မ့မ့ၢ်ဒိၣ်ထီၣ်သုဝဲလၢ တၢ်ဘျုးတၢ်ဖှိၣ်, ဒီးလၢတၢ်သ့ၣ်ညါ တၢ်အုၣ်က့ၤခီၣ်က့ၤပှၤ ပကစၢ်ယ့ၣ်ရှူးခရံာ် အပူၤန့ၣ်တက့ၢ်. (၂ ပ့းတရူး - ၃း၁၈).နဒိၣ်ထီၣ်လၢနီၢ်သးတကပၤသ့ဝဲဒ်လဲၣ်. သ့ဝဲခီဖျိလၢ တၢ်ဂ့ၢ်ယဲၢ်မံၤဒ်လာ်အံၤအသိးလီၤ.
(၁). ဃုထံၣ်သ့ၣ်ညါက့ၤလံာ်စီဆှံတက့ၢ်. နမ့တဘျုးလီၤနသးဆူ လံာ်စီဆှံအပူၤဘၣ်န့ၣ် နဒိၣ်ထီၣ်လၢနီၢ်သးတကပၤတသ့နီတဘျီဘၣ်. ဖဲကစၢ်ယ့ၣ်ရှူးခရံာ်တဲဘၣ်မုၣ်ကီၤလံၢ်, “တၢ်ကွဲးအသး, ပှၤကညီကမူထဲဝဲလၢကိၣ်န့ၣ်တမ့ၢ်ဘၣ်. မ့ၢ်လၢ ကယဲၢ်တၢ်ကတိၤလၢအဟဲထီၣ်လၢယွၤအထးခိၣ်လီၤ.” (မးသဲ ၄း၄), အခါန့ၣ် အဝဲဟံးန့ၢ်ဝဲ လံာ်စီဆှံတဆၢလၢ လံာ်ယဲၢ်မိၤရှ့အပူၤ လၢအတိၢ်န့ၢ်ပာ်စၢၤဝဲန့ၣ်လီၤ. ကစၢ်ယ့ၣ်ရှူးခရံာ်မ့ၢ်လိၣ်ဘၣ် ယွၤအကလုၢ်ကထါန့ၣ်, နၤစ့ၢ်ကီးနလိၣ်ဘၣ်ဝဲလီၤ.
(၂). စးထီၣ်ကဒါက့ၤနတၢ်ထုကဖၣ်အတၢ်အိၣ်မူတက့ၢ်. ခၠါလ်စပၢကၠၢၣ် စံးဝဲ, “ဒ်တၢ်မုၣ်တၢ်ဘိ ဒိၣ်ထီၣ် ဒီးထံဒီးကလံၤအသိးန့ၣ်, နနီၣ်သးအတၢ်ဒိၣ်ထီၣ်စ့ၢ်ကီး လိၣ်ဘၣ်ဝဲတၢ်ထုကဖၣ်ဒီး တၢ်စူၢ်တၢ်နာ်လီၤ.” ဖဲနနုာ်လီၤန့ၢ်ဆူၣ်လၢ တၢ်လၢအကဲထီၣ်အသးတသ့ဘၣ်အပူၤ ဒီး စးထီၣ်ဘါထုကဖၣ်ဆူ ကစၢ်ယွၤ အအိၣ် လၢကမၤတၢ်ဒိၣ်တၢ်မုၢ်တဖၣ်လၢနတၢ်အိၣ်မူအပူၤန့ၣ်, နကစးထီၣ်ထံၣ်ဘၣ် တၢ်လီၤလးတဖၣ် လီၤ.
(၃). မၤဘၣ်ထွဲနသးဒီးယွၤအပှၤဂီၢ်မုၢ်အသီတဘျီကဒီးတက့ၢ်. “မ်ပကွၢ်လိာ်ပသးတဂၤဒီးတဂၤ, ဒ်သိး ပကသဆၣ်ထီၣ်လိာ်ပခံဆူ တၢ်အဲၣ်တၢ်ကွံ, ဒီးတၢ်မၤဂ့ၤတၢ်န့ၣ်တက့ၢ်. ဟးဆှဲးပတၢ်အိၣ်ဖှိၣ်ရိဖှိၣ်, ဒ်ပှၤ တနီၤနီၤအလုၢ်အလၢ်အသိးန့ၣ်တဂ့ၤ, ပသဆၣ်ထီၣ်လိာ်ပခံဒီး, ပထံၣ်အမုၢ်တနံၤဒံးဘူးထီၣ်ဒီး, မ်ပသ ဆၣ်ထီၣ်လိာ်ပခံဒံးအါထီၣ်တက့ၢ်.” (ဧ့ၤဘြံၤ ၁၀း၂၄-၂၅).
(၄). ထီဒါနတၢ်ဒဲးဘးအလုၢ်အလၢ်တဖၣ်တက့ၢ်. “တမ့ၢ်ဘၣ်သုဘၣ်တၢ်လ့ပစီလၢ အတဘၣ်ဒံးဘၣ် ပှၤကညီဘၣ်. ဒီးယွၤမၤဝဲ အကလုၢ်တီသတးဒီး, တၢ်လ့ပစီလၢ အဆူၣ်ကဲၣ်ဆိး, လၢသုဒိးတကဲဘၣ်န့ၣ်, တဒုးဒိးဘၣ်သုဘၣ်. မ့မ့ၢ်လၢ တၢ်လ့ပစီအပူၤ, ကမၤထီၣ်ကျဲဒ်သိး သုကပူၤဖျဲးလၢအီၤလီၤ.” (၁ ကရံၣ်သူး ၁၀း၁၃). ထီဘိဃုထၢ ကစၢ်ယွၤတၢ်ပူၤဖျဲးအကျဲန့ၣ်တက့ၢ်.
(၅). ဘျၢလီၤနသးဆူပှၤဂၤအပူၤတက့ၢ်. ကစၢ်ယွၤအိၣ်ဒီးတၢ်လီၢ်လၢနဂီၢ် လၢနကမၤတၢ်အဂီၢ်, ဒီး ပှၤကညီလၢနကဘျၢလီၤနသးအဂီၢ်လီၤ. မၤတၢ်ဆၢတဲာ်လၢအဂ့ၤ, လၢအမ့ၢ် နသုတဆ့ၣ်နီၤထဲလၢ သရိာ်ပူၤ ဒီးဒိကနၣ်တၢ်စံၣ်တဲၤတဲလီၤဧိၤန့ၣ်တဂ့ၤ, မ့မ့ၢ်တခီ စးထီၣ်မၤထွဲ တၢ်လၢနမၤလိန့ၢ်အီၤ လၢတၢ်စံၣ်တဲၤတဲလီၤအပူၤ န့ၣ်တက့ၢ်.
