ဒီးယ့ၣ်ရှူးစံးဘၣ်အီၤ, ပိာ်ယခံတက့ၢ်. ဒီးယကပာ်သုလၢ ပှၤမၤညၣ်ပှၤကညီလီၤ. (မးသဲ - ၄း၁၉).ဆိကမိၣ်ကွၢ်, ဖဲနဒိးန့ၢ်တၢ်ကွဲမုာ်တခါလၢ ကဆီတလဲနတၢ်အိၣ်မူ ဒီတစိၤညါန့ၣ် နသးကမၤအသး ဒ်လဲၣ်. စီၤရှံမိၣ်ပ့းတရူး ဒီးအဒီပုၢ်ဝဲၢ် စီၤအၣ်ဒရ့း ဒိးန့ၢ် တၢ်ကွဲမုာ်တခါအံၤ န့ၣ်လီၤ. တနံၤန့ၣ်, ကစၢ်ယ့ၣ် ရှူးခရံာ် လဲၤဆူအဝဲသ့ၣ်အအိၣ် ဃုာ်ဒီး တၢ်လီၢ်တၢ်လၤလၢ ကဆီတလဲအဝဲသ့ၣ် အတၢ်အိၣ်မူ တစိၤသး န့ၣ်လီၤ. ကစၢ်ယ့ၣ်ရှူးခရံာ် စံးဘၣ်အဝဲသ့ၣ်, “တုၤလၢခဲအံၤ, သုတၢ်အိၣ်မူဒီတစိၤညါ န့ၣ် အိၣ်ဒၣ်ထဲလၢ သုဖီၣ်အီၣ်ညၣ် ဒီး ဆါအီၣ်ညၣ်လီၤ. မ့ၢ်သုကမၤသကိးတၢ်ဒီးယၤဧါ. ယကသိၣ်လိသု လၢ သုကဘၣ်ဖီၣ် သးသမူလၢအလုၢ်ဒိၣ်ပှ့ၤဒိၣ် လၢကစၢ်ယွၤအဘီအမုၢ်အဂီၢ်ဒ်လဲၣ်လီၤ.”
လၢကစၢ်ယ့ၣ်ရှူးခရံာ်အဂီၢ်, တၢ်ကဲထီၣ်အပျဲၢ်အဘီၣ် (တၢ်ပိာ်ခရံာ်အခံ) ဒီး တၢ်မၤတၢ်သးခုကစီၣ် အတၢ်မၤ (တၢ်မၤညၣ်ပှၤကညီ) န့ၣ်မ့ၢ်တၢ်လၢအလဲၤသဃဲၤလိာ်အသးန့ၣ်လီၤ. ဖဲပထံၣ်လီၤပသးလၢ ပအိၣ်ဒီးတၢ်ပူၤဖျဲးလၢ ကစၢ်ယ့ၣ်ရှူးခရံာ်အချံမူအပူၤန့ၣ်, ပကဘၣ်ယူာ်ပစု လၢကမၤစၢၤ ပှၤဂၤအဂီၢ် လၢကထီၣ်လၢချံမူအပူၤ ဒီး မၤသကိးတၢ်ဒီးကစၢ်ယ့ၣ်ရှူးခရံာ်အဂီၢ် စ့ၢ်ကီးန့ၣ်လီၤ. တၢ်ကိးအဝဲအံၤ, တမ့ၢ်တၢ်ကိးလၢ ပတၢ်အိၣ်မူအတၢ်ဖံးတၢ်မၤအဂီၢ် ဧိၤဘၣ်. မ့ၢ်တၢ်ကိးတခါလၢ ပာ်ဖျါထီၣ် ပမ့ၢ်မတၤ လဲၣ်, ဒီး ဒ်ကစၢ်ခရံာ်အပျဲၢ်အဘီၣ်အသိး ပကဘၣ်မၤတၢ်မနုၤလဲၣ်န့ၣ်လီၤ. ပှၤနာ်တၢ်ဖိကိးဂၤဒဲး ဘၣ်တၢ်ကိးအီၤလၢယွၤ လၢအကကဲထီၣ် ပှၤမၤညၣ်ပှၤကညီလီၤ. တၢ်အိၣ်ဖှိၣ်ဖိကိးဂၤဒဲး ဘၣ်တၢ်ကိး အီၤ လၢကမၤ တၢ်သးခုကစီၣ်အတၢ်မၤလၢ ကစၢ်ခရံာ်အဘီအမုၢ်အဂီၢ် န့ၣ်လီၤ.
ဒ်သိးပကမၤလၢပှဲၤတၢ်ကိးအံၤကန့ၢ်အဂီၢ်, ပကဘၣ်မၤလိ ဆိကမိၣ်တၢ်ဒ်ညၣ်အသိး, ဃုမၤလိဒီး နၢ်ပၢၢ် အဝဲသ့ၣ်အကျဲအကပိၤတဖၣ်န့ၣ်လီၤ. ပကဘၣ်ကွံာ်တခွဲတပယူာ်ဃီ ဆူညၣ်လၢ ကမီာ်အီၣ်အဆၣ် အအိၣ်န့ၣ်လီၤ. ညၣ်မ့တအ့ၣ်တခွဲဘၣ်န့ၣ်, ပလဲၤဆူမဲာ်ညါတစဲးသ့ ဝံၤမး ပဟဲက့ၤကဒါက့ၤလၢခံ န့ၣ်လီၤ. ညၣ်တနီၤနီၤ အခဲအံၤ တၢ်တသၣ်ဝံၤအသးဒံးဘၣ်. ဘၣ်ဆၣ်, ဘၣ်သ့ၣ်သ့ၣ် ဆူညါ ဃုလါ မ့တမ့ၢ် စှၤနံၣ်န့ၣ်, ကစၢ်ယွၤအသးစီဆှံ ကကတဲာ်ကတီၤအဝဲသ့ၣ်အသးလီၤ. ပကအိၣ်ခိး လၢတၢ်သး စူၤအပူၤ လၢကစၢ်ယွၤကမၤတၢ် လၢအဝဲသ့ၣ်အသးပူၤ ဖဲပမၤညၣ်ပှၤကညီအဂၤတဖၣ်အခါန့ၣ်တက့ၢ်.
){kind=link}