ဖိသၣ်ဒၣ်လဲာ်န့ၣ် အမၤတၢ်ကဆှီဧါ, အမၤတၢ်လိၤဧါန့ၣ် ပှၤသ့ၣ်ညါအီၤလၢ အမၤတၢ်လီၤ. (ကတိၤဒိ - ၂၀း၁၁).ညီနုၢ်ပဆိကမိၣ်လၢ ပှၤအဂၤ သ့ၣ်ညါပှၤခီဖျိ ပဂ့ၢ်ပကျိၤလၢ ပတဲဖျါထီၣ်အီၤတဖၣ်န့ၣ်လီၤ. ပတဲပှၤ အဂၤတဖၣ်လၢ ပမ့ၢ်ပှၤသးဂ့ၤ, ပှၤမၤတၢ်တီတီလိၤလိၤ, ပှၤလၢအသးတီ, မ့တမ့ၢ် ပှၤလၢ တၢ်နာ်န့ၢ်အီၤ သ့န့ၣ်လီၤ. ကတိၤဒိ ၂၂း၁၁ ဒုးသ့ၣ်နီၣ်ထီၣ်က့ၤပှၤလၢ ပတၢ်သကဲာ်ပဝး လီၣ်ဖျါထီၣ်အသး ခီဖျိ ကျဲလၢ ပအိၣ်မူအီၤအပူၤသ့ဝဲလီၤ.
“ဖိသၣ်ဒၣ်လဲာ်န့ၣ် ပှၤသ့ၣ်ညါအီၤလၢ အမၤတၢ်လီၤ.”
ပှၤတဂၤအတၢ်သကဲာ်ပဝးန့ၣ် လီၢ်ခံကတၢၢ် လီၣ်ဖျါထီၣ် တၢ်လၢအအိၣ်လၢ အသးပူၤန့ၣ်လီၤ. ပတၢ်ဃုထၢ, ပတၢ်မၤဆၢက့ၤတၢ်တဖၣ်, ပတၢ်ပာ်သူၣ်ပာ်သးတဖၣ်, ဒီး ပတၢ်ရ့ဒီးပှၤအဂၤတဖၣ် ဒုးနဲၣ် ဖျါထီၣ် ပမ့ၢ်တၢ်မနုၤလဲၣ်န့ၣ်လီၤ.
လၢတၢ်န့ၣ်အဃိ, ပတၢ်သကဲာ်ပဝးန့ၣ် တမ့ၢ်ထဲ ပစံးလၢ ပအိၣ်ဒီးတၢ်ဒ်အံၤဒ်နုၤန့ၣ်ဘၣ်. ပသ့ၣ်ညါအီၤ သ့ခီဖျိလၢ တၢ်လၢပမၤအီၤကိးနံၤဒဲးအပူၤန့ၣ်လီၤ.
တၢ်ကတိၤဒိ သူဝဲ ဖိသၣ်ဒ် တၢ်အဒိတမံၤအသိး မ့ၢ်လၢ ဖိသၣ်တဖၣ် ညီနုၢ်လီၣ်ဖျါထီၣ် အသးဒၣ်ဝဲ ခီဖျိ အဝဲသ့ၣ်အတၢ်ဖံးတၢ်မၤ ဒ်အန့ဆၢၣ်ဒၣ်ဝဲအသိးန့ၣ်လီၤ. ပှၤဒိၣ်တုာ်ခိၣ်ပှဲၤသနာ်က့ မ့ၢ်ဒၣ်တၢ်ဒ် သိးသိးလီၤ.
ဆိကမိၣ်ကွၢ်, ဖဲပှၤတဂၤဂၤ မၤဟးဂီၤနသးန့ၣ် နမၤဆၢက့ၤအီၤဒ်လဲၣ်. ဖဲနသးဒိၣ်ထီၣ်အခါန့ၣ် နတၢ်ပာ် သးအိၣ်ဒ်လဲၣ်. ဖဲပှၤတဂၤဂၤ တကွၢ်နၤအခါန့ၣ် နမၤမနုၤလဲၣ်. ဖဲပှၤတဂၤဂၤ ဟ့ၣ်ဆၢက့ၤနၤတၢ်တအိၣ် နီတမံၤဘၣ်န့ၣ် နမၤအီၤဒ်လဲၣ်.
ပတၢ်ဟူးတၢ်ဂဲၤယိယိဖိတဖၣ်အံၤ လီၣ်ဖျါထီၣ် ပသကဲာ်ပဝး အါန့ၢ်ဒံး ပတၢ်စံးတၢ်ကတိၤ တဖၣ်န့ၣ်လီၤ. ကစၢ်ယွၤကွၢ်တၢ်အါန့ၢ်ဒံး ပတၢ်အိၣ်ဖျါလၢခိတဖၣ် ဒီး ထံၣ်ပသးလီၤ. လၢပှၤအဂၤတဖၣ်အမဲာ်ညါ ပတဲဖျါထီၣ်ပတၢ်မ့ၢ်တၢ် ဒ်ပအဲၣ်ဒိးအသိး မ့ၢ်န့ၢ်ဘၣ်ဆၣ်, လၢယွၤအမဲာ်ညါ ပပာ်ခူသူၣ်တၢ်တန့ၢ်နီတမံၤ ဘၣ်.
