ပဟးထီၣ်ဖဲန့ၣ်ဒီး မ့ၢ်လၢ ကလံၤအူဆီၣ်ကဒါက့ၤပှၤအဃိ, ပလဲၤခီဂာ်တၢ်လၢ ကီးကူပြူးအကပၤ လၢ အတဒၢဒီး ကလံၤအဆူၣ်န့ၣ်လီၤ. (မၤတၢ် - ၂၇း၄ ခ့ခါကျိာ်).ဖဲနပာ်လီၤနသးလၢ နကမၤတၢ်တမံၤမံၤလၢ ယွၤအဂီၢ်န့ၣ်, နဒုၣ်နဒါ ဆၢလၢ နကဘၣ်သဂၢၢ်ဒီး “ကလံၤအူဆီၣ် ကဒါက့ၤနၤ” န့ၣ်လီၤ. နမ့တဃၣ်ကွံာ် နကဘီအခိၣ် ထီဒါကလံၤအူတၢ်ဘၣ်န့ၣ်, နကဘီအခိၣ် ကဃၣ်ကွံာ်ဆူ ကျဲလၢ အကမၣ်န့ၣ်သ့ဝဲလီၤ. လံာ်စီဆှံစံးဝဲလၢ ယ့ၣ်ရှူးဘၣ် “တၢ်လ့ပစီလၢ မုၣ်ကီၤလံၢ်” န့ၣ်လီၤ (မးသဲ ၄း၁). မုၣ်ကီၤလံၢ် တဟ့ၣ်အဃၣ် ဘၣ်. မ့မ့ၢ်တခီ တချုးယ့ၣ်ရှူး ဘၣ်တၢ်ဖီၣ်အီၤတနၤန့ၣ် “မုၣ်ကီၤလံၢ်လဲၤနုာ်လီၤဆူ စီၤယူဒၤ, လၢတၢ်ကိးအီၤ လၢ အံၣ်စကၤရံၤအိာ်လၢ အမ့ၢ်ပှၤတၢ်မၢဖိ တဆံခံဂၤ အကျါတဂၤန့ၣ် အပူၤလီၤ (လူၤကၣ် ၂၂း၃ ခ့ခါကျိာ်).
ရံမၤရှၢး (Reimar Schultze) ပှၤလၢအပူၤဖျဲးလၢ နၤစံၤ အတၢ်မၤသံမၤဝီ တဂၤစံးဝဲ, “တနံၤအံၤ ဖဲနလဲၤ တပူၤလၢ်လၢ်, မုၣ်ကီၤလံၢ် ကဂုာ်ကျဲးစၢးလၢ ကမၤန့ၢ်နၤ ဖဲကျဲကပၤ, ဖဲဝဲၤဒၢးအပူၤ, မ့တမ့ၢ် ဖဲပျီအပူၤန့ၣ်လီၤ. နမ့တသိးထီၣ် နီၣ်သးအတၢ်စုကဝဲၤ ခဲလၢာ်န့ၣ်, ဖဲနဟးထီၣ်လၢနဟံၣ်ချၢအခါ မုၣ်ကီၤလံၢ် ကမၤလီၤဃံၤနၤ န့ၣ်လီၤ. နမ့ၢ်ပာ် နတၢ်မ့ၢ်တၢ်တီအယီၢ်တကိး လၢ တၢ်ပာ်တၢ်ကူတၢ်ကၤအလီၢ်, နတၢ်တီတၢ်လိၤအသဃိး လၢပဲတြီအကပၤ, နတၢ်သးခုကစီၣ်အခီၣ်ဖံး လၢနလီၢ်မံဖီလာ်, မ့တမ့ၢ် နမ့ၢ်ပာ်တ့ၢ် နတၢ်နာ်အကတီၤ, နသးအနး, ဒီး နတၢ်အုၣ် က့ၤခီၣ်က့ၤ အခိၣ်ကုာ်သုး လၢနဟံၣ်, ဒီး ဖဲ ဂီၤခီအခါ နစံး, “ယကဘါထုကဖၣ်ဖဲ ယချုးအခါလီၤ” န့ၣ်, မ့ၢ်နဟ့ၣ်ဃၣ်ကွံာ် နတၢ် မၤနၢၤန့ၣ်လီၤ. တယံာ်လၢၤဘၣ်ဒီး တၢ်ကတိၤလၢအကမၣ်သ့ၣ်တဖၣ် ကဟဲထီၣ် လၢနကိာ်ပူၤ, ဒီးနကကွၢ် သ့ၣ်သၣ်လၢတၢ်တြီအီၤ ဒီးနကဒုးနဲၣ်ဖျါထီၣ် နတၢ်သးကွံလၢနပူၤန့ၣ်လီၤ. တၢ်ကမၣ် လၢနကမၤအီၤ အဒိၣ်ကတၢၢ်န့ၣ် မ့ၢ် နဟးထီၣ်နဟံၣ်ချၢ လၢတပၣ်ဃုာ်ဒီး တၢ်စုကဝဲၤတဖၣ်ဘၣ် ဒီး နကအိၣ် ဘ့ၣ်ဆ့လၢ နီၣ်သး တကပၤန့ၣ်လီၤ. ပှၤပျုၢ်စံးဝဲ, “တၢ်ဆၢကတီၢ်လၢယကဘါထုကဖၣ်အဂီၢ်တအိၣ်ဘၣ်.” ဘၣ်ဆၣ် လၢခံ အဝဲကဃု တၢ်ဆၢကတီၢ်ကိးမံၤဒဲး လၢကဘှီကဒါက့ၤ အတၢ်ထုကဖၣ်လၢ တမၤတ့ၢ်ဝဲဘၣ်. တၢ်ပိာ်ခရံာ်အခံ န့ၣ်တမ့ၢ် တၢ်ဟးလၢ ဖီကရၢၢ်အပူၤဘၣ်. တၢ်အဂ့ၤကိးမံၤဒဲး လၢဘီမုၢ်အပူၤ, စးထီၣ်လၢ စီၤအၤဒၣ်န့ၣ်, ဟဲဆူပအိၣ်ခီဖျိ ပှၤလၢ အဂုာ်ကျဲးစၢးတၢ်သ့ၣ်တဖၣ် ဖဲပှၤလၢ တမၤဝဲတဖၣ် ကန့ၢ်ဘၣ်ဝဲလၢ တၢ်ဃံးတၢ်စ့ၤအပူၤန့ၣ်လီၤ. လံာ်စီဆှံ အပူၤ တၢ်အိၣ်ဖှိၣ်အတၢ်စံၣ်စိၤတဲစိၤ ကတၢၢ်ကွံာ်ဝဲလၢ တၢ်မၤနၢၤ အတၢ်ကတိၤတဖၣ် လၢအမ့ၢ်, “ဒီးဒ်န့ၣ်အသိး ပလဲၤတၢ်ဆူရိမ့ၤလီၤ” (မၤတၢ် ၂၈း၁၄).”
 ){kind=link}