ဒီးယသ့ၣ်နီၣ်ထီၣ်က့ၤတၢ်နာ်နီၢ်နီၢ်, လၢအအိၣ်လၢနပူၤ, ဒီးအိၣ်ဆိလၢ နဖံနီၢ်လိၤအ့ၣ်အပူၤ, ဒီးလၢ နမိၢ် နီၢ်အူနံက့ၤအပူၤ, ဒီးယနာ်နီၢ်နီၢ်လၢ အအိၣ်စ့ၢ်ကီးလၢနပူၤန့ၣ်လီၤ. (၂ တံၤမသ့း ၁း၅).ကစၢ်ယွၤအဲၣ်ဘၣ်မိၢ်တဖၣ် ဒီးအဝဲဒၣ် အဲၣ်ဒိးလၢ မိၢ်တဖၣ်ကလဲၤခီဖျိဘၣ် အတၢ်အဲၣ်လၢ အဒိၣ်အယိာ် န့ၣ်လီၤ. မိၢ်တဖၣ်အိၣ်ဒီး တၢ်ဃုထၢလၢ ကဃုကစၢ်ယွၤ ဒီးနာ်အီၤ လၢတၢ်ကိးမံၤဒဲးအပူၤ, မ့တမ့ၢ် တဃု ထၢဘၣ်လဲၣ်န့ၣ်လီၤ. ကစၢ်ယွၤအိၣ်ဒီး တၢ်ခဲလၢာ်ခဲဆ့ လၢပအဲၣ်ဒိးအီၤတဖၣ် ဒီး အိၣ်ခိးဒိကနၣ် ပှၤလၢ အနာ်အီၤတဖၣ် အတၢ်ဃ့ထီၣ် လၢအဆံးမ့ၢ်ဂ့ၤ အဒိၣ်မ့ၢ်ဂ့ၤခဲလၢာ်န့ၣ်လီၤ.
အ့းဖ့းစူး ၃း၁၆-၁၉ စံးဝဲ, “ဒ်သိးအကဟ့ၣ်လီၤသုဒ် အလၤထူးအကပီၤတီၤအသိး, လၢသုနီၢ်လၢညါ ကန့ၢ်ဘၣ် အဂံၢ်ဆူၣ်အဘါဆူၣ်လၢသးအဃိ, ဒ်သိး ခရံာ်ကအိၣ်ဝဲဆိးဝဲလၢ သုသးအပူၤလၢ တၢ်နာ် အဃိ, ဒ်သိးသုဂံၢ်စဲၤလီၤ, ဒီးသုခီၣ်ထံးပာ်ကျၢၤအသးလၢ တၢ်အဲၣ်တၢ်ကွံအပူၤ သတးဒီး, သုနၢ်ကပၢၢ် ထီၣ်သကိးဒီး ပှၤစီဆှံခဲလၢာ်, ဒီး သုကသ့ၣ်ညါထီၣ် တၢ်လၢအမ့ၢ် ခရံာ်အတၢ်အဲၣ်တၢ်ကွံအဒီၣ်တူာ်, ဒီး အထီ, ဒီးအလီၤဆၢၣ်, ဒီးအထီၣ်ထီ, ဒီးဒ်သိး သုကသ့ၣ်ညါခရံာ်အတၢ်အဲၣ်လၢ ပသ့ၣ်ညါလၢာ်တသ့ ဘၣ်, ဒ်သိးသုကလၢထီၣ်ပှဲၤထီၣ်ဒီးယွၤ အတၢ်လၢတၢ်ပှဲၤခဲလၢာ်လီၤ.”
မိၢ်တဖၣ် ဘၣ်ကွၢ်ဆၢၣ်မဲာ် တၢ်တၤတၢ်ဒီးအီၤအါမးလၢအမ့ၢ် တၢ်ဆီၣ်သနံးလၢဟီၣ်ခိၣ်အံၤ ဟ့ၣ်ဝဲ လၢကိးနံၤဒဲးအပူၤန့ၣ်လီၤ. အဃိ, အဖိတဖၣ်အနီၢ်သး, အနီၢ်ခိ ဒီး အသးအတၢ်တူၢ်ဘၣ် အတၢ် လိၣ်ဘၣ်တဖၣ် ကမၤလၢပှဲၤဝဲအဂီၢ် မ့ၢ်တၢ်လၢ အကီဒိၣ်မးန့ၣ်လီၤ. တုၤလၢမုၢ်နံၤကတၢၢ်န့ၣ် မိၢ်တဖၣ် လီၤဘှံးလီၤတီၤဝဲဒိၣ်မးလီၤ. တၢ်တၤတၢ်တဖၣ် အိၣ်ဝဲဖဲန့ၣ် ထီဘိ လၢ အဝဲသ့ၣ်အသးကံၢ်ပူၤ လၢကမၤဒ် ကစၢ်ယွၤအကလုၢ်ကထါအသိး လၢတၢ်အိၣ်သးတခါဂ့ၤတခါဂ့ၤ အဖီခိၣ် န့ၣ်လီၤ. တၢ်မ့ၢ်တၢ်တီန့ၣ်မ့ၢ်ဝဲ ပတၢ်နာ်စူၢ်တၢ်နာ်ကစၢ်ယွၤ ကမ့ၢ်ပတၢ်ဂံၢ်တၢ်ဘါတပယူာ်ဃီ ဖဲ တၢ်ဆၢကတီၢ်အကီအခဲတဖၣ်အပူၤန့ၣ်လီၤ.
မိၢ်တနီၤလဲၤဆှၢအဖိဆူကၠိဝံၤဒီး လဲၤဝဲဒၣ်ဆူအတၢ်ဖံးတၢ်မၤအလီၢ်န့ၣ်လီၤ. ဒ်တၢ်ကတိၤအိၣ်ဝဲဒၣ် တလီၢ်လီၢ် အသိး, “မိၢ်အတၢ်ဖံးတၢ်မၤန့ၣ်တဝံၤနီတဘျီဘၣ်.” မိၢ်တဖၣ်အတၢ်မၤမ့ၢ်အါလၢ ဟံၣ်လၢဃီဘၣ်ဆၣ်, အဝဲသ့ၣ်တဖၣ် အတၢ်ဖံးတၢ်မၤအဒိၣ်ကတၢၢ်န့ၣ် ကဘၣ်မ့ၢ် တၢ်သိၣ်လိအဖိ တဖၣ်လၢ တၢ်အဲၣ်ထူအဲၣ်ယွၤန့ၣ်လီၤ. ဒ်မိၢ်တဖၣ်အသိး, အဝဲသ့ၣ်ကဘၣ်အိၣ်မူလီၤဂာ်ဒီးခရံာ် တပယူာ်ဃီ ဒ်အဝဲ ဒၣ်အဲၣ်ဒိး အဖိတဖၣ်ကမၤလိန့ၢ်ဝဲ အဂီၢ်န့ၣ်လီၤ.
ဖဲဖိသၣ်တဖၣ် ကွၢ်မိၢ်အတၢ်စူၢ်တၢ်နာ်လၢကစၢ်ယွၤအပူၤန့ၣ်, အဝဲသ့ၣ်ကနၢ်ပၢၢ် တၢ်အိၣ်မူလၢ အလီၤဂာ်ဒီးခရံာ်, ဒီးတၢ်နာ်ကစၢ်ယွၤ မ့ၢ်ကျဲထဲတဘိဧိၤလၢ ကလဲၤတၢ်ဆူညါအဂီၢ်န့ၣ်လီၤ.
ဒီးယသ့ၣ်နီၣ်ထီၣ်က့ၤတၢ်နာ်နီၢ်နီၢ်, လၢအအိၣ်လၢနပူၤ, ဒီးအိၣ်ဆိလၢ နဖံနီၢ်လိၤအ့ၣ်အပူၤ, ဒီးလၢ နမိၢ် နီၢ်အူနံက့ၤအပူၤ, ဒီးယနာ်နီၢ်နီၢ်လၢ အအိၣ်စ့ၢ်ကီးလၢနပူၤန့ၣ်လီၤ. (၂ တံၤမသ့း ၁း၅).
ဘၣ်ဆၣ် တၢ်မ့ၢ်တၢ်တီန့ၣ်, မိၢ်အိၣ်ဝဲတနီၤ လၢအတအိၣ်ဒီး အနီၢ်ကစၢ်အတၢ်ရ့လိာ်သးဒီး ကစၢ်ယွၤဘၣ် န့ၣ်လီၤ. ဘၣ်ဆၣ်တၢ်ကစီၣ်လၢအဂ့ၤန့ၣ်မ့ၢ်ဝဲ, ကစၢ်ယွၤန့ၣ် ဒိကနၣ်ဝဲဒၣ်ထီဘိ ဒီးအိၣ်ခိးဝဲ နတၢ်ကိးထီၣ် အီၤန့ၣ်လီၤ. အဝဲအိၣ်ဝဲဒၣ်လၢ ကကနၣ်နသးအတၢ်ကိးပသူထီၣ်န့ၣ်လီၤ. အဃိ, ကွဲမုာ် ကစၢ်ယွၤလၢနတၢ်အိၣ်မူအပူၤ, ဒီး လဲၤဆူသရိာ်ဃုာ်ဒီးနဖိတဖၣ်တက့ၢ်.
တၢ်ဃုထၢန့ၣ်အိၣ်ဝဲဒၣ်လၢနစုပူၤလီၤ. တၢ်ဆိၣ်ဂ့ၤဆိၣ်ဝါတဖၣ် ကဲထီၣ်လၢနဂီၢ်သ့စ့ၢ်ကီးဝဲလီၤ.
ကတိၤဒိ ၃း၅-၆ စံးဝဲ, “သန့ၤနသးလၢယွၤ လၢနသးဒီဖျၢၣ်ညါတက့ၢ်. ဒီးသုတသန့ၤနသးလၢ နတၢ်ကူၣ် တၢ်ဆးဒၣ်နဲတဂ့ၤ. သ့ၣ်ညါယွၤလၢနကျဲခဲလၢာ်အပူၤတက့ၢ်. ဒီးအဝဲဒၣ်ကမၤလိၤနကျဲလီၤ.”
