ယဒီပုၢ်ဝဲၢ်သးဘိသ့ၣ်ဧၢ, သ့ၣ်နီၣ်ထီၣ်က့ၤတၢ်အံၤတက့ၢ်. ပှၤကိးဂၤဒဲးကဘၣ်ချ့လၢ တၢ်နၢ်ဟူတၢ်, ဒီးဃၢဝဲလၢတၢ်ကတိၤ ဒီး တၢ်သးဒိၣ်ထီၣ်န့ၣ်လီၤ. (ယၤကိာ် - ၁း၁၉ ခ့ခါကျိာ်).လံာ်စီဆှံဟ့ၣ်ပှၤ နီၣ်ဝံာ်ခံသၢဘိ လၢပကပၢၤဃာ် ပတၢ်သးဒိၣ်လၢ အဘၣ်ကျဲဘၣ်ကပိၤ အဂီၢ်န့ၣ်လီၤ. ပကကွၢ်သကိးတခါစုာ်စုာ် ဒီး ထံၣ်တၢ်လၢပမၤလိန့ၢ်အီၤသ့ဝဲန့ၣ်တက့ၢ်.
(၁). ကဘၣ်ချ့လၢတၢ်နၢ်ဟူတၢ်. လံာ်စီဆှံလၢသရၣ်မ့ၤစံၣ်ကွဲးဝဲန့ၣ်စံးလၢ “နၢ်ဟူတၢ်ချ့သဒံး,” ဒီးပမ့ၢ် ဟံးအီၤလိၤလိၤလၢ ကိၤလၤဝါကျိာ်တခီ ကမ့ၢ်ဝဲ “ကဘၣ်ချ့လၢတၢ်ကနၣ်တၢ်” န့ၣ်လီၤ. တဘၣ်မၤဆၢ က့ၤတၢ်တဂ့ၤ, ဒီးတဘၣ်ဃ့ၢ်တဘျီဃီဆူ တၢ်စံၣ်ညီၣ်တၢ်န့ၣ်တဂ့ၤ. အိၣ်ပတုာ်ဒီး ဂုာ်ကျဲးစၢး မၤန့ၢ် တၢ်ဂ့ၢ်တၢ်ကျိၤတဖၣ်, ဝံၤဒီး လၢတၢ်ထုကဖၣ်အပူၤ ဆိကမိၣ်လၢ ကစၢ်ယွၤကအဲၣ်ဒိးလၢ နကမၤဆၢက့ၤ အီၤဒ်လဲၣ်န့ၣ်တက့ၢ်.
(၂). ဃၢလၢတၢ်ကတိၤ. နမ့ၢ်တသ့ၣ်ညါလီၤတံၢ်လီၤဆဲး မ့ၢ်ဂ့ၤ, နမ့ၢ်တသ့ၣ်ညါဘၣ်မ့ၢ်ဂ့ၤန့ၣ် တဲအီၤလၢ နတသ့ၣ်ညါဘၣ်န့ၣ်တက့ၢ်. တရူးဖိအတၢ်ကတိၤဒိတခါစံးဝဲ, “နတကတိၤတၢ်နီတမံၤဘၣ်ဒီး ဖျါဒ်ပှၤ ပျုၢ်တဂၤအသိးန့ၣ် ဂ့ၤန့ၢ်ဒံး နအိးထီၣ်နကိာ်ပူၤ ဒီး နအၢၣ်လီၤတၢ်ဒံးန့ၣ်လီၤ.” နကအိၣ်လၢ တၢ်ပၢၤ နသးအပူၤ, မ့တမ့ၢ် နကအိၣ်ဖျါဒ် နအိၣ်ဒီးတၢ်စံးဆၢ ခဲလၢာ်န့ၣ်လဲၣ်. မ့မ့ၢ်ဒ်န့ၣ်တခီ, ကဟဲက့ၤဆူနအိၣ် ဒီး ကအ့ၣ်တံၢ်နၤန့ၣ်လီၤ. တၢ်လၢနတတဲအီၤဘၣ်တဖၣ်န့ၣ်, တလိၣ်လၢနကရှဲပၠးအဂ့ၢ်အကျိၤ, မ့တမ့ၢ် လၢလီၢ်ခံနကဘၣ်ဃ့ဝံသးစူၤက့ၤအီၤလၢၤဘၣ်.
(၃). ဃၢလၢတၢ်သးဒိၣ်ထီၣ်. တိၢ်နီၣ်, လံာ်စီဆှံတစံးဝဲနီတဘျီလၢ သးဒိၣ်ထီၣ်တၢ်တဂ့ၤန့ၣ်ဘၣ်. လံာ်စီဆှံ စံးဝဲလၢ နကဘၣ်သးဒိၣ်ထီၣ်လၢ တၢ်အဘၣ်တဖၣ်အဃိ, လၢကျဲလၢအဘၣ်အပူၤ, လၢတၢ် ဆၢကတီၢ်လၢအဘၣ်န့ၣ်လီၤ. စီၤပၤရှလိၤမိၤ စံးဝဲ, “သးထီၣ်ချ့တဂ့ၤ, အဂ့ၢ်ဒ်အံၤ, တၢ်သးထီၣ်အိၣ်ဝဲ ဆိးဝဲလၢ ပှၤဟးဂီၤဖိအသးနါပှၢ်အပူၤလီၤ.” (ပှၤစံၣ်တဲၤတဲလီၤတၢ် - ၇း၉). လၢတၢ်န့ၣ်အဃိ, တၢ်ပၢၤဃာ် နတၢ်တူၢ်ဘၣ်ခီၣ်ဘၣ်န့ၣ် မ့ၢ်တၢ်လၢ အရ့ဒိၣ်ဒိၣ်မးန့ၣ်လီၤ. တၢ်ပူၤလီၢ်လၢ အဘျါက့ၤ တသ့ဘၣ်န့ၣ် ဒုးအိၣ်ထီၣ် တၢ်ဆူးတၢ်ဆါ လၢအပာ်ဖျါထီၣ် အသးခီဖျိ တၢ်သးထီၣ်န့ၣ်လီၤ. တၢ်ကီတၢ်ခဲ တခါန့ၣ်မ့ၢ်ဝဲ, ပစိာ်ပတၢ်သးထီၣ်ဖဲပလဲၤတပူၤလၢ်လၢ် ဒီး ပာ်ဖျါထီၣ်အီၤဆူ ပှၤဂၤအအိၣ်န့ၣ်လီၤ. လၢတၢ်န့ၣ်အဃိ, ပှၤအဂၤတဖၣ် ထုးယံၤအသးဒီးပှၤ, မ့တမ့ၢ်မၤတံာ်တာ်ပှၤ, မ့တမ့ၢ်သမၢပှၤ လၢပသု တမၤဘူးပသးဒီးအီၤတဂ့ၤ အဂီၢ်န့ၣ်လီၤ.
လံာ်စီဆှံစံးဝဲ, “ပှၤကူၣ်တၢ်သ့န့ၣ်သးထီၣ်ကီ, ဒီးလဲၤကပာ်တၢ်ကမၣ်န့ၣ် မ့ၢ်အလၤကပီၤလီၤ.” (ကတိၤဒိ - ၁၉း၁၁). တၢ်သကဲာ်ပဝးလၢအလီၤဂာ်ဒီးခရံာ်န့ၣ် ဒိၣ်ထီၣ်ခီဖျိ တၢ်မၤထွဲ တၢ်ဝံသးစူၤ, တၢ်အဲၣ်တၢ်ကွံ, ဒီး တၢ်ပၢၤသူၣ်ပၢၤသးသ့ၣ်တဖၣ်န့ၣ်လီၤ.
 ){kind=link}