အုၣ်က့ၤခီၣ်က့ၤတၢ်ခဲကနံၣ်အံၤတက့ၢ်, ယွၤဧၢ. ဒုးဘီၣ်ထီၣ်ညီထီၣ်လၢ်တၢ် ခဲကနံၣ်အံၤတက့ၢ်, ယွၤဧၢ. ပှၤလၢအဟဲဝဲလၢ ယွၤအမံၤန့ၣ် မ်အဘၣ် တၢ်ဆိၣ်ဂ့ၤတက့ၢ်, ပဆိၣ်ဂ့ၤသုလၢ ယွၤအဟံၣ်ပူၤလီၤ. (စံးထီၣ်ပတြၢၤ - ၁၁၈း၂၅-၂၆).ဖဲအပူၤကွံာ်အနံၣ်ခံကထိဘျဲၣ်န့ၣ်, ကစၢ်ယ့ၣ်ရှူးခရံာ်အတၢ်နုာ်လီၤဆူ ဝ့ၢ်ယရူၤရှလ့ၣ်အပူၤ, ဒိးထီၣ်ဒီး ကသ့ၣ်ယီၤဖိတဒုန့ၣ် မ့ၢ်ဝဲ ကစၢ်ယ့ၣ်ရှူးခရံာ် အတၢ်ဖံးတၢ်မၤလၢခံကတၢၢ် အနွံန့ၣ်လီၤ. နမ့ၢ်အိၣ်ဘၣ် လၢပှၤဂီၢ်မုၢ်အကျါန့ၣ်, တမ့ၢ်နကဆိကမိၣ်လၢ ယ့ၣ်ရှူးတဂၤဃီအံၤ ကဘၣ်တၢ်ဖီၣ်အီၤ, တၢ်တီၢ်အီၤ, ဒီးတၢ်ပျၤထီကွံာ်အီၤလၢထူၣ်စုညါလိၤ လၢနွံလၢအကဟဲအပူၤန့ၣ်ဘၣ်.
ပတတဲတၢ်ဂ့ၢ်အဝဲန့ၣ်ဒံးဘၣ်.
ထီလၣ်မုၢ်နံၤ မ့ၢ်နံၤတနံၤလၢ ကစၢ်ယ့ၣ်ရှူးခရံာ်တဲဘၣ်အပျဲၢ်အဘီၣ်လၢ ကလဲၤနုာ်လီၤဆူ ဝ့ၢ်ပူၤဒီး ဃုန့ၢ် ကသ့ၣ်ယီၤဖိလီၤလီၤဆီဆီတဒု, လၢတဘၣ်တၢ်ဒိးအီၤနီတဘျီဒံးဘၣ်န့ၣ်လီၤ. ဆိကမိၣ်ကွၢ်, နမ့မ့ၢ် အပျဲၢ် အဘီၣ်အကျါတဂၤန့ၣ်နကမၤဒ်လဲၣ်. နကလဲၤနုာ်လီၤဆူ ဝ့ၢ်ပူၤ, ဒီးနကထံၣ်ဘၣ်ဒ် ကစၢ်ယ့ၣ်ရှူး ခရံာ် တဲဝဲအသိးလီၤ. ကသ့ၣ်ယီၤအကစၢ်န့ၣ် တတဲအါတၢ်နီတမံၤဘၣ်. ဒ်ကစၢ်ခရံာ်စံးဝဲအသိး မၤဝဲဒၣ် လီၤ. ထဲတၢ်တမံၤဧိၤန့ၣ် မ့ၢ်တၢ်လီၤလးဖးဒိၣ်လီၤ.
ဘၣ်ဆၣ်တကတၢၢ်ကွံာ်ဝဲဖဲန့ၣ်ဒံးဘၣ်.
အဝဲဒိးထီၣ်ကသ့ၣ်ယီၤဖိ, ဒီးလဲၤနုာ်ဆူ ဝ့ၢ်ယရူၤရှလ့ၣ်အပူၤလီၤ. ဖဲဝ့ၢ်ပူၤန့ၣ် ပှၤဂီၢ်မုၢ်အါမး ပာ်ဖှိၣ်ထီၣ် အသးလီၤ. တၢ်ကသီၣ်ကသဲဖးဒိၣ်လီၤ. ပှၤဂီၢ်မုၢ်တဖၣ် ကိးပသူထီၣ်ဝဲလီၤ. သးဝံၣ်ထီၣ်တၢ်ဖးဒိၣ်လီၤ. ဒါလီၤ အတၢ်ကူ ဒီး ထီလၣ်တဖၣ် လၢဟီၣ်ခိၣ်လိၤ ဒ်သိး မ့ၤရှံအၤ အကသ့ၣ်ယီၤသုတယီၢ်ဘၣ်ဟီၣ်ခိၣ် တဂ့ၤ အဂီၢ်လီၤ. မ့ၢ်တၢ်လီၤသူၣ်ပိၢ်သးဝးဒိၣ်မးအဆၢကတီၢ်လီၤ.
ပှၤတဖၣ်အံၤအိၣ်ဒီး တၢ်ဂ့ၢ်လၢအဂ့ၤတဖၣ်လၢ ကစံးထီၣ်ပတြၢၤအီၤအဂီၢ်လီၤ. အဝဲသ့ၣ်နၣ်ဟူဘၣ် ကစၢ်ယ့ၣ်ရှူးခရံာ်အဂ့ၢ်လီၤ. အဝဲသ့ၣ်သ့ၣ်ညါဘၣ်ဃး တၢ်လီၤလးလၢကစၢ်ယ့ၣ်ရှူးခရံာ် မၤတ့ၢ်ဝဲ တဖၣ် န့ၣ်လီၤ. တယံာ်ဘၣ်ဒီး, အဝဲသ့ၣ် ကထံၣ်ဘၣ် တၢ်လီၤလးအဒိၣ်ကတၢၢ်တမံၤလၢအမ့ၢ် အတၢ် ဂဲၤထၢၣ် က့ၤလၢတၢ်သံလီၤ. ဒ်သိး ကထံၣ်ဘၣ်ကစၢ်ယ့ၣ်ရှူးခရံာ်ထဲတဘျးဖိအဂီၢ်န့ၣ်, အဝဲသ့ၣ်မ့ၢ်ဘၣ် ဟ့ၣ်လီၤအတၢ်ကူ ဒၣ်လဲာ် ဟ့ၣ်ဝဲကဲ လီၤ.
အဝဲသ့ၣ်ကိးပသူထီၣ် “ဟိၣ်စဲနၣ်” တဘျီဝံၤတဘျီလီၤ. “ဟိၣ်စဲနၣ်” အခီပညီမ့ၢ် “အုၣ်က့ၤခီၣ်က့ၤပှၤ” န့ၣ်လီၤ. ဒီးဘၣ်တၢ်သူအီၤလၢ စီၤပၤတဖၣ်အဂီၢ်စ့ၢ်ကီးန့ၣ်လီၤ. ခီဖျိလၢအဝဲသ့ၣ်ကိးပသူထီၣ် “ဟိၣ်စဲနၣ်” အဃိ, အဝဲသ့ၣ် ပာ်ပနီၣ် ယ့ၣ်ရှူးလၢအမ့ၢ် “မ့ၤရှံအၤ” န့ၣ်လီၤ. အဝဲသ့ၣ်ဝံၣ်ဝၣ်ဝဲထီလၣ်တဖၣ်, အခီပညီမ့ၢ် တၢ်မၤနၢၤအပနီၣ်န့ၣ်လီၤ. တနွံအံၤအဂီၢ် ပကကွၢ်ဒၣ်အီၤဖဲအံၤလီၤ. အဃိ, ဟံးန့ၢ်တၢ်ဆၢကတီၢ်လၢနဂီၢ်, စံးထီၣ်ပတြၢၤကစၢ်ယ့ၣ်ရှူးခရံာ် ဒ်အမ့ၢ်တၢ်အသိးန့ၣ်တက့ၢ်. ကစၢ်ယ့ၣ်ရှူးခရံာ် မ့ၢ် မ့ၤရှံအၤ, ပှၤအုၣ် က့ၤခီၣ်က့ၤဟီၣ်ခိၣ်လီၤ.
တၢ်ထုကဖၣ် - ကစၢ်ယ့ၣ်ရှူးသးဘိဧၢ, စံးဘျုးနၤဒိၣ်မးလၢ နဟဲလီၤဆူဟီၣ်ခိၣ်ချၢ ဒီးမၤတၢ်လၢပဂီၢ် လီၤလိၢ်လီၤလးလၢ သၢနံၣ်အတီၢ်ပူၤ, နတၢ်မၤလီၤလးတဖၣ်, နတၢ်သိၣ်လိနဲၣ်လိတဖၣ်, ဒီးနတၢ်စံး တၢ်ကတိၤတဖၣ် ကတိၤဒံးတၢ်လိၤလိၤဆူ ပသးကံၢ်ပူၤ ခဲကနံၣ်အံၤဒၣ်လဲာ်လီၤ. အခဲအံၤ, ယစံး, “ဟိၣ်စဲနၣ်”, စီၤပၤလၢအဟဲလၢယွၤအမံၤတဂၤန့ၣ်, မ်အဘၣ်ဆိၣ်ဂ့ၤတက့ၢ်. စံးဘျုးနၤလၢနမ့ၢ် ပှၤအုၣ်ခီၣ်က့ၤပှၤ အဃိလီၤ. အၤမ့ၣ်.
