲၣ်အသးကံၢ်ပူၤလၢခိ, ဒီးထံန့ၣ် ကဲထီၣ်အဒူၣ်လၢ အစုထွဲဒီး လၢအစုစ့ၣ် လၢအဂီၢ်လီၤ. (၂ မိၤရှ့ - ၁၄း၂၁-၂၂).
ပှၤကွဲးထါစံးထီၣ်ပတြၢၤတဂၤကွဲးဝဲ, “မဲာ်ထံမဲာ်နိကအိၣ်ကဆိးတနၤ, မ့မ့ၢ်လၢမုၢ်ဆ့ၣ်ထီၣ်န့ၣ် တၢ်သူၣ်ဖှံသးညီ အိၣ်ထီၣ်ဝဲလီၤ.” (စံးထီၣ်ပတြၢၤ - ၃၀း၅). မုၢ်ဆ့ၣ်ထီၣ်အတၢ်ကပီၤန့ၣ် ကပြုၢ်ကပြီၤဝဲ, မ့ၢ်လၢ တၢ်ခံးအိၣ်တ့ၢ်ဝဲ အဃိန့ၣ်လီၤ. ဒ်န့ၣ်အသိး နတၢ်လဲၤဆူညါတဖၣ် အိၣ်ဒီးအလုၢ်အပှ့ၤ မ့ၢ်လၢနလဲၤခီဖျိဘၣ် တၢ်ဆူးတၢ်ဆါ, တၢ်မၤနၢၤ, ဒီးတၢ်လဲၤ ခီဖျိတဖၣ်အဃိလီၤ. မုၢ်ဂီၤလၢအဂ့ၤတဖၣ် ဟဲအိၣ်ထီၣ်ခီဖျိ နဘၣ်လဲၤခီဂာ် မုၢ်နၤလၢ အကီအခဲတဖၣ် အဃိလီၤ.
ဖဲနထံၣ်ပှၤတဂၤဂ့ၤတဂၤဂ့ၤ အိၣ်ဒီးမုၢ်နံၤလၢအဂ့ၤန့ၣ်, လီၤဂာ်ဒ်သိး နကွၢ်ပှၤတဂၤလၢ အလဲၤခီဖျိတ့ၢ် မုၢ်နၤဖးထီ တဂၤ န့ၣ်လီၤ. ဖဲနနၢ်ဟူ အဝဲသ့ၣ်ကိးပသူထီၣ်လၢအတၢ်မၤနၢၤအဂီၢ်န့ၣ်, ဘၣ်သ့ၣ်သ့ၣ် အဝဲသ့ၣ် ကသူတၢ် ဆၢကတီၢ် လၢမုၢ်နၤ ဘါထုကဖၣ် ဒီး ဟီၣ်တၢ်လၢ ကစၢ်ယွၤအမဲာ်ညါလီၤ. လံာ်စီဆှံစံးဝဲ, “တကဒံကဒါဘၣ်ဒီး, မ်ပဟံးဃာ် ပတၢ်မုၢ်လၢ် အတၢ်အၢၣ်လီၤအီလီၤ တက့ၢ်. အဂ့ၢ်ဒ်အံၤ, ပှၤလၢ အစံးပာ်တၢ်န့ၣ်, မ့ၢ်ပှၤ အကလုၢ် တီလီၤ.” (ဧ့ၤဘြံၤ - ၁၀း၂၃).
တၢ်နာ်ကစၢ်ယွၤန့ၣ် ဂ့ၤဒိၣ်န့ၢ်ဒံး နဆိကမိၣ်လၢနကဒိးန့ၢ်တၢ်ဒံး န့ၣ်လီၤ. ပသ့ၣ်ညါသ့လၢ တၢ်လၢအဝဲစံးဝဲန့ၣ်, ကမၤဝဲလီၤ. ပသ့ၣ်ညါသ့လၢ တမ့ၢ်ထဲအဝဲပၢဆှၢတၢ်ဘၣ်တ့တဖၣ်ဧိၤဘၣ်, အဝဲပၢဆှၢ နတၢ်အိၣ်သးတဖၣ် စ့ၢ်ကီးလီၤ. အဃိ, ဟံးဃာ်အီၤဂၢၢ်ဂၢၢ်ကျၢၤကျၢၤတက့ၢ်.
