အဂ့ၢ်ဒ်အံၤ, ယွၤဟ့ၣ်လီၤတၢ်ကူၣ်သ့လီၤ. တၢ်သ့ၣ်ညါ, ဒီးတၢ်သူၣ်ဆးသးဆး ထီၣ်ဖျဲးလၢအထးခိၣ် လီၤ. (ကတိၤဒိ - ၂း၆).တၢ်ကတိၤတဘီစံးဝဲ, “တၢ်သ့ၣ်ညါန့ၣ်မ့ၢ်တၢ်စိတၢ်ကမီၤလီၤ.” မ့ၢ်တၢ်လၢအဘၣ်ဝဲတီဝဲလီၤ. လၢနီၢ်သး တကပၤစ့ၢ်ကီး မ့ၢ်တၢ်လၢ အဘၣ်ဝဲတီဝဲလီၤ. နမ့ၢ်သ့ၣ်ညါယွၤအါထီၣ်, နအိၣ်ဒီးတၢ်နာ်လီၤသးအါထီၣ် လီၤ. တၢ်သ့ၣ်ညါကစၢ်ယွၤအကလုၢ်ကထါ ဘှါလီၤကွံာ် ပတၢ်အိၣ်မူအတၢ်ဘၣ်ဂံာ်ဂူာ်သ့ဝဲလီၤ. ဖဲတၢ်ဘူၣ်တၢ်ဘါခိၣ်နၢ်တဖၣ် ဂုာ်ကျဲးစၢး ထုးနုာ်ကစၢ်ခရံာ်လၢ တၢ်ကတိၤဂ့ၢ်လိာ်ဘၣ်ဃးတၢ်ဂ့ၢ်တနီၤနီၤ အဆၢ ကတီၢ်, ကစၢ်ခရံာ်စံးဆၢဝဲ, “တၢ်ကွဲးအသးမ့ၢ်ဂ့ၤ, ယွၤအစိကမီၤမ့ၢ်ဂ့ၤ, မ့ၢ်သုတသ့ၣ်ညါဘၣ်ဒီး, သုနာ် ကမၣ်တၢ်လီၤ.” (မးသဲ ၂၂း၂၉).
တၢ်မ့ၢ်တၢ်တီအိၣ်ဝဲတနီၤ လၢနကဘၣ်တူၢ်လိာ်အီၤလၢနသးပူၤ ဒီး ပျဲအဟဲစိာ်န့ၢ်နၤ တၢ်ဃူတၢ်ဖိးလၢ နနီၢ်သးအဂီၢ်လီၤ. အဒိ, ကစၢ်ယွၤအတၢ်တိာ်ပာ်လၢ နတၢ်အိၣ်မူအဂီၢ်န့ၣ် ပှၤမၤဟးဂီၤ တသ့နီတဂၤဘၣ်. “အဂ့ၢ်ဒ်အံၤ, တၢ်သုးမုၢ်ဂီၢ်မုၢ်အယွၤတိာ်ဝဲလံ, ဒီးမ့ၢ်မတၤကမၤအီၤ ကလီကလီတဂၤလဲၣ်. ဒီးအစုယူာ် ထီၣ်အသးလံ, ဒီးမ့ၢ်မတၤကဒုးထုးလီၤက့ၤအီၤတဂၤလဲၣ်.” (ယရှါယၤ ၁၄း၂၇).
နကဘၣ်တူၢ်လိာ်လၢနသးပူၤစ့ၢ်ကီးလၢ တၢ်လၢကမၤအသးတမံၤလၢ်လၢ်န့ၣ် မၤအသး လၢတၢ်ဂ့ၤအဂ့ၢ် လၢနဂီၢ်လီၤ.
လၢတၢ်န့ၣ်အဃိ, နထီဒါ တၢ်ဘၣ်ယိၣ်ဘၣ်ဘီ ဒီး တၢ်ကိၢ်တၢ်ဂီၤတဖၣ်သ့ဝဲလီၤ. “ဒီးပသ့ၣ်ညါလၢ ပှၤလၢ အဘၣ်တၢ်ကိးအီၤ, ဒ်တၢ်ကူၣ်ပာ်အသိးတဖၣ်န့ၣ်, တၢ်ခဲလၢာ်မၤဃုာ်အသး, လၢတၢ်ဂ့ၤအဂ့ၢ် လၢအဂီၢ်လီၤ.” (ရိမ့ၤ ၈း၂၈). စီၤဒၤနံးယ့လး ဒုးသ့ၣ်နီၣ်ထီၣ်က့ၤပှၤလၢ ကစၢ်ယွၤ “ဟ့ၣ်လီၤတၢ်ကူၣ်သ့ လၢပှၤကူၣ်တၢ်သ့, ဒီးတၢ်သ့ၣ်ညါန့ၣ်လၢ ပှၤအသ့ၣ်ညါတၢ်လီၤ. လီၣ်ဖျါတၢ်အယိာ်ဒီး တၢ်အိၣ်ခူသူၣ် လီၤ. သ့ၣ်ညါတၢ်အိၣ်ဝဲလၢ တၢ်ခံးကျါ, ဒီးတၢ်ကပီၤအိၣ်ဝဲဆိးဝဲဒီးအီၤလီၤ.” (ဒၤနံးယ့လး ၂း၂၁-၂၂).
“တၢ်ကပီၤ” လၢနလိၣ်ဘၣ်အီၤ ဘၣ်ထွဲဒီးယွၤလီၤ. ဒီးတလိၣ်လၢ နကဘၣ်တူၢ်ဘၣ်လၢ နအိၣ်ဒီး တၢ်ဘၣ်ယိၣ်ဘၣ်ဃး တၢ်သ့ၣ်ညါတခါဂ့ၤတခါဂ့ၤနီတဘျီ ဖဲနသ့ၣ်ညါယွၤအခါ လၢၤဘၣ်, အဂ့ၢ်ဒ်အံၤ အဝဲဒၣ် သ့ၣ်ညါတၢ်ခဲလၢာ်လီၤ.
