ပၢၤနသးလၢတၢ်သးထီၣ်, ဒီးညိကွံာ်တၢ်သးဒိၣ်န့ၣ်တက့ၢ်. ဘၣ်ကိၢ်ဘၣ်ဂီၤတဂ့ၤ. တၢ်ကိၢ်တၢ်ဂီၤန့ၣ် မ့ၢ်ဒၣ် တၢ်လၢအဆှၢပှၤဆူ တၢ်အၢတၢ်သီန့ၣ်လီၤ. (ထါစံးထီၣ်ပတြၢၤ - ၃၇း၈ ခ့ခါကျိာ်).နတၢ်သးထီၣ်န့ၣ် မၤဆါပှၤလၢ နသးထီၣ်အီၤတဂၤန့ၣ်သ့ဝဲဒၣ်, မ့တမ့ၢ် တမၤဆါအီၤနီတမံၤဘၣ်န့ၣ် သ့ဝဲလီၤ. သနာ်က့, နတၢ်သးထီၣ်န့ၣ် ကမၤဆါနၤသပှၢ်ကတၢၢ်လီၤ. တၢ်သးထီၣ်လၢ အယံာ်အထၢ န့ၣ် ဒုးအိၣ်ထီၣ် တၢ်အစုၣ်အပျၢ် လၢနမိၢ်ပှၢ်အပူၤ, ဒီးဒုးအါထီၣ် နသွံၣ်အတၢ်ဆီၣ်သနံး, ဒုးအိၣ်ထီၣ် သိလၢ နသွံၣ်ကျိၤပူၤ, ဒီးမၤအါထီၣ် တၢ်ဆါသံတခီပၤ အတၢ်ဘၣ်ယိၣ်သ့ဝဲဒၣ်, ဒီးသးအတၢ်ဆါ သ့ဝဲဒၣ်န့ၣ်လီၤ.
တၢ်ဆၢကတီၢ်ကိးမံးနံးဒဲး လၢနဟ့ၣ် တၢ်သးထီၣ်အဂီၢ်န့ၣ် ကဲထီၣ်မံးနံးတဖၣ်လၢ အထုးကွံာ် နတၢ်သး ခုသ့ၣ်တဖၣ်န့ၣ်လီၤ. ဒီးမၤဆါ နနီၢ်ကစၢ်ဒၣ်နဲ တကးဘၣ် မၤဆါ နတၢ်ဖံးတၢ်မၤသ့ဝဲလီၤ. ပှၤကိးဂၤဒဲး အိၣ်ဒီး တၢ်သူၣ်အုးသးအုးလၢ တၢ်ဆၢကတီၢ် တဘျီဂ့ၤတဘျီဂ့ၤ အပူၤသ့ဝဲလီၤ. ဘၣ်ဆၣ် ဖဲနဟးဆူန့ၣ် ဆူအံၤ စိာ်ဃုာ်ဒီး တၢ်သးထီၣ် လၢနမဲာ်အလိၤန့ၣ် ပှၤကဟးဆှဲးနၤလီၤ. တကးဒံးဘၣ်, နကစံးဆၢပှၤ အဂၤတဖၣ် အတၢ်သံကွၢ်လၢ တၢ်သးထီၣ်အပူၤစ့ၢ်ကီးန့ၣ်လီၤ.
ကစၢ်ယွၤအဲၣ်ဒိးလၢ နကအိၣ်မူလၢ တၢ်ဃူတၢ်ဖိးအပူၤန့ၣ်လီၤ. အဃိ, အဝဲအံၤမ့ၢ်ကျဲလွံၢ်ဘိလၢ နကပျဲ ကွံာ်နတၢ်သးထီၣ်အဂီၢ်န့ၣ်လီၤ.
(၁). သ့ၣ်ညါနတၢ်သးထီၣ်အခီၣ်ထံးခီၣ်ဘိ လၢအမၤဆါနၤ ဒီးဒုးအိၣ်ထီၣ် နတၢ်ဆိကမိၣ်န့ၣ် မ့ၢ်တၢ်မနုၤ လဲၣ်န့ၣ်တက့ၢ်. (မ့ၢ်တၢ်ပာ်ထီၣ်ထီနသးတခီဧါ).
(၂). ပာ်သူၣ်ပာ်သးလၢ နတၢ်သးထီၣ်န့ၣ် ပာ်ဖျါထီၣ်အသးဒ်လဲၣ်န့ၣ်တက့ၢ်. (မ့ၢ်နပၢၤနသးတန့ၢ်ဘၣ် တခီဧါ, မ့တမ့ၢ် မ့ၢ်နကတိၤအၢကတိၤသီတၢ်တခီဧါ).
(၃). ပၢၤဃာ်နတၢ်သးဒိၣ် လၢနမိၢ်ပှၢ်အပူၤ ခီဖျိ ကသါနုာ်လီၤကလံၤယိာ်ယိာ်, ဒီး ကသါထီၣ်က့ၤအီၤ ခဲလၢာ်, ဒီးစံး, “တၢ်ဘျုး, ပၢ်ဧၢ,” မ့တမ့ၢ် “အခဲအံၤယဒိးန့ၢ်နတၢ်ဃူတၢ်ဖိးလံ.” ကွၢ်နတၢ်စံးတၢ်ကတိၤ လၢတၢ်ခဲလၢာ်အပူၤ, သုတမ့ၢ်ထဲလၢ ပှၤလၢအမၤသးထီၣ်နၤ တဂၤန့ၣ်တဂ့ၤ. ဃ့သကွံၢ်ကညးတၢ် တက့ၢ်. တဘၣ်ဟ့ၣ်လီၤတၢ်ကလုၢ်တဂ့ၤ. အန့ၣ်မး နကတူၢ်ဘၣ်လၢ နပၢၤနသးန့ၢ်ဝဲ, ဒီးပှၤအဂၤတဖၣ် ကမၤ သကိးတၢ်ဒီးနၤန့ၣ်လီၤ.
(၄). ပာ်လီၤနသးလၢနကပျၢ်ပှၤဂၤအတၢ်ကမၣ်တက့ၢ်. ဖဲနဟ့ၣ်လီၤနသးလၢ ကစၢ်ယွၤ အတၢ်မ့ၢ် တၢ်တီအပူၤ, ဒီးနာ်န့ၢ် ကစၢ်ယွၤ အတၢ်ဆၢကတီၢ်န့ၣ် နကသ့ၣ်ညါလၢ နပျၢ်လံ ပှၤဂၤအတၢ်ကမၣ်လံ န့ၣ်လီၤ. ဘၣ်ဆၣ် တၢ်မ့ၢ်တၢ်တီန့ၣ် နကတူၢ်ဘၣ်လၢ နအိၣ်ဒံးဒီး တၢ်သးဘၣ်ဒိဒံးန့ၣ်လီၤ. သနာ်က့, နမ့ၢ်အိးထီၣ်နတၢ်ပူၤလီၢ် တလီၢ်လီၢ်ခီဖျိ နကတိၤဒံးအဂ့ၢ်အကျိၤန့ၣ်, နတၢ်ပူၤလီၢ်တဘျါနီတဘျီဘၣ်. တၢ်တူၢ်ဘၣ်ယိာ်ယိာ်တဖၣ် လိၣ်ဘၣ် တၢ်တဲမုာ်အီၤလၢအအိၣ်ဒီးတၢ်သ့တၢ်ဘၣ်န့ၣ်လီၤ. ဒုးအိၣ်ထီၣ် တၢ်ပာ်လီၤနသးလၢ နကမၤဘၣ်ဂီၢ်က့ၤ နသးလၢအတပျၢ်ပှၤဂၤအတၢ်ကမၣ်ဘၣ် န့ၣ်တက့ၢ်.
 ){kind=link}