ဒီးလၢပှၤကးဖိအကျါန့ၣ် ပှၤနီၤဖးလီၤအသးလၢ စီၤဒၤဝံးအဂီၢ် ဆူတိာ်လၢပှၢ်လၢ်ကျါ, ပှၤအဆူၣ်, ပှၤသုးဖိ, ပှၤလၢအလဲၤဒုးသုး, ပှၤကတဲာ်ကတီၤဝဲဒီး ကတီၤဖးဒိၣ်, ဒီးကတီၤဖိ, ပှၤလၢ အမဲာ်မ့ၢ် ခ့ယုၢ်အမဲာ်, ဒီးလဲၤတၢ်ချ့ဒ် တၤဟိစဘံလၢကစၢၢ်အသိးန့ၣ်, - (၁ ကွဲးနီၣ်တၢ် - ၁၂း၈).တၢကွဲးနီၣ်တၢ် အဆၢဒိၣ်တဆံခံ ပာ်ဖျါထီၣ် ပှၤဒုးတၢ်လၢအဂံၢ်ဆူၣ်ဘါဆူၣ် လၢကစၢ်ယွၤအတၢ် မၤအဂီၢ်, လၢအအိၣ်ဒီးတၢ်မၤလိအသးမူာ်မူာ်နီၢ်နီၢ်, လၢအအိၣ်ဒီးတၢ်ပလီၣ်ပဒီအသးထီဘိ, လၢအအိၣ် ကတီၤအသးလၢလၢပှဲၤပှဲၤ, ဒီးကိးထီၣ်ပှၤနာ်တၢ်ဖိတဖၣ် လၢကအိၣ်ဒီး တၢ်ကတဲာ်ကတီၤသးလၢ နီၢ်သးတကပၤ ခီဖျိ ကစၢ်ယွၤအကလုၢ်ကထါ, ခီဖျိ တၢ်ထုကဖၣ်, ဒီး ခီဖျိ တၢ်ဒိကနၣ်မၤထွဲဒ် ကစၢ်ယွၤ အတၢ်ပၢတၢ်ဆှၢအီၤအသိးန့ၣ်လီၤ.
ဒ်ပှၤသုးဖိအါဂၤလၢ စီၤဒၤဝံးအသုးမုၢ်အပူၤအသိး, ပှၤကးဖိလၢ မၤသကိးတၢ်ဒီး စီၤဒၤဝံး လၢပှၢ်မုၢ် ကနၢအပူၤတဖၣ်စ့ၢ်ကီး ဘၣ်တၢ်ကိးအဝဲသ့ၣ်လၢ “ပှၤအဆူၣ်တဖၣ်” န့ၣ်လီၤ. ဒ်သိးတၢ်ကကိးအီၤ ဒ်အံၤအဂီၢ် အဝဲသ့ၣ် မၤတ့ၢ်တၢ်မနုၤတဖၣ်လဲၣ်.
အခီၣ်ထံးတခါန့ၣ်, အဝဲသ့ၣ်မ့ၢ် “ပှၤသုးဖိလၢ အအိၣ်ဒီးတၢ်လဲၤခီဖျိတဖၣ်” န့ၣ်လီၤ. အဝဲသ့ၣ်သ့ၣ်ညါ တၢ်ဒုးတၢ်ယၤအကျိၤအကျဲတဖၣ် ဒီးထီဘိန့ၣ် အိၣ်ကတဲာ်ကတီၤအသးလၢ တၢ်ဒုးသုးအဂီၢ်န့ၣ်လီၤ.
ခံခါတခါန့ၣ်, အဝဲသ့ၣ်မ့ၢ် ပှၤသ့ပှၤဘၣ်လၢ တၢ်ဒီသဒၢ ဒီး တၢ်ထီၣ်ဒုးသဖှိ ခံကပၤလၢာ်လီၤ.
သၢခါတခါန့ၣ်, အဝဲသ့ၣ် အိၣ်ဒီးတၢ်ပလီၣ်ပဒီအသးထီဘိ, ဒီးကွၢ်တၢ်လိၤလိၤဆူအဒုၣ်အဒါအအိၣ်, ဃုာ်ဒီး တၢ်ပာ်လီၤသးလၢလၢပှဲၤပှဲၤလၢ တၢ်ထံၣ်န့ၢ်အီၤသ့လၢအမဲာ်အတၢ်အိၣ်ဖျါအပူၤန့ၣ်လီၤ. အဝဲသ့ၣ် အိၣ်ဒီးတၢ်နာ်န့ၢ်လီၤသးလၢလၢပှဲၤပှဲၤ ဒီး အိၣ်ဒီးတၢ်သးစၢၢ်ဆၢလၢ အတၢ်ဖံးတၢ်မၤအပူၤန့ၣ်လီၤ.
လွံၢ်ခါတခါန့ၣ်, အဝဲသ့ၣ်လဲၤတၢ်ချ့ဒိၣ်မး ဒီး မၤဆၢက့ၤတၢ် ချ့မးန့ၣ်လီၤ. အဝဲသ့ၣ်ကတဲာ်ကတီၤ အသးထီဘိဖဲ အခိၣ်အနၢ်တဖၣ် ကိးအဝဲသ့ၣ်အခါန့ၣ်လီၤ.
တၢ်သ့ၣ်တဖၣ်အံၤ မ့ၢ်တၢ်သကဲာ်ပဝးလၢ အလီၤဂာ်ဒီး နီၢ်သးအသုးဖိတဖၣ် စ့ၢ်ကီးန့ၣ်လီၤ. နမ့ၢ်အဲၣ်ဒိး ကဲထီၣ် ပှၤသုးဖိလၢအဆူၣ် လၢကစၢ်ယွၤအသုးမုၢ်အပူၤန့ၣ်, မၤလိန့ၢ်တၢ်လၢ ပှၤကးဖိတဖၣ်အံၤ အအိၣ် တက့ၢ်.
အိၣ်ဒီးတၢ်မၤလိသးလၢလၢပှဲၤပှဲၤ ဒီး အိၣ်ဒီး တၢ်ကတဲာ်ကတီၤသးထီဘိတက့ၢ်. သ့ၣ်ညါကစၢ်ယွၤ အကလုၢ်ကထါတက့ၢ်. အိၣ်ဒီး တၢ်အိၣ်မူလၢ အလၢအပှဲၤဒီး တၢ်ထုကဖၣ်တဘိယူၢ်ဃီ, ဒီး တၢ်ရ့လိာ်သး ဘူးဘူးတံၢ်တံၢ်ဒီး ကစၢ်ယွၤလၢအမ့ၢ် နသုးခိၣ်ဖးဒိၣ်တဂၤ န့ၣ်တက့ၢ်. အိၣ်ကတဲာ်ကတီၤ သးထီဘိလၢ နကဒီသဒၢလီၤနသး ဖဲနဒုၣ်နဒါဟဲဒုးနၤတဘျီလၢ်လၢ်, ဒီး အိၣ်ကတဲာ်ကတီၤသးထီဘိလၢ နကဒုးတၢ်အဂီၢ်န့ၣ်တက့ၢ်. (အ့းဖ့းစူး - ၆း၁၀-၂၀). အိၣ်ပလီၣ်ပဒီသးထီဘိ, ပာ်လီၤနသးကျၢၤမူဆှု, ဒီး ကွၢ်တၢ်လိၤလိၤဆူနမဲာ်ညါတက့ၢ်. တဘၣ်ပျဲ တၢ်မၤတံာ်တာ်နၤနီတမံၤတဂ့ၤ, မ့မ့ၢ်တခီ ပာ်နမဲာ်လိၤလိၤ ဆူ ဖီတၢၣ်လၢ ကစၢ်ယွၤဟ့ၣ်လီၤနၤတက့ၢ်.
ဖဲနဘၣ်သဂၢၢ်ဒီး တၢ်ထီဒါနၤ မ့တမ့ၢ် တၢ်ကီတၢ်ခဲတဖၣ်န့ၣ်, သးဟးဂီၤတဂ့ၤ. အိၣ်ဒီးတၢ်နာ်န့ၢ်လီၤသး, ဒီး ပျဲသးစီဆှံပၢဆှၢနၤတက့ၢ်. အိၣ်ကတဲာ်ကတီၤနသးထီဘိလၢ နကစံးဆၢက့ၤတၢ်ချ့သဒံး, ဒီး ဒိကနၣ် မၤထွဲဖဲ ကစၢ်ယွၤကတိၤတၢ်ဒီးနၤ တဘျီလၢ်လၢ်တက့ၢ်.
