ပှၤအဂ့ၤဟ့ၣ်သါတၢ်လၢ အဖိတဖၣ် အဖိတဖၣ်လီၤ. (ကတိၤဒိ - ၁၃း၂၂).ပှၤသ့တၢ်ပၢဆှၢဂ့ၢ်ဝီ လၢအမ့ၢ် ဒီးကထၢၣ် ကၠီမဲးဝဲ (Dr John Maxwell) တဘျီကွဲးဝဲဒ်အံၤ, “ဖဲ လါဒံၤစဲဘၢၣ် ၁၈ သီ, ၁၉၉၈ နံၣ်န့ၣ် ယဒိးန့ၢ်သးအတၢ်ဆါသတူၢ်ကလာ် ဘူးတ့ၢ်မးလၢယကသံလီၤ. တၢ်တနၤန့ၣ် ဖဲယမံလီၤလၢ သၣ်လၣ်ပူၤ ဖဲယအိၣ်ခိး ဂ့ၢ်ဝီအူသိလ့ၣ်အခါ, ယသ့ၣ်နီၣ်က့ၤလၢ ယဆိကမိၣ်တၢ်ဂ့ၢ်ခံမံၤ, တၢတမံၤန့ၣ်, ယကသံ အဂီၢ်န့ၣ် ယသးတပှၢ်ဒံးဘၣ်. ခံမံၤတမံၤန့ၣ်, ယတမၤလၢပှဲၤဒံးဘၣ် တၢ်လၢယအဲၣ်ဒိးမၤ အိၣ်တဘျုးမံၤဒံး. သနာ်က့, တၢ်န့ၢ်ဘျုးလၢယမၤန့ၢ်အီၤ ဖဲယဒိးန့ၢ် သးအတၢ်ဆါအဆၢကတီၢ်မ့ၢ်ဝဲ တၢ်လဲၤခီဖျိအံၤ ဟ့ၣ်ဆူၣ်ထီၣ် ယခံလၢ ယကသံကွၢ်လီၤယသး “ယတၢ်ဟ့ၣ်သါလၢ ပှၤလၢခံတစိၤအဂီၢ် မ့ၢ်တၢ်မနုၤလဲၣ်?”
တၢ်ဟ့ၣ်သါန့ၣ်မ့ၢ် တၢ်တမံၤမံၤလၢ ပပာ်တ့ၢ်န့ၣ် ပှၤလၢခံတစိၤအဂီၢ် န့ၣ်လီၤ. တၢ်ဟ့ၣ်သါန့ၣ်မ့ၢ် နီၢ်ခိတၢ်ကူတၢ်ယၢ လၢပဟ့ၣ်လီၤလၢ ပှၤဂၤအစုပူၤသ့ဝဲ, မ့ၢ်စ့ၢ်ကီး တၢ်သိၣ်တၢ်သီမိၢ်ပှၢ်လၢ ပအိၣ်မူတ့ၢ်အီၤ လၢပှၤလၢခံတစိၤကွၢ်လိ အီၤသ့ဝဲ, ဒီးမ့ၢ်စ့ၢ်ကီး ပှၤလၢပသိၣ်လိအီၤ ခီဖျိပတၢ်ကတိၤဒီးပတၢ်ဟူးတၢ်ဂဲၤ ဒီး အတၢ်အိၣ်မူဂ့ၤထီၣ် ခီဖျိလၢ အကွၢ်လိပှၤ အဃိ သ့ဝဲန့ၣ်လီၤ.”
ပာ်တၢ်ဂ့ၢ်ခံမံၤအံၤလၢနခိၣ်နူာ်အပူၤထီဘိတက့ၢ်. (၁) တနံၤအံၤမ့ၢ် တၢ်ခဲလၢာ်လၢနဒိးန့ၢ်အီၤလီၤ. သ့ၣ်နီၣ်ထီၣ်က့ၤ တၢ်ကတိၤလၢဘၣ်တၢ်ကွဲးလီၤအီၤလၢ တၢ်သွၣ်ခိၣ်အလၢၢ်ထူၣ်အလိၤတခါတက့ၢ်. “ယမုၢ်လၢ်တၢ်အံၤလီၤ. ဘၣ်ဆၣ် ယတဒိးန့ၢ်အီၤဒံးဘၣ်.” ပဝဲကိးဂၤဒဲး ပမုၢ်လၢ်လၢ ပကအိၣ်ဒီး တၢ်အိၣ်မူလၢအထီလီၤ. ဘၣ်ဆၣ် ပကထံၣ်ဘၣ်ဒံး ခဲမဆ့ၣ်ဧါန့ၣ် ပတသ့ၣ်ညါဆိအီၤနီတဂၤဘၣ်. “ပာ်ကဖိနသးလၢ ခဲဂီၤကိာ်အဂ့ၢ်တဂ့ၤ. အဂ့ၢ်ဒ်အံၤ, တၢ်ကမၤအသးလၢ တနံၤအတီၢ်ပူၤန့ၣ် နတသ့ၣ်ညါဘၣ်" (ကတိၤဒိ ၂၇း၁).
(၂) နကပာ်တ့ၢ်တၢ်ဟ့ၣ်သါလီၤ. ပှၤအဂ့ၤတဖၣ် ပာ်တ့ၢ်အတၢ်ဟ့ၣ်သါ လၢကဆိၣ်ဂ့ၤ အဖိအလံၤ တုၤလၢ ခံစိၤတစိၤ ဒၣ်လဲာ် သ့ဝဲလီၤ. “ပှၤအဂ့ၤဟ့ၣ်သါတၢ်လၢ အဖိတဖၣ် အဖိတဖၣ်လီၤ. မ့မ့ၢ် ပှၤတၢ်ဒဲးဘးဖိ အစုလီၢ်အခီၣ်ခိၣ် အိၣ်ပာ်စၢၤဝဲလၢ ပှၤတီပှၤလိၤအဂီၢ်လီၤ” (ကတိၤဒိ ၁၃း၂၂).
အဃိ, နတၢ်အိၣ်မူလၢအအိၣ်တ့ၢ်န့ၣ် ဂုာ်ကျဲးစၢးလၢ နကမ့ၢ်ပှၤအဂ့ၤ, ဒီးမၤတၢ်ဂ့ၤတဖၣ်တက့ၢ်. ဒီးသံကွၢ်လီၤ နသးထီဘိ, “ပှၤလၢယအဲၣ်တဖၣ်အဂီၢ် ယအဲၣ်ဒိးလၢအဝဲသ့ၣ် ကသ့ၣ်နီၣ်ထီၣ်က့ၤယၤဒ်လဲၣ်? ယတၢ်ဆၢကတီၢ် မ့ၢ်လၢာ်ကွံာ်ဝဲန့ၣ် မ့ၢ်ယကကဲထီၣ်ဒံးတၢ်ကွၢ်လိလၢပှၤဂၤအဂီၢ် လၢတၢ်ဂ့ၤတကပၤ, ဒီးလၢယွၤအဂီၢ်စ့ၢ်ကီးဧါ?”
){kind=link}